Read Kalanga Baefeso 1 Bible Online

Baefeso 1 - Kalanga bible

Baefeso 1

¹Ndimi Paulo, ntumwa wa Kirisiti Jesu nge kuda kwe Ndzimu. Ku bayengemali bamu Nzi we Efeso, ibo bakagalamoyo muna Kirisiti Jesu.

²Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.

³Ngakukudziwe Ndzimu Tate ba She wedu Jesu Kirisiti, bakatipa makombolelo muna Kirisiti nge makombolelo mamwe ne mamwe e tjimeya mu magalo e kudzimu.

⁴Ngobe Ndzimu wakatishalula kale kube bawo muna Kirisiti, shango isathu ikabambiwa, kuti ndizo tiyengemale tibe basina nlandu.

⁵Ndzimu wakatithama bakololo bawo bakapelela ndi Jesu Kirisiti mu ludo gwawo, kuyendidzana nge mazwimisilo e kuda kwawo.

⁶Ngatikudzileni Ndzimu ngoni dzawo hwulu, dza wakatipa nge sununguko mu nkololo wawo unodika!

⁷Munli tina kusununguka nge lopa lile, nge kutizwiibhatigwa matjinyo edu, kuyendidzana ne bukulu gwe ngoni dzawo,

⁸dzawakatihwila kungapangapa, mu butjenjedu gwawo ne kuhwisisa,

⁹ngobe Ndzimu wakathama kuti tihwisise masazibgwe e kuda kwawo, kuyendidzana ne mazwimisilo awo akalulwama awakapedza kale muna Kirisiti.

¹⁰Ikoku ili ndongoloso ye Ndzimu kuswikila tjibaka tjakafanila tjizha, kubhatshanya zwithu zose muna Kirisiti, zwithu zose zwi kudzimu ne zwithu zwimu shango.

¹¹Muna Kirisiti, kuyendidzana nge ndongoloso ye Ndzimu unothama zwithu zose kuyendidzana nge njendiso ye kuda kwawo,

¹²iswi takagalabgwe kutanga muna Kirisiti, takashaluligwa kuti titjilile kulumbidza gudzo lawo.

¹³Namwibo sekwa makahwa dama le malebeswa, iyo ndebo mbuya ye jidzo lenyu, koga mukagalamoyo muna Kirisiti, makatjwayiwa nge Meya yakayengemala yawakagadzabgwe,

¹⁴ili itjo tjibigilidzo tje thaka yedu yatakagadziwabgwe nge Ndzimu, ngono ikoku kotipa malebeswa e kuti, Ndzimu unowodzutunula bana bawo kuuteta ne kuukudza.

¹⁵Ngekwa ikoku nenge kuhwa ngekwe bugalimoyo gwenyu muna She Jesu ne ludo gwamunoda bayengemali bose ndigo,

¹⁶anditoletja kuboka Ndzimu nge kwenyu, ndimukumbula mu mitembezelo yangu,

¹⁷kuti Ndzimu wa She wedu Jesu Kirisiti, Tate banokudziwa bamupe meya inowomutjenjedza ikamuzumbunulila Ndzimu, kuti muuzibe.

¹⁸Mikumbulo yenyu ngaibe ne tjedza kuti muzibe kuti kugalabgwe kwawakamudanila ini, ne kuti muzibe bukulu gwe fumwa yawo yawakagadzabgwe kuti unowoipa bayengemali,

¹⁹nenge kuziba simba lawo gulu lisina palinoma, lili mutili iswi banogalamoyo, kuyendidzana ne simba lawo gulu.

²⁰Ndzimu wakashingisa simba ileli mu kumusa Kirisiti mu bafi, ngono ukan'gadza ku luboko gwawo gwe luji mu magalo e kudzimu,[1]

²¹pezhugwi kwe babusi bose ne balauli ne masimba na boshe ne pezhugwi kwe zina limwe ne limwe lingadang'wa, kusimu nsi uno koga ne muna unozha.

²²Ndzimu wakabiga zwithu zose kusi kwe ndaulo ya Kirisiti, ukanthama nsholo we zwithu zose mu gubungano.

²³Gubungano ileli, ndilo mbili uwe, ilo linozhadziwa ndiye unozhadza tjimwe ne tjimwe.