Read Kalanga Bafilipi 1 Bible Online

Bafilipi 1 - Kalanga bible

Bafilipi 1

¹Ndimi Paulo, ndina Timoti, tili balanda ba Kirisiti Jesu. Ku bayengemali* bose muna Kirisiti Jesu bamu nzi we Filipi ne badiyi ne batiyakoni be gubungano:

²Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.

³Ndoboka Ndzimu wangu misi yose ha ndimukumbula.

⁴Tjibaka tjimwe ne tjimwe tjandinomutembezelela, ndotembezela nge kushatha,

⁵ndiboka sekwa makabhatana nami mu nshingo we ndebo mbuya, kudwa mu zhuba le kutangisa kowoti ngwenu,

⁶ndina malebeswa e kuti iye wakatangisa nshingo wakanaka mu muli, unowoupedzisa mu zhuba la Kirisiti Jesu.

⁷Kwakandilulwamila kuzwihwa sa ikoku nge kwenyu mose, ngobe mumu moyo wangu misi yose. Mose makashanganila ngoni dze Ndzimu nami, kose mu busungwa gwangu ne mu kuvikilila ne kusimisa ndebo mbuya.

⁸Ndzimu ntendeki wangu, kuti ndoyemula kumubona mose kwazo nge ludo gwa Kirisiti Jesu.

⁹Ngono ntembezelo wangu hwuti, ludo gwenyu gudwilile gupaphidzike ne zibo nenge kuhwisisa nge buzhalo,

¹⁰kuti ndizo mutubule kushalula tjakalulwama kupinda zose, ngono mube bakatjenapala musibe ne nlandu mu Zhuba la Kirisiti,

¹¹mowowang'wa muna mitjelo izhele ye ndulamo inozha ndi Jesu Kirisiti kukudza ne kulumbidza Ndzimu.

¹²Ndoshaka muziba etji zwikamu, zwakandishingikalila zwakabhatsha kuandamisa ndebo mbuya.

¹³Ngono ngekwa ikoku, babhayani bose pano ne bamwe bose banoziba kuti ndi mu busungwa ngekwa Kirisiti.

¹⁴Bunjinji gwe zwikamu, bakasimisiwa muna She nge busungwa gwangu, kakale batjibe nge tjilopa kuleba dama le Ndzimu basingatje.

¹⁵Malebeswa hwukuti bamwe banosumikila Kirisiti nge ndandala nenge kukakabadzana, koga bamwe banonsumikila nge mazwiwo akalulwama.

¹⁶Aba banokuthama nge ludo, ngobe beziba kuti Ndzimu wakandipa nshingo we kuvikilila ndebo mbuya.

¹⁷Ibabo bamwe banosumikila Kirisiti nge kushaka kuzwishingila bali boga kusi nge moyo wakalulwama beshaka kundidziyidza kunjinji mu busungwa gwangu.

¹⁸Apa koti tjimwe kene? Kene Kirisiti unosumikigwa nge zila ipi kene ipi, yakabipa kene ye malebeswa, ngono ngekwa ikoko ndoshatha. Ee ndowoshatha,

¹⁹ngobe ndoziba kuti nge mitembezelo yenyu nenge bhatsho ye Meya ya Jesu Kirisiti, ikoku kowoshanduka kukandisunungula.

²⁰Sekwa ndinoyemula, kakale ndigalabgwe kuti anditowobhakhwa nge shoni mu nshingo wangu, koga nge kulebeleka ndakasimisamoyo sekwa ndagala ndithama, Kirisiti unowokudziwa mu mbili wangu; kene kuli nge butjilo kene nge lufu.

²¹Ngobe kundili kutjila ndi Kirisiti, kufa imbuzilo.

²²Koga ha ili kuti kutjila ndiko kuna nshingo una mbhayilo, ipapo anditoziba kuti ndingashalula kupi.

²³Ndi pakati kwe mikumbulo mibili, ndoyemula kuthubukana nge butjilo ndikanobe na Kirisiti, ngobe ikoku kobhatsha kwazo.

²⁴Koga kube nditjatjila mu nyama kosheteka kupindisa, kuti mubhatshike.

²⁵Ndogalamoyo ndi ikoku, ndoziba kuti ndowotjila, ngono adwilila namwi mose, ndithamila ikoku kudwilila mbeli kwenyu ne kushatha mu kugalamoyo,

²⁶koyita kuti mundili mube nge tjamungazwikudza nditjo muna Kirisiti Jesu ngekwe kuzha kwangu kumuli kakale.

²⁷Tjikulu hwuti, zila ye butjilo gwenyu ngaiyendilane ne ndebo mbuya ya Kirisiti, kuti ndizo kene ndizha kuwomubona kene ndisipo, ndihwe nge kwenyu kuti makabhata makasimisa nge meya ing'ompela ne nkumbulo nng'ompela mugwisila kugalamoyo kwe ndebo mbuya,

²⁸musingatje tjimwe mu zwita zwenyu, woku tjilakidzo ku bali tje kulobesiwa kwabo, koga tje jidzo lenyu, linodwa ku Ndzimu.

²⁹Ngobe makakupiwa kuti, ngekwa Kirisiti musigalemoyo munli koga, mudziyilebo nge kukwe,

³⁰muli mu ngwa iyozwayo yamakabona, koga ngwenu muhwa kuyi ndi muili.