Read Kalanga Bafilipi 2 Bible Online

Bafilipi 2 - Kalanga bible

Bafilipi 2

¹Ndizo ha ili kuti kuna kukulumbidza muna Kirisiti, ne nyaladzo mu ludo gugwe, ne kukobana ne Meya, ne moyo nyolo ne kuhwila zogwadza,

²zhadzisani kushatha kwangu nge bung'ompela mu nkumbulo, muna ludo gung'ompela ne meya ing'ompela ne nkumbulo nng'ompela.

³Musishinge tjimwe nge kuzwikumbulila koga kene kuzwikudza, koga mu kuzwiyisa pasi, tolani kuti bamwe banoyita pamuli.

⁴Mmwe ne mmwe wenyu ngaasilinge zwinonshathisa koga, koga ngaalinge ne zwinoshathisa bamwe.

⁵Ibeni ne njalakang'wa edzi mu muli, idzo dzamunadzo muna Kirisiti Jesu:

⁶Iye wakati ali Ndzimu, kasitole kulizana ne Ndzimu, ili tjimwe tjingagala tjakanamatigwa

⁷koga wakasiya kose kukwe, kangina mu bulanda kabe mutjifano tje bathu.

⁸Ngono kati awanika ali mu tjifano tje nthu kazwiyisa pasi, kabe unohwa kudzina engina mu lufu, igo lufu mu tjileyanyo dumbu.

⁹Ndizo Ndzimu wakammilidzila pezhugwi kwazo, ukampa zina lipezhugwi, zina linopinda limwe ne limwe,

¹⁰kuti ndizo nge zina la Jesu zwidwi zose zwithigame, kudzimu ne mu shango na pasi,

¹¹ne lulimi gumwe ne gumwe gulebe, kuti Jesu Kirisiti ndi She, kukudza Ndzimu Tate.

¹²Ndizo badiwa bangu, sekwa magala mundihwa, kusi ndili yapo koga ne mu busipo gwangu mundihwe kupinda, mushingile tjidziwa kwenyu nge kutja nenge kutetema,

¹³ngobe Ndzimu unoshinga mu muli, kuthama kuti mutubule kushingila ne kushaka kushathisa iwo.

¹⁴Shingani tjimwe ne tjimwe musingang'ong'ole kene kuli kukakabadzana,

¹⁵kuti ndizo musibe ne nlandu, mube babuyanana, muli bana be Ndzimu basina itoyi pakati kwe tjizekugwana tjakakombama tjakabipa kwazo. Mopenya pakati kwabo, muli tjedza mu shango,

¹⁶makabhatisisa dama le butjilo, kuti ndizo mu zhuba la Kirisiti ndizwikudze kuti, andizolabukila suli kene kushingila suli.

¹⁷Nenguba malopa angu angadigwa pezhugwi kwe tjibhayilo tje kugalamoyo kwenyu, ndakashatha, ndopululudza namwi mose.

¹⁸Sa ikoko namwibo makafanila mushathe, mupululudze nami.

¹⁹Ndogalabgwe muna She Jesu, kuti ndowotuma Timoti kumuli tjinyolotjo, kuti ndizo ndikulumbidziwe nge thawu nge kwenyu.

²⁰Andina mmwe unonga iye, ungabe ne hanya namwi nge malebeswa.

²¹Akuna wandinaye unonga iye, bose banogwisila njemulo dzabo koga, dzisi dza Jesu Kirisiti.

²²Koga moziba sekwa akazwilakidza tjaali itjo. Wakashinga nami mu ndebo mbuya, se nthu ne nkololo uwe.

²³Ndizo ndogalabgwe kuntuma tjinyolotjo ha ndabona kuti tjimo ini nge kwangu.

²⁴Ndogalamoyo muna She kuti nami ndowozha ikoko tjinyolotjo.

²⁵Ndakakumbula kuti kwakafanila kutuma Epafurodito ikamu tjangu, kakale ali nshingi nami. Ti babhayani tose, iye ntumwa wenyu wakandibhatsha muna zwandinosheta.

²⁶Wakabe akamushuba mose, ngono ali mu buyendasi, ngobe makahwa kuti wakabe egwala.

²⁷Dumbu wakagwala, kashoko fa kabuya patukununu, koga Ndzimu wakanhwila zogwadza. Kusi iye koga, namibo kuti buyendasi gusi tathikane ne gumwe buyendasi.

²⁸Ndakatukutilila kuntuma, kuti mushathile kumbona kakale nenge kuti pamwe ndisidziyidzike kwazo.

²⁹Ndizo mun'amutjile muna She nge kushatha kose, mutete bathu bakajali,

³⁰ngobe wakashoko be afa, efila nshingo wa Kirisiti, elonga butjilo gugwe mu mbatsha, kuwidza nshingo wenyu kundili.