Read Kalanga Baefeso 6 Bible Online

Baefeso 6 - Kalanga bible

Baefeso 6

¹Bana, ihwani bazwadzi benyu muna She, ngobe oku kwakalulwama.

²“Teta tate babo na mmeyabo,” oku nlayo we kutanga una kugadziwabgwe,

³“Kuti ndizo ululwamigwe nge butjilo nenge kuti utjile butjilo bulefu mu shango.”

⁴Botate, musishongole bana benyu, koga mubakudzile mu kudiya ne kulaya kwa She.

⁵Balanda, ihwani botetshi benyu be shango, mubatje kakale mubatetema nge moyo nng'ompela, sekwa mungahwa Kirisiti.

⁶Kusi kuti mubahwe nge kubabona nge mesho mushaka kubashathisa, koga mubahwe se balanda ba Kirisiti muthama kuda kwe Ndzimu nge mimoyo yenyu yose.

⁷Nge mazwimisilo akalulwama shingani se munoshingila She, kusi nthu,

⁸ngobe moziba kuti mu nshingo mmwe ne mmwe wakalulwama, kene uli upi mowouwanila mbhayilo kuna She, kene unlanda kene wakasununguka.

⁹Botetshi, shingilani balanda benyubo muijalo, letjani kubadziyidza. Muzibe, kuti iye She wabo, kakale ali She wenyu u kudzimu ngono aatoshalaula.

¹⁰Gwe bupelo, simani muna She ne mu simba lile gulu.

¹¹Ambalani zwiambalo zwe ngwa zose zwe Ndzimu kuti ndizo muzwigwile mu butjengedzi gwa Satani,

¹²ngobe ngwa yedu aizolingisana ne nyama ne malopa, koga yakalingisana ne babusi ne balauli ne masimba e zhalima anolaula shango ino, nenge meya mibi mu magalo ekudzimu.

¹³Ndizo ambalani zwiambalo zwe ngwa zose zwe Ndzimu, kuti zhuba le mbipo liti lizha muzwigwile, kakale mutimagwa ngwa yose, mume makasima.

¹⁴Imani makasima makazwilulwamisa, makazwisunga thunji nge malebeswa ali mwandabula mu thunji dzenyu, makaambala tjivikili* tje ndulamo mu ifuba,

¹⁵ne makumbo enyu akambadziwa kuzwilulwamisa kuleba ndebo mbuya ye mbakiso.

¹⁶Pezhugwi kwa ikoku, tolani thebe ye kugalamoyo, yamungadzimisa misebe inothuta ye mbi.

¹⁷Mbalani tjivikili tje jidzo mu nsholo ne thumo le Meya, ilo dama le Ndzimu.

¹⁸Tembezelani misi yose mu Meya, nge mitembezelo yose yakasiyanasiyana. Tjengetani kakale mudwilile mutembezelela bayengemali bose misi yose.

¹⁹Munditembezelelebo kuti ha ndizhula nlomo wangu koga, ndipiwe matama, akalulwama kuti ndizo nge kusatja, ndizibise bathu masazibgwe e ndebo mbuya,

²⁰yandili mmilili wayo mu busungwa. Tembezelani kuti, dzene ndingaileba sekwa ndakafanila, ndisingatje.

²¹ Tikikasi ikamu tjinodika, kakale ali nlanda unogagwabgwe muna She, unowomubudza tjimwe ne tjimwe, kuti ndizo namwibo muzibe kuti ndomuka tjini nenge kuti ndoshingani.

²²Nditjo tjandantumila kumuli, kuti muzibe mamuko edu ne nge kuti amukulumbidze.

²³Kunyalala ngakube ku zwikamu ne ludo guna kugalamoyo kunodwa ku Ndzimu Tate na She wedu Jesu Kirisiti.

²⁴Ngoni dze Ndzimu ngadzibe kuna bose banoda She wedu Jesu Kirisiti nge ludo gusingame.