Read Kalanga Bakolosa 4 Bible Online

Bakolosa 4 - Kalanga bible

Bakolosa 4

¹Botetshi, bhatani balanda benyu nge zila yakalulwama kakale nge kulizalizana, ngobe moziba kuti namwibo muna Tetshi kudzimu.

²Dwililani makasimisila mu ntembezelo, mumuse moyo ha mutembezela, muboka Ndzimu.

³Mutitembezelelebo kuti Ndzimu batipe tjibaka tje kuti tilebe masazibgwe a Kirisiti, ngobe ndiwo andakasungigwa.

⁴Tembezelani kuti ndialebe nge kunohwisisika sekwandakafanila leba.

⁵Muzwibhate nge zila inolakidza butjenjedu kuna ibabo basi bagalimoyo ngono mushingisa zubuyanana tjibaka tjimwe ne tjimwe kulebeleka nabo.

⁶Ndebo dzenyu ngadzibe nge buthu, mube ne lulimi gunozipa, kakale makafanila kuziba shandula mmwe ne mmwe zubuyanana.

⁷ Tikikasi unowomubudza thawu dzose nge kwangu. Iye ikamu tjinodika, nshingi unogalikabgwe, kakale nlanda naswi muna She.

⁸Tjandinontumila kumuli ndi etji, kuti muzibe tjimo tjedu ne kuti mukulumbidzike mu mimoyo yenyu.

⁹Unowozha na Onesimasi ikamu tjedu tjinogalikabgwe kakale tjinodika. Iye mmwe wenyu. Banowomubudza tjimwe ne tjimwe tjinoshingikala ngeno.

¹⁰Nsungwa nami Arisitako, unomudumilisa kose na Mako ikamu tja Bhanabhasi. Makabudziwa nge kukwe kale; ndizo ha kuli kuti ungazha kumuli, mun'amutjile.

¹¹Jesu, unodang'wa Jusito, unomudumilisabo. Ndibo koga Bajuta mu bagalimoyo muna Kirisiti banoshinga nami, tishingila bushe gwe Ndzimu ngono bakandinyaladza kwazo.

¹²Epafurasi mmwe wenyu kakale ali nlanda wa Kirisiti Jesu unomudumilisabo. Unogala emutembezelela nge moyo uwe wose kuti ndizo musimisile nge luzibo guzhele musingadudumwe mu kuda kwe Ndzimu kose.

¹³Ndopa butendeki nge kukwe gwe kuti wakamushingila akasimisa ne ba ku Laodikeya ne ba ku Hiyerapolisi.

¹⁴N'diwa wedu Luke we ng'anga na Demasi, banomudumilisa.

¹⁵Dumilisani zwikamu zwimu Laodikeya, na Nimfa ne gubungano linoshanganila mu nzi uwe.

¹⁶Ha mabaligwa lukwalo igogu, thamani kuti gubagwebo mu gubungano le Balaodikeya, imwibo mubale lukwalo gunodwa ku Laodikeya.

¹⁷Muti kuna Akipo, “Ubone kuti unopedza nshingo wawakapiwa mu kushingila She.”

¹⁸Imi Paulo, ndokwala dumiliso iyeyi nge gwangu luboko. Kumbulani busungwa gwangu. Ngoni dze Ndzimu ngadzibe namwi.