Read Kalanga Bagalatiya 4 Bible Online

Bagalatiya 4 - Kalanga bible

Bagalatiya 4

¹Tjandinoleba hwuti, n'gali thaka ha atji mwana, unobhakhwa koga se nlanda nenguba nge malebeswa zwithu zose zwili zwizwe.

²Ha atji ntjetjana, kuna babhabhi ne batjengeti banotjengeta zwithu zwizwe kuswikila tjibaka tjakabigwa ndi tate babe tjiswika.

³Naswibo takati tili bana, takabe balanda be zwidiyo zwe meya ye lubumbo.

⁴Koga kwakati tjibaka tjatjizha nge buzhalo, Ndzimu ukatuma Nkololo wawo wakazwagwa nge nkadzi, ezwaligwa mu nlayo,

⁵kudzutunula ibabo bapasi kwe nlayo, kuti tibe bana be Ndzimu.

⁶Ngobe muli bana bawo, Ndzimu wakatumila Meya ye Nkololo wawo mu mimoyo yedu, Meya iyo inodanilila iti, “Abha[4] Tate!”

⁷Ndizo ngwenu, mu Ndzimu ha utji nlanda, koga wabe mwana, ngono se wabe mwana wawo, Ndzimu wakakuthama kuti ube n'gali thaka.

⁸Kutanga, makati musathu mukaziba Ndzimu, makabe muli balanda ba izwezo zwisi midzimu.

⁹Koga ngwenu se moziba Ndzimu, kene ndingati, ngwenu se mozibgwa nge Ndzimu, mobgwililila tjini ku meya isakasima, inosheta wali? Moshaka kube balanda bayo kakale?

¹⁰Molondolodza mazhuba mamwe ne mimwedzi ne misi ne makole mamwe.

¹¹Ndogwadzika nge kwenyu, kuti nge imwe zila ndakazanisa masimba angu mu muli.

¹²Ndomukumbila, zwikamu zwangu, ibeni sami, ngobe nami ndatjibe samwi. Akuna tjamakanditjinyila.

¹³Moziba kuti ini ndakasumikila ndebo mbuya kumuli tje kutanga; ngobe ndakabe ndigwala.

¹⁴Koga nenguba bugwele gwangu gwakabe guli ndiko kumuli; amuzondilingila pasi, kene kuli kundilamba. Koga makandiamutjila sekwa mungaamutjila ntumwa we kudzimu, sa Kirisiti Jesu nge kukwe.

¹⁵Kushatha kwenyu kwakayenda ngayi? Ndina malebeswa ekuti akwabe kutubuka, mungabe makakonyombola mesho enyu mukandipa iwo.

¹⁶Apa ndatjibe tjita tjenyu ngwenu nge kumubudza malebeswa kene?

¹⁷Bathu ibaba bakatukutilila kuti mubatobelelele suli. Tjabanoshaka koga hwumuthubukanya naswi, kuti ndizo mutukutilile ibo.

¹⁸Kwakanaka kutukutilila tjimwe, ha kuli kuti tjinotukutiligwa tjakalulwama, kusi kutukutila ha ndinamwi koga.

¹⁹Bana bangu! Koga se nkadzi umu zwibhayo zwe kutshibama, kwakajalobo mu ndili, kuswikilila mukula muna Kirisiti.

²⁰Ndoyemula kwazo kuti ndingabe ndi namwi ngwenu, kuti ndizo ndishandule hwi langu ngobe ndakatjenama nge kwenyu.

²¹Mundibudze imwi banoshaka kube pasi kwe nlayo, apa amutohwa nlayo tjaunoleba kene?

²²Kwakakwagwa kuti Abhurahama wakabe ana bakololo babili, mmwe wakanzwala nge nlandakadzi, mmwe nge nkadzi wakabe asi nlanda.

²³Nkololo uwe waakazwala nge nlandakadzi, wakazwagwa nge zila ye bathu bose, koga nkololo uwe waakazwala nge nkadzi usi nlanda, wakazwagwa nge kugadziwabgwe nge Ndzimu.

²⁴Zwithu izwezwi zwifaniso: Bakadzi ibaba babili, kodwiwa zwidumano zwibili. Tjidumano tje kutanga nge tje Dombo le Sinai, tjozwalila bana mu bulanda, ndi Haga.

²⁵Haga, i Dombo le Sinai mu Arabhiya, iye umilile[5] nzi nkulu Jerusalema mu mazhuba ano, nge kuti umu busungwa ne bana babe.

²⁶Koga nkadzi mmwe umilile Jerusalema u pezhugwi wakasununguka, ngono ndiye mme bedu.

²⁷Ngobe kwakakwagwa kukayi, “Shatha kwazo iwe balumbila, iwe usingawane bana! Pululudza umimile nge kushatha, iwe usakatongobe mu zwibhayo! Ngobe bana be nkadzi wakasiyiwa banji kupinda bana be wakalobogwa.”

²⁸Ngwenu imwi, zwikamu zwangu, monga Isaki, mu bana be kugadziwabgwe.

²⁹Nge tjibaka itjetjo nkololo wakazwagwa nge zila ye bathu bose wakadziyidza nkololo wakazwagwa nge Meya ngono kwakajalo zwako nangwenu.

³⁰Koga Hwalo dzikatini kene? Hwalo dzikati, “Tata nlandakadzi ne nkololo uwe, ngobe nkololo we nlandakadzi aatogala thaka ne nkololo we nkadzi usi nlanda.”

³¹Ndizo zwikamu, iswi ate tili bakololo be nlandakadzi koga tibana be nkadzi usi nlanda.