Read Kalanga 2 Bakorinta 6 Bible Online

2 Bakorinta 6 - Kalanga bible

2 Bakorinta 6

¹Tili bashingi ne Ndzimu, tomukumbila kuti musiamutjilile ngoni dze Ndzimu suli,

²ngobe Ndzimu ukati, “Nge tjibaka tjakalingisana ndakamuhwa, ngono amubhatsha mu zhuba le kutjidziwa.” Bonani, ngwenu nditjo tjibaka tjakalingisana, bonani ngwenu ndilo zhuba le jidzo.

³Atina watinobigila tjikuthi mu zila iye, kuti ndizo kusiwang'we nlandu mu nshingo wedu.

⁴Koga se balanda be Ndzimu tozwikudza mu zila imwe ne imwe nge kudzikitadzila kudziyila, mu mang'oni nenge mu manikano.

⁵Tolobgwa tikalongwa mu ng'umba dze busungwa, tikabe mu phipiti, tikashinga kunolema, tikasibone hwope, tikafa nge zhala.

⁶Nge bubuyanana gwedu ne zibo ne moyonlefu ne buthu ne Meya yakayengemala ne ludo gwakwako,

⁷ne ndebo ye malebeswa ne simba le Ndzimu ne zwibhayano zwe ndulamo, tjimwe tjibhayano tje luboko gwe luji, tjimwe tje luboko gwe lumeshwe,

⁸mu kukudziwa ne mu kusakudziwa, mu kulebgwa zubuyanana ne mu kulebgwa zwakabipa. Tobhakhwa se batjengedzi, koga iswi tili mu malebeswa,

⁹tobhakhwa se tisingazibgwe, koga iswi tizibgwa zubuyanana, totogwa se bakafa, koga bonani, iswi totjila. Nenguba tilobgwa shamu atithutabulawa,

¹⁰nenguba tina buyendasi, misi yose takashatha. Tonga bashayi, koga tothama banjinji kuti babe bafumi. Tonga tisina tjatinatjo, koga tina zwithu zose.

¹¹Bakorinta, takalebeleka namwi takashaladuka.

¹²Ate kuli kuti ludo gwedu kumuli gushomanana koga imwi ndimwi musingatide nge buzhalo.

¹³Ndolebeleka se ndinolebeleka ne bana bangu nditi, mutizhulile mimoyo yenyu sekwa takamuzhulila yedu.

¹⁴Musikwebe nge jokwi ling'ompela ne basingagalemoyo. Ngobe apa ndulamo ne mbipo zwina bukhwinya poni kene? Kene tjedza ne zhalima zoshanganyilani kene?

¹⁵Apa Kirisiti na Bheliali[3] banodumana poni kene? Kene n'galimoyo uneni tjaakashanganyila ne usingagalemoyo kene?

¹⁶Ng'umba ye Ndzimu inodumana poni ne midzimu? Iswi ti ng'umba ye Ndzimu unotjila, se Ndzimu wakati, “Ndowogala mubali, ayenda pakati kwabo, ngono ndowobe Ndzimu wabo, ibo banowobe bathu bangu.”

¹⁷Ndizo “Bhudani mubali, muthubukane nabo,” kojalo She, “Musibhate tjimwe tjakatemapala, ipapo ndowomuamutjila,

¹⁸ngono ndowobe tate kumuli, imwi mukabe bakololo ne bakololokadzi bangu,” kojalo She Masimbawose.