Read Kalanga Bagalatiya 1 Bible Online

Bagalatiya 1 - Kalanga bible

Bagalatiya 1

¹Ndimi Paulo, ntumwa wa Jesu, imi ndisakadang'wa ne nthu kube ntumwa, koga ndakadang'wa ndi Jesu Kirisiti ne Ndzimu Tate, ibo bakammusa mu bafi, ne

²zwikamu zose zwingeno todumilisa makubungano e Galatiya titi;

³Ngoni ne kunyalala kunodwa ku Ndzimu Tate na She Jesu Kirisiti ngakube namwi.

⁴Kirisiti iye wakazwipa kube tjibhayilo tje matjinyo edu, kutisunungula mu bubi gwe misi ino, kuli kuda kwe Ndzimu Tate bedu.

⁵Ngabakudziwe nge kusingapele kose. Ngakujalo.

⁶Ndotjenamisiwa nge kuti, tjinyolotjo motjisiya iye wakamudana nge ngoni dza Kirisiti,[1] mutobela ndebo mbuya ipoga,

⁷kusingadwe kuti kuna imwe ndebo mbuya, koga kuna bamwe banomudziyidza, beshaka kuleyanya ndebo mbuya ya Kirisiti.

⁸Kene kuli iswi, kene ntumwa we kudzimu ha angamusumikilila imwe ndebo mbuya ipoga, kusi iyeyi yatakamusumikilila, ngaabe ne bhiso.

⁹Sekwa takaleba kutanga, nditjaleba kakale nditi, ha kuli kuti kuna mmwe unomusumikilila ndebo mbuya ipoga inoleyana ne yamakaamutjila, ngaabe ne bhiso.

¹⁰Apa ndoshaka kudiwa nge bathu kene nge Ndzimu? Kene ndogwisa kushathisa bathu? Ha ndabe nditjashathisa bathu, ndobe ndisi nlanda wa Kirisiti.

¹¹Ndoshaka kuti muzibe etji zwikamu, kuti ndebo mbuya yandakasumikila ate ili ndebo mbuya yakazwithamigwa koga nge bathu.

¹²Andizo i amutjila idwa mu nthu, kakale akuna wakandidiya iyo, koga ndaka i amutjila ili zumbunulo inodwa kuna Jesu Kirisiti.

¹³Ngobe makahwa sekwa ndakabe nditjila mu tjilenje tje Bajuta, sekwa ndakadziyidza kwazo gubungano le Ndzimu ndishaka kulikolomola,

¹⁴ndakabe ndakasima mu tjilenje tje Bajuta kupinda thaka dzangu mu bathu ba kanyi kwangu, ndakalonga meya nge buzhalo mu zwilenje zwa bobatategulu.

¹⁵Koga Ndzimu iwo wakandishalula ndisathu azwagwa, ukandidana nge ngoni dzawo,

¹⁶wakashathila kundizumbunulila Nkololo wawo, kuti ndisumikile nge kukwe kuna Bezwitjaba. Akuna nthu wandakakumbuludzana naye,

¹⁷kakale andizotongoyenda ku Jerusalema, kuna ibabo bakashagwa bali batumwa ba Jesu kunditangila, koga ndakayenda tjinyolotjo ku Arabhiya, adwa abgwilila ku Damasiko.

¹⁸Ngono kwakati shule kwe makole matatu ayenda ku Jerusalema kunokumba Pita. Ndakagala naye mazhuba ali gumi lina mashanu.

¹⁹Akuna mmwe ntumwa wandakabona kakale kuzhe kwa Jakubo,[2] nnung'una wa She.

²⁰Tjandinokwala malebeswa mbeli kwe Ndzimu. Anditonyepa!

²¹Shule kwa ipapo ndakayenda ku mituthu ye Siriya ne Silisiya.

²²Be makubungano a Kirisiti mu Judiya bakabe basathu bakandibona.

²³Bakabe behwa kulebgwa koga kuyi: “Nlume wakatongobe etidziyidza, ngwenu unosumikila bugalimoyo gwaakatongo gwisa kukolomodza!”

²⁴Ndizo bakakudza Ndzimu nge kwangu.