Read Kalanga Bafilipi 3 Bible Online

Bafilipi 3 - Kalanga bible

Bafilipi 3

¹Tje bupelo zwikamu zwangu, shathani muna She. Ate ali mang'oni ku ndili, kumukwalila zwithu izozwazo kakale akuna mbatsha kumuli.

²Muzwitjengete mu mbgwa, muzwitjengete mu bashingi be bubi, muzwitjengete muna banopalulanya mbili.

³Ngobe ndiswi buthumbi gwe malebeswa, iswi tinothigamila Ndzimu nge Meya yawo, tizwiloba ifuba muna Kirisiti Jesu. Atitogalabgwe mu mishingo ye tjinyama;

⁴nenguba imi nge kwangu ndina tjandingagalabgwe mutjili tje tjinyama. Ha kuli kuti kuna unatjaangagalabgwe mutjili tje tjinyama, imi ndingagalabgwe kupinda.

⁵Ndakathumbigwa mu zhuba le buzhanakadzi le kuzwagwa kwangu. Ndi N'iziraela ngozwagwa, we ludzi gwa Bhenjamini, Nhebheru, wakazwagwa nge Bahebheru; ngekwe kulondolodza nlayo, ndi Nfarasi;

⁶ngekwe kutukutilila, ndakabe ndatukutilila kudziyidza bagalimoyo; ngekwe kuwana ndulamo kwe Ndzimu mu kulondolodza nlayo, andina nlandu.

⁷Koga mbuzilo kene ili ipi yandakabe ndinayo, ndoyitola ili ndashikilo ngekwa Kirisiti.

⁸Nge malebeswa ndotola tjimwe ne tjimwe ili ndashikilo, ngobe luzibo gwandinago ngekwa Kirisiti Jesu She wangu gopinda zwithu zose. Nge kukwe ndakalashikigwa nge zwithu zose, ngono azwitola zwili malala, kuti ndizo Kirisiti abe mbuzilo kundili,

⁹kuti kakale ndiwang'we munli, ndisina ndulamo nge kwangu yakatemelela mu nlayo, koga ndibe ne ndulamo ye Ndzimu nge kugalamoyo muna Kirisiti. Iko kudumila kunodwa ku Ndzimu, kunoshaka kugalamoyo,

¹⁰kuti ndizo ndizibe Kirisiti ne masimba e kumuka kukwe ne kudziyidzika mu kubhatana naye, ndifanana naye mu lufu gugwe,

¹¹kuti, ha kutubuka, ndimusiwe mu bafi.

¹²Anditodwa kuti ndakatubula kale kene kuti ndakatjilulwama. Ndodwilila ndigwisa kuwana mbhayilo, ngobe Kirisiti Jesu wakandithama abe uwe.

¹³Zwikamu, anditokumbula kuti imi ndauwana kale; koga tjing'ompela tjandinothama, hwukangang'wa tjishule kwangu ndibe ndigwisila kuswika kuna tji mbeli.

¹⁴Ndodwilila ndigwisila kunowidza lubilo, kuti ndiwane mbhayilo wandakadanigwa kudzimu nge Ndzimu muna Kirisiti Jesu.

¹⁵Tose bakakula tjimeya ngatibeni nge nkumbulo wakajalo. Koga ha mukumbula nge zila ipoga ngekwa ikoku, Ndzimu unowomuzumbunulila ikokubo.

¹⁶Koga ngatitjilileni mu malebeswa atakawana.

¹⁷Zwikamu, dwililani mube bayedzi bangu, mulingilile ibabo banolondolodza tjilakidzilo tjatakamupa.

¹⁸Ngobe banjinji bandakamubudza nge kwabo kanjinji, ngono na ngwenu nditjamubudza ngekwabo nge mishodzi, banotjila se zwita zwe tjileyanyo tja Kirisiti.

¹⁹Bhelelo labo hwuloba, Ndzimu wabo ntumbu wabo, ngono banozwikudza nge tjabakafanila kubhatigwa nge shoni. Mikumbulo yabo imu zwithu zwe shango.

²⁰Koga bugalo gwedu gu kudzimu, kakale takalindila Ntjidzi kudwako, iye She Jesu Kirisiti,

²¹iye unowoshandula mibili yedu isakasima kuti inge mbili uwe we kukudziwa, nge simba linontubulisa kuyisa zwithu zose pasi kukwe.