Read Kalanga Bagalatiya 5 Bible Online

Bagalatiya 5 - Kalanga bible

Bagalatiya 5

¹Kirisiti wakatisunungula kuti tibe ne sununguko. Ndizo simisilani, musitjabgwilile mu jokwi le bulanda kakale.

²Hwililani! Imi, Paulo, ndomudwa nditi ha muthumbigwa, kodwa kuti Kirisiti aatowobe ana nshingo mu muli.

³Kakale ndoti ku mmwe ne mmwe unothumbigwa, koshakika kuti mulondolodze nlayo wose.

⁴Imwi banoshaka kululwamisiwa nge kulondolodza nlayo, makazwithubukanya na Kirisiti. Mukuzhe kwe ngoni dze Ndzimu.

⁵Ngoti iswi nge kugalamoyo takalindila nge Meya kululwamisiwa kwatakagadziwabgwe.

⁶Ha tili muna Kirisiti Jesu, kuthumbigwa kene kusathumbigwa akutodwa tjimwe, tjinoshakika hwugalamoyo kunozwilakidza nge mishingo ye ludo.

⁷Makabe makadwilila zubuyanana! Ndiani wakamudzinganyidza, kuti musihwe malebeswa?

⁸Kukulumbidza ikoku akutodwa ku Ndzimu, iwo unomudana.

⁹Mbidzo shomanana inobidza bgwisa gose gwe tjiwunga gwavangwa.

¹⁰Ndogalabgwe muna She kuti amutowoamutjila mmwe nkumbulo upoga, kuzhe kwe wangu, koga iwoyo unomudiyila ntome, kene ali ani, unowolobgwa nge Ndzimu.

¹¹Zwikamu, ha ndabe nditjasumikila kuthumbigwa, ini nditjadziyidziwa? Ha kwakajalo, ipapo tjileyanyo tja Kirisiti aatjina nlandu.

¹²Ndoyemula kuti bathu ibabo banomudzonga mazwiwo, bazwikatshile.

¹³Imwi zwikamu zwangu, makadanigwa sununguko. Ngono musishingise sununguko yenyu kuthama zwe tjinyama. Koga shingilanani nge ludo.

¹⁴Ngobe nlayo wose wakashingikadziwa mu dama ling'ompela linoti, “Ida mmwe nthu sekwa unozwida.”

¹⁵Koga ha mulumana, mujana nge meno, ibeni nge njele kuti musilobesane.

¹⁶Koga tjandinoleba ndi etji, tungamigwani nge Meya, kuti ndizo musishathise njemulo dze tjinyama.

¹⁷Ngobe njemulo dze tjinyama dzothama tjinonyanyayidzana ne Meya ne njemulo dze Meya, dzonyanyayidzana ne njemulo dze tjinyama. Zwithu izwezwi, zonyanyayidzana, kuti musithame tjamunoshaka thama.

¹⁸Koga ha makatungamigwa nge Meya, amute muli pasi kwe nlayo.

¹⁹Zwinoshingwa nge mbumbiko ye tjinyama zwipatjena: Kuwalilana thobo kusakalingisana, kuwalilana thobo kunobhatisa shoni ne njemulo dzisakanaka dzekuwalilana thobo,

²⁰ne thigamila midzimu yakabezhiwa ne buloyi ne lubengo ne fupa ne gwadzamoyo ne yemula kuna ndandala. Banothubukana nge mibungana, bethama zwikowa zwinonyanyayidzana,

²¹banotjiba, banon'gwa, bana kusazwidziba ne kushinga zwimwe zwakabipa. Ndomutjenjedza sekwa ndakamutjenjedza kutanga, ibabo banothama zwithu izwezwi, kuti abatowowana gobe mu Bushe gwe Ndzimu.

²²Koga zwizwalo zwe Meya ludo ne shatho ne mbakiso ne moyonlefu ne butho ne kululwama ne kugagwabgwe

²³ne bunyolo ne kuzwiibhata. Akuna nlayo unonyanyayidzana ne zwithu izwezwi.

²⁴Kakale ibabo ba Kirisiti Jesu, bakasiya mbumbiko yabo ye tjinyama, ne nyota mbi ne njemulo dzayo mbi.

²⁵Ha titjila nge Meya ngatitungamigweni nge Meya.

²⁶Ngatisizwikudzeni kene kuli kutangana, kene kube ne fupa mu bamwe.