Read Kalanga 2 Bakorinta 9 Bible Online

2 Bakorinta 9 - Kalanga bible

2 Bakorinta 9

¹Akutosheteka kuti ndimukwalile ngekwe nshingo we kupa bayengemali zwipo,

²ngobe ndoziba kuda kwenyu, ngono ndozwikudza nge kwenyu ku bathu be Makedoniya. Nditi, “Zwikamu mu Akaiya zwakazwilulwamisila kubhatsha kudwila makenyi.” Kumusa meya kwenyu kwakamusa bunji gwabo.

³Koga ndotuma zwikamu, kuti ndizo kuzwikudza kwedu nge kwenyu kusitongobe kwe suli muna ikoku. Koga kuti ndizo mube makazwilulwamisa sekwa ndakati mowobe makazwilulwamisa.

⁴Ha kungabe ne bamwe banodwa ku Makedoniya bangazha nami bebe bewana musakazwilulwamisa, tingabhakhwa nge shoni seni, koga imwi mungabhakhwa nge shoni kupindisa nenguba kuna kuzwikudza kwakajali.

⁵Ndizo ndawana kwakalingisana kukulumbidza zwikamu izwezwi kuzha kumuli kunditangila kuti balulwamisile mbeli kwe tjibaka tjipo itjetji tjamakagadzabgwe. Ipapo tjowobe tjakalulwama ha ndiswika, ngono tjisi tjamakombeledzwa koga tjili tjipo tjamapa nge moyo ntjena.

⁶Kumbulani woku: Ani kene ani unodzwala kutukununu unowovuna kutukununubo, koga iye unodzwala kunjinji unowovuna kunjinji.

⁷Mmwe ne mmwe wakafanila ape sekwa ada asingazeyeze kene asingakombeledziwe, ngobe Ndzimu unoda nthu unopa akashatha.

⁸Kakale Ndzimu unotubula kumupa tjipo tjimwe ne tjimwe nge buzhalo, kuti ndizo misi yose mube muna tjimwe ne tjimwe tjakaswika, mutubule kupana nge buzhalo mu nshingo mmwe ne mmwe wakalulwama.

⁹Sekwa kwakakwagwa kuyi, “Unoandamisa, unopa bashayi, ndulamo iye aitopela.”

¹⁰Iye unopa ndzwali mbewu ne tjiwunga kuja unowomupa kawandisa mbewu yenyu ngono kawatsha mbuzilo ye ndulamo.[4]

¹¹Mowofumisiwa nge zila dzose kuti ndizo mupane nge sununguko hwulu ndizo bunjinji gowoboka Ndzimu ngekwe zwipo zwenyu zwabanoamutjila mutili.

¹²Ngobe nshingo iwoyu wamunoshinga autobhatsha kusheta kwe bayengemali koga, koga unopinda ukazhisa kuboka kukulu ku Ndzimu.

¹³Nshingo wenyu iwoyu unowolakidza meya yenyu ye Tjikirisiti, bamwe banjinji banowokudza Ndzimu ngekwe kuhwa ndebo mbuya ya Kirisiti, iyo yamunoleba ne kupana kwenyu kukulu ku bali ne ku bamwe bose.

¹⁴Ngono banowomutembezelela bakamushuba ngekwe ngoni dze Ndzimu hwulu mu muli.

¹⁵Ngakutendiwe Ndzimu ngekwe tjipo tjawo tjisina themba.