Read Kalanga Baefeso 3 Bible Online

Baefeso 3 - Kalanga bible

Baefeso 3

¹Ngekwa ikoku, imi Paulo, ndi nsungwa wa Kirisiti Jesu nge kwenyu imwi Bezwitjaba.

²Ndoduma nge buzhalo kuti, makahwa kuti Ndzimu nge ngoni dzawo, wakandipa nshingo nge kwenyu,

³nenge sekwa ndakazibisiwa masazibgwe iyawo nge zumbunulo, sekwa ndakakwala nge bufupi.

⁴Ha mubala ipapa, mungahwisisa luzibo gwangu mu masazibgwe a Kirisiti.

⁵Mu zwizekugwana zwakapinda, masazibgwe iyawa aazotongo zumbunuligwa bathu, se ngwenu kwakazumbunuligwa batumwa bawo bakayengemala ne balebesambeli nge Meya.

⁶Ndizo wali, Bezwitjaba batjibe bagali thaka na ibabo, batjibe ndungululo dze mbili nng'ompela, kakale bana gobe mu kugadzabgwe kumuna Kirisiti Jesu nge ndebo mbuya.

⁷Ndakabe nlanda we ndebo mbuya iyeyi nge tjipo tje ngoni dze Ndzimu, itjo tjandakapiwa nge kushinga kwe simba lawo.

⁸Nenguba ndili ntukunu mu ntukunu tjose we bayengemali, ngoni idzedzi dzakazhisiwa mundili kusumikilila be Bezwitjaba fumwa isingapele ya Kirisiti,

⁹nenge kuthama kuti bathu bose babone kuti ndongoloso ye masazibgwe akabe akasumbikala kudwila ntolo mu Ndzimu wakabumba zwithu zose.

¹⁰Kuti nge gubungano, butjenjedu igogu gunjinji gwe Ndzimu, ngwenu guzibisiwe babusi ne balauli mu magalo e kudzimu,

¹¹kuyendidzana nge ndongoloso yawo isingapele, yawakashingisa muna Kirisiti Jesu She wedu.

¹²Tina tjilopa ndiye kuzha pa Ndzimu tisingatje takasimamoyo nge kugalamoyo munli.

¹³Ndizo ndokumbila kuti, musinyadziwemoyo ngekwa ndinomudziyilila, ngobe igudzo lenyu.

¹⁴Ngekwa ikoku, ndothigama mbeli kwa Tate,

¹⁵ibo be zina nsha mmwe ne mmwe kudzimu ne mu shango launodang'wa ndilo.

¹⁶Ndotembezela kuti, kuyendidzana nge fumwa ye gudzo labo, tshene bangamusimisa nge simba le Meya yabo, kuti musime tjemukatikati kwenyu,

¹⁷nenge kuti Kirisiti agale mu mimoyo yenyu nge kugalamoyo, kuti se makadzikigwa mukateyiwa mu ludo,

¹⁸kuti mube ne masimba e kuhwisisa nge buzhalo ne bayengemali bose, bupabi ne bulefu ne bukulu ne mukati kwe ludo gwa Kirisiti,

¹⁹igo gunopinda zibo kuti ndizo muzhadziwe nge mbumbiko yose ye Ndzimu muti tupu.

²⁰Iye unotubula nge simba linoshinga mutili, kuthama zwithu zwinjinji, kupinda kose kwatingakumbila kene kwatingaalakana,

²¹ngaakudziwe nge gubungano, muna Kirisiti Jesu kunoti mu zwizekugwana zose, nge kusingapele kose! Ngakujalo.