Read Kalanga Baefeso 4 Bible Online

Baefeso 4 - Kalanga bible

Baefeso 4

¹Ndizo ngwenu, imi ndili nsungwa ngekwa She, ndomukumbila, nditi tjilani nge zila yamakadang'wa kuti mutjile ndiyo.

²Muzwiyise pasi, kakale mube banyolo, ibeni ne moyonlefu. Mulakidzane ludo nge kusanyalamoyo.

³Gwisani nge matatabuko wose kusimisa bhatana kwamakapiwa nge Meya, musimisa nge kunyalala.

⁴Kuna mbili nng'ompela ne Meya ing'ompela, koga sekwa makadanigwa kugalabgwe kung'ompela se kwa makadang'wa,

⁵She nng'ompela, kugalamoyo kung'ompela, kudubika kung'ompela,

⁶ne Ndzimu nng'ompela, kakale uli Tate bedu tose, ibo bapezhugwi kwedu tose kakale ba pezhugwi kwezwithu zose, kakale ba mutili tose.

⁷Koga mmwe ne mmwe wakahwigwa ngoni nge tjilizanyo tje tjipo tja Kirisiti.

⁸Ndizo kukayi, “Wakati etathila pezhugwi, kayenda ne basungwa banjinji, kapa bathu zwipo.”

⁹Ha kuyi “Etathila pezhugwi” kodwani? Kodwa kuti, kutanga wakadelukila pasi kwe shango?

¹⁰Iye wakadeluka ndiyezwe wakatathila pezhugwi, kupinda kudzimu kose, kuti ndizo azhale lubumbo gose.

¹¹Ndiye wakapa zwipo zwakathama bamwe kube batumwa, bamwe balebesambeli, bamwe kube basumikili, bamwe kube balisi be gubungano ne badiyi,

¹²kululwamisila bayengemali nshingo we kushingila gubungano, kuti ndizo mbili wa Kirisiti ubumbike,

¹³kudzina tose tingina mu kubhatana kwe bugalimoyo nenge kwe luzibo ngekwe Nkololo we Ndzimu ne kukula ne njalakang'wa nenge kulizana na Kirisiti nge buzhalo.

¹⁴Atizofanila kudwilila nge butjetjana titutudzigwa yeno na yeno nge phepo imwe ne imwe ye zwidiyo zwe bathu nge butjakwani nenge bukwelekwele nenge butjengedzi.

¹⁵Koga ngoleba malebeswa mu ludo, muna zose, towokulila munli iye Nsholo, iye Kirisiti.

¹⁶Ndiye unobhatshanya ndungululo dzose dze mbili, edzithumanya nge tshinga, se ndungululo imwe ne imwe inoshinga zubuyanana, ithama kuti mbili ukule zubuyanana mu kuzwibumba kwawo mu ludo.

¹⁷Ngwenu ndoleba ndakasimisila muna She, musitjadwilile mutjila se basingagale moyo, be mikumbulo isina nshingo.

¹⁸Mikumbulo yabo imu zhalima, kakale bakathubukana ne butjilo gwe Ndzimu nge kusheta zibo ku mubali, ngobe mimoyo yabo yakakukutala.

¹⁹Abana shoni, banozwitjilila mu mizipo, belibilidzila kuzwilonga shambgwa, kakale basingazwidzibe.

²⁰Imwi ate itjo tja makazwidiya ngekwa Kirisiti.

²¹Ndoduma kuti, makahwa nge kukwe mukadiyiwa munli, se malebeswa ali muna Jesu.

²²Thubukanani ne mbumbiko yenyu hwulukugwi ye matjilo enyu e kutanga asakalulwama nge njemulo dze bupitipiti,

²³meya yenyu ne njalakang'wa dzenyu ngadzibe tshwa.

²⁴Ibeni batshwa, nge mbumbiko inonga ye Ndzimu mu ndulamo ye malebeswa ne buyengemali.

²⁵Ndizo mmwe ne mmwe, alebe malebeswa ne wakabakidzana naye aletje manyepkhwa, ngobe tose ti ndungululo dze mbili nng'ompela.

²⁶Muti magwadzamoyo, musiletjedzele kugwadzamoyo kwenyu kukamuthamisa tjibi, kakale musigwadzemoyo kuswikila kumila kwe zhuba.

²⁷Musipe Satani tjibaka.

²⁸Mbava ngaisitjakwibe, koga ngaishinge nshingo wakalulwama nge maboko ayo, kuti ndizo ipebo basina.

²⁹Musiletje ndebo mbiimbi dzikabhuda mu milomo yenyu, koga kubhude ndebo dzakalulwama kusimisa bamwe koga, sekwa kunowobe kushakika, kuti banodzihwa dzibabumbe.

³⁰Musihwise zogwadza Meya yakayengemala ye Ndzimu yamakatjwayiwa ndiyo guli lutjwayo gwe zhuba le kudzutunugwa.

³¹Shungu yose ne bushongola ne kugwadzamoyo ne kulongelana zhoba ne kutjinyana mazina ne kubengana kose, kose kubhude mu muli.

³²Muthamilane buthu, mube ne mimoyo minyolo, muzwiibhatilana milandu, Ndzimu sekwa wakamuzwiibhatigwa muna Kirisiti.