Read Kalanga Bagalatiya 2 Bible Online

Bagalatiya 2 - Kalanga bible

Bagalatiya 2

¹Shule kwe makole ali gumi lina manna (14), ndakayenda kakale ku Jerusalema ndina Bhanabhasi na Tito.

²Ndakayenda, ngobe Ndzimu wakandizumbunulila kuti ndiyendeko. Ndakatjenesela batungamili pakasumbikala ngekwe ndebo mbuya yandinosumikilila Bezwitjaba. Ndakathama saikoko ngobe ndakabe ndisingade kuti nshingo wangu wandakashinga ne wandinoshinga ngwenu usibe suli.

³Nanga Tito iye wandakabe ndi naye, aazokombeledzwa kuthumbigwa, nenguba ali N'giriki.

⁴Ikoku kwakashingikala ngobe zwikamu zwe manyepkhwa zwakangina mu gubungano ledu nge butjakwani, bali shodzi, kuti babone kusununguka kwatinako muna Kirisiti Jesu. Bakabe beshaka kutithama balanda,

⁵koga kuti ndizo malebeswa e Ndebo mbuya abiganyike mu muli, atizodumana nabo.

⁶Ngono ibabo bakabe bekaiwa bali bapezhugwi, tjabakabe bali itjo aatjitodwa tjimwe kundili, Ndzimu auna shalaulo, bathu ibabo akuna tjimwe tjabakapapha mundili.

⁷Koga mu bumo gwa ikoku bakabona kuti Ndzimu wakandipa nshingo we kusumikila ndebo mbuya kuna basakathumba koga sekwa kwakapiwa Pita nshingo we kusumikila ndebo mbuya kuna bakathumbigwa,

⁸ngobe Ndzimu sekwa wakatungamila Pita mu nshingo uwe se ntumwa kuna bakathumbigwa wakanditungamilabo mu nshingo wangu we butumwa kuna Bezwitjaba.

⁹Jakubo, na Pita na Johani, ibabo bakabe betogwa bali nshongoshongo wakabhata mbadu, bakati babona ngoni dzandakathamigwa nge Ndzimu, bakatibhata maboko, imi na Bhanabhasi kuli tjilakidzo tjekuti tibang'ompela, iswi tishinge pakati kwe Bezwitjaba, ngono ibo bashinge pakati kwe bakathumbigwa.

¹⁰Tjabakakumbila koga hwuti tikumbule bashayi, itjo tjithu tjandakabe[3] nditukutilila tjishinga.

¹¹Koga Pita wakati azha ku Antiyoki, ha n'nyanyayidza pa mesho e mmwe ne mmwe ngobe wakabe etjinya.

¹²Kwakati bathu bakatumwa ndi Jakubo basathu bakaswika ikoko, Pita wakabe eja ne Bezwitjaba. Koga bathu ibabo bakati batjizha, kazwithubukanya ne Bezwitjaba kasitjaje nabo, ngobe wakabe etja goko lebakathumbigwa.

¹³Ngono bamwe Bajuta bakakuzhuka mu bupitipiti gwa Pita; ngono na Bhanabhasi kalashiwa nge kutobelela bupitipiti gwabo.

¹⁴Ndakati ndibona kuti abatoshinga bali mu ndongoloso ye malebeswa e ndebo mbuya, ati kuna Pita mbeli kwabo bose, “Iwe u Njuta, koga unotjila se we zwitjaba. Ungakombeledza Bezwitjaba kutjila se Bajuta tjini wali?”

¹⁵Iswi ti Bajuta ngozwagwa, ate tili Bezwitjaba batjinyi,

¹⁶toziba kuti nthu atolulwamisiwa ngolondolodza nlayo, unolulwamisiwa ngogalamoyo muna Jesu Kirisiti. Ndizo naswibo takagalamoyo muna Kirisiti Jesu, kuti tilulwamisiwe ngogalamoyo muna Kirisiti, kusi nge kulondolodza tjinoshakwa nge nlayo. Ngolondolodza tjinoshakwa nge nlayo akuna ungalulwamisiwa.

¹⁷Ndizo ha tishaka kululwamisiwa muna Kirisiti, koga tiwang'wabo tili batjinyi, apa ikoku kodwa kuti Kirisiti unokudza jinyo kene? Dumbu akuzojalo!

¹⁸Ha ndibaka kakale tjandakakolomola, ipapo ndowobe ndilakidza kuti ndotjuluka nlayo.

¹⁹Ngekwe nlayo ndakafa, ndibulawa nge nlayo, kuti nditjilile Ndzimu.

²⁰Ndakabambugwa na Kirisiti, ndizo akutji imi ndinotjila, koga ndi Kirisiti unotjila mundili. Butjilo gwandinotjila ngwenu mu nyama, ndotjila nge kugalamoyo mu Nkololo we Ndzimu, iye wakandida, kakale wakandifila.

²¹Anditolamba ngoni dze Ndzimu, koga ha nthu elulwamisiwa mbeli kwe Ndzimu nge nlayo, kodwa kuti Kirisiti wakafila suli.