Read Kalanga 2 Bakorinta 5 Bible Online

2 Bakorinta 5 - Kalanga bible

2 Bakorinta 5

¹Ngobe toziba kuti ha nshasha we shango watinogala muuli ukolomogwa, tina mbako inodwa ku Ndzimu, ng'umba isakathamwa nge maboko, igele nge kusingapele kudzimu.

²Ha titjimu nshasha iwoyu, topisigwa kwazo mu moyo, takashuba kwazo kuti tiambale bugalo gwedu gwe kudzimu

³kuti ha tiguambala tisiwang'we tili mbujo.

⁴Ngobe ha titjimu nshasha iwoyu, tina shungu, tolemegwa, ngekuti atitoshaka kuti tiambugwe, koga kuti tiambadziwe mbili we kudzimu, kuti tjinobola tjiamidziwe nge butjilo.

⁵Ndzimu ndiwo wakatilulwamisila ikoku, ndiwo wakatipa Meya se tjipo tjinogadzabgwe.

⁶Ndizo wali tina kugalabgwe misi yose. Toziba kuti ha titji kanyi mu mbili, tikule na She,

⁷ngobe toyenda ngogalamoyo, kusi ngobona.

⁸Atitotja, koga toyemula kuthubukana ne mbili kuti tibe na She.

⁹Ndizo kene tili kanyi kene tisi kanyi, mazwimisilo edu hwunshathisa.

¹⁰Ngobe tose takafanila kuboneka mbeli kwe tjigalo tje sumikiliso tja Kirisiti, kuti mmwe ne mmwe aamutjile tjakanaka kene tjakabipa, kuyendidzana ne tjaakathama atjatjila.

¹¹Ndizo ngoziba kuti kutja She kodwani, togwisa kukulumbidza bathu kuzha ku Ndzimu, koga tjatili itjo tjozibgwa nge Ndzimu, ngono ndogalabgwe kuti namwi moziba ikoku mu hana dzenyu.

¹²Atitozwikudza kumuli, koga tomupa tjamungazwikudza nditjo nge kwedu, kuti ndizo mutubule kudabila ibabo banozwikudza nge mamo e nthu kusi nge moyo uwe.

¹³Ha tipenga nde kwedu ne Ndzimu, ha tisingapenge kobhatsha imwi,

¹⁴ngobe ludo gwa Kirisiti gotilaula, ngobe togalamoyo kuti nthu nng'ompela wakafila bose, ndizo nge imwe zila bose bakafa.

¹⁵Ngono wakafila bose, kuti ibabo banotjila basitjazwitjilile, koga batjilile iye wakabafila kamusiwa.

¹⁶Ndizo kudwa ngwenu, atina watinolinga nge zhisho le tjinyama, nenguba takatongo linga Kirisiti nge zhisho le tjinyama, ha titjanlinga sa ikoko.

¹⁷Ndizo ani kene ani umuna Kirisiti, wabe tjibumbiwa tjitshwa,[2] mbumbiko hwulukugwi yapinda, koga tshwa yazha.

¹⁸Kose ikoku kodwa ku Ndzimu, iwo wakatipa Kirisiti kuti atigadzanye nawo ndizo ukatipabo nshingo we kugadzanya.

¹⁹Nge mamwe matama, ndi Kirisiti, Ndzimu wakagadzanya shango nawo, usingababalile matjinyo abo, ngono ukatipa dama le kugadzanya.

²⁰Ndizo iswi ti bamilili ba Kirisiti, Ndzimu unomutetedzela ndiswi; tomukumbila mu bumo gwa Kirisiti kuti mugadzane ne Ndzimu.

²¹Nge kwedu Ndzimu wakantilika jinyo, iye usakatongo ziba jinyo, kuti ndizo munli tibe ndulamo ye Ndzimu.