Read Kalanga Baefeso 5 Bible Online

Baefeso 5 - Kalanga bible

Baefeso 5

¹Ndizo kee ibeni bayedzi be Ndzimu, se bana banodika.

²Mutjilile mu ludo, koga sa Kirisiti akatida, kapa butjilo gugwe ku Ndzimu nge kwedu, guli tjipo ne tjibhayilo tje motsha kunli.

³Koga kuwalilana thobo kusakalingisana ne kuwalilana kunobhatisa shoni ne bugovu, zwisitongohwika zwili mu muli, ngobe azwizofanila bayengemali.

⁴Kusibe ne ndebo dzinobhatisa shoni kene zwilebo zwe bulengwe kene kudadilana kunotukana kwe bulengwe, ngobe kose ikoku akuzofanila, koga ngakube ne kutenda.

⁵Muzibe kuti akuna nthu unowalilana kusakalingisana kene unowalilana kunobhatisa shoni kene una tjiba, unonga nthu unonamata midzimu unowana gobe mu bushe gwa Kirisiti ne gwe Ndzimu.

⁶Kushaye unomutjebela nge matama asi iwo, ngobe ndi nge zwithu zwakajali zwinothama kuti bushongola gwe Ndzimu gudelukile bathu basingauhwe.

⁷Ndizo musishingidzane nabo.

⁸Makatongobe muli zhalima, koga ngwenu mabe tjedza[2] muna She. Tjilani se bana be tjedza,

⁹ngobe mbuzilo ye tjedza inowang'wa mu tjimwe ne tjimwe tjakalulwama ne tjina malebeswa kakale

¹⁰mugwisile kuzwidiya zwithu zwinoshathisa She.

¹¹Musi yendidzane ne mishingo isina mbuzilo ye zhalima, koga muidusile patjena.

¹²Ngobe kobhatisa shoni, na iko kuleba zwabanoshinga pakasumbikala.

¹³Koga tjimwe ne tjimwe tjinodusigwa patjena nge tjedza tjoboneka,

¹⁴ngobe tjimwe ne tjimwe tjinodwila patjena i tjedza. Ndizo kuyi, “Muka, iwe wakayizela, muka mu bafi, ngobe Kirisiti unowokupenyela.”

¹⁵Ibeni ne njele kuti motjila tjini, kusi se basakatjenjela, koga se bakatjenjela,

¹⁶mushingisa zubuyanana tjibaka tjimwe ne tjimwe, ngobe iyawa mazhuba mabi.

¹⁷Ndizo musibe manaba, koga hwisisani kuti kuda kwa She ini.

¹⁸Musilaladzisiwe nge nkumbi we zhambi, ngobe ikoku kokwebela ku budakwa. Koga zhalani Meya yakayengemala.

¹⁹Imbani mose Njimbo, imbani njimbo dzinokudza Ndzimu nenge njimbo dze tjimeya. Mbilani She nge mimoyo yenyu yose.

²⁰Muboke misi yose ku Ndzimu Tate ngekwe tjimwe ne tjimwe, nge zina la She wedu Jesu Kirisiti.

²¹Mube ne kuzwiyisilana pasi pakati kwenyu, ngobe moteta Kirisiti.

²²Bakadzi, muzwiyise pasi kwe balume benyu, se kuna She.

²³Ngobe nlume nsholo we nkadzi, sa Kirisiti ali nsholo we gubungano mbili uwe, kakale ndiye Ntjidzi wawo.

²⁴Se gubungano lizwiyisa pasi kuna Kirisiti, ndizo bakadzibo ngabazwiyise pasi ku balume babo, mu tjimwe ne tjimwe.

²⁵Balume, idani bakadzi benyu, sa Kirisiti akada gubungano, kakale kalifila,

²⁶kuliyengemadza nge kulisuka nge vula nenge dama,

²⁷kuti alizwiamutjilile mu kunaka kwalo kose, lisina shambgwa lisakashweshwana, kakale lisina tjimwe itoyi, koga lakayengemala lisina nlandu.

²⁸Sa ikoko balume bakafanila kuda bakadzi babo se mibili yabo. Iye unoda nkadzi uwe unozwida.

²⁹Akuna wakatongoshima mbili uwe, koga unoujisa kautjengeta, sa Kirisiti ethama ku gubungano,

³⁰ngobe ti ndungululo dze mbili uwe.

³¹“Ngekwa ikoku, nlume unowosiya tate babe na mmeyabe kabhatana ne nkadzi uwe, ngono ibaba babili banowobe mbili nng'ompela.”

³²Oku masazibgwe makulu kwazo, ngono ati ikoku ndokufanisa na Kirisiti ne gubungano.

³³Nenguba kwakajalo mmwe ne mmwe wenyubo, ngaade nkadzi uwe sekwa anozwida, nkadzi iye wakafanila teta nlume uwe.