Read Kalanga Bakolosa 2 Bible Online

Bakolosa 2 - Kalanga bible

Bakolosa 2

¹Ndoshaka kuti muzibe kuti ndomushingila kuli kungapani, kose neba ku Laodikeya na bose basathu bakabona tjiso tjangu,

²kuti mimoyo yabo ikulumbidzike se bakabhatana mu ludo, kuti ndizo babe ne fumwa ye kuhwisisa nge buzhalo kakale babe ne luzibo gwe masazibgwe e Ndzimu, Kirisiti nge kukwe,[3]

³munli kwakasumbikwa matula e butjenjedu ne luzibo.

⁴Ndomubudza ikoku kuti ndizo kushaye wamutjengela nge ndebeleko ye bupitipiti.

⁵Ngobe nenguba ndisipo pamuli nge kwangu, ndi namwi mu meya, ngono ndoshatha kubona sekwa muli gedzikane kakale ne nge kugalamoyo kwenyu kwakasima muna Kirisiti.

⁶Ndizoke, sekwa makaamutjila Kirisiti Jesu ali She, tjililani munli,

⁷makadzikigwa munli kakale makabakwa munli, mukasimisiwa mu kugalamoyo sekwa makadiyiwa, muboka nge buzhalo.

⁸Muyele njele kuti kushete wamutapa nge ndebeleko dze butjenjedu gwe bathu guzhele butjengedzi, gunodwa mu zwilenje zwe bathu, zwinodwa mu meya inolaula lubumbo igogu, ngono zwisingadwe muna Kirisiti.

⁹Mbumbiko yose ye Ndzimu nge buzhalo igele mu mbili wa Kirisiti.

¹⁰Ndizo mu kubhatana na Kirisiti makapiwa butjilo nge buzhalo, iye nsholo we ndaulo yose ne simba lose.

¹¹Munli makathumbigwa kusi nge buthumbi gunothamiwa nge bathu, koga nge buthumbi gunothamiwa ndi Kirisiti, gunodwa kusunungugwa kwenyu mu mbumbiko ye nyama.[4]

¹²Mu kudubikiwa makabiganyiwa na Kirisiti kakale mukamusiwa naye nge kugalamoyo kwamunako mu simba le Ndzimu, iwo wakammusa mu bafi.

¹³Ngono imwi makatongobe makafa nge matjinyo enyu ne mukusathumbigwa kwe mibili yenyu.[5] Ndzimu wakamuthama batjili mose na Kirisiti, shule kwe kutizwiibhatigwa zwibi zwedu zose.

¹⁴Wakabukusha nkwalo we milandu yedu ne milayo inosunga kaidusa tjose nge kuikothomela mu tjileyanyo.

¹⁵Ndzimu wakakunda babusi ne balauli, wakabadusila patjena nge kubakunda muna Kirisiti.[6]

¹⁶Ndizo musidumile ani kene ani kuti amutilike nlandu ngekwe zojiwa ne zwing'o ne misi ye mizano kose ne Nzano we Mwedzi ntshwa kene zhuba le Sabata.

¹⁷Ezwi mitutshi ye zwithu zwinozha, ngono koga lebeswa lowang'wa muna Kirisiti.

¹⁸Musitongo letjedzela ani kene ani kamuthama kuti mudume zwidiyo zwe manyepkhwa zwe kunamata batumwa be kudzimu ngoti kungathama kuti musiwane mbhayilo wenyu. Nthu unodiya saikoku wakabiga masimba awe kudiya nge zwaanobona zwe manyepkhwa, unozwikudza nge mikumbulo iyeyo yaanozwibumbila, koga nge lebeswa aana tjaangazwikudza natjo,

¹⁹asakabhatilila muna Kirisiti, iye nsholo iwo unobhatshanya mbili nge tshinga kakale mbili unotjidziwa nge nsholo, ndizo mbili unokula nge kukula kunodwa ku Ndzimu.

²⁰Ha makafa na Kirisiti, ku meya ye lubumbo, ini mutjila se ungati mutji bathu be shango kene? Ini mulondolodza milayo yayo inoti,

²¹“Usibhate etji! Usilabile woku! Usikuthe hwokuje?”

²²Milayo yose iyeyi yakalingisana nge zwithu zwinotjimbidza kupela ha zwishingisiwa; milayo inothamiwa nge bathu kakale ikadiyiwa nge bathu.

²³Milayo iyeyi inolingika se butjenjedu nge kuzwibigila milawana ye bululwami kuzwiyisa pasi kunozwithamigwa ne nge kuhwisa mbili zogwadza kwakapindilila ili zila ye kunamata Ndzimu; ngono azwitobhatsha nthu mu njemulo mbi dzakapindilila dze mbili.