Read Kalanga Bagalatiya 6 Bible Online

Bagalatiya 6 - Kalanga bible

Bagalatiya 6

¹Zwikamu, ha mmwe wenyu athama tjakabipa, imwi be tjimeya mu mbuze mu zila nge bunyolo. Koga uzwilise kuti usitjengelekebo.

²Amulanani mitolo, nge zila yakajalo mowobe mulondolodza nlayo wa Kirisiti.

³Ha mmwe ekumbula kuti iye u tjimwe, koga asi tjimwe, unozwitjengedza.

⁴Mmwe ne mmwe ngalingisise mishingo iye, ngono ndizo kudwapo ungazwikudza, asingazwifananye ne mmwe,

⁵ngobe mmwe ne mmwe wakafanila senga mitolo iye.

⁶Mmwe ne mmwe unodiyiwa dama wakafanila kobana tjimwe ne tjimwe tjibuya tjaanatjo ne n'diyi uwe.

⁷Musitjengedzeke, Ndzimu ha ungathamwe tjilengwe. Nthu unovuna tjaadzwala.

⁸Iye unodzwala mu nnda uwe we tjinyama, unowovuna golomodzo mu tjinyama, koga iye unodzwala mu nnda we Meya, unowovuna butjilo gusingapele mu Meya.

⁹Ngatisinyadziweni nge kushinga bubuya, ngobe nge tjibaka tjakalingisana towovuna kwakafanila, ha tisanyalamoyo.

¹⁰Ndizoke, ha titjina tjibaka, ngatithamileni bathu bose bubuya, kwazo kwazo ibabo be nsha we bagalimoyo.

¹¹Bonani kuti ndomukwalila nge shanga hwulu kungapani, ndikwala nge gwangu luboko!

¹²Ibabo banogwisa kumukombeledza kuthumbigwa, ndibo banoshaka kuyita mashungwandibong'we bezwikudza nge zwithu zwe tjinyama. Banoyita ikoku ngobe betja kudziyidzigwa tjileyanyo tja Kirisiti.

¹³Ate ili kuti kene ibabo bakathumbigwa banolondolodza nlayo, koga banoshaka kuti muthumbigwe, kuti ndizo bazwikudze nge kuthumbigwa kwenyu.

¹⁴Imi kuti ndizwikudze, ndowozwikudza koga ngekwe tjileyanyo tja She wedu Jesu Kirisiti, ngobe nge tjileyanyo tjitje, ha nditjatjila sekuno tjila bathu be shango, koga habatohwisisa kuti ini nditjila saikoku.

¹⁵Kuthumbigwa kene kusathumbigwa akutodwa tjimwe, koga tjithu tjikulu i mbumbiko tshwa.

¹⁶Kunyalala ne mahwilongoni ngazwibe muna ibabo banotobela matama iyawa, ne mu Baiziraela bose be Ndzimu.

¹⁷Ndopeleledza nditi, ngakushete unondidziyidza, ngobe mu mbili wangu ndina mabanga ngekwa Jesu.

¹⁸Ngoni dza She wedu Jesu Kirisiti ngadzibe namwi zwikamu. Ngakujalo.