Read Kalanga 1 Batesalonika 1 Bible Online

1 Batesalonika 1 - Kalanga bible

1 Batesalonika 1

¹Ndimi Paulo, ndina Silivano,[1] na Timoti. Ku gubungano le Batesalonika mu Ndzimu Tate na She Jesu Kirisiti: Ngoni ne kunyalala ngakube namwi.

²Toboka Ndzimu misi yose nge kwenyu mose, timutembezelela mu mitembezelo yedu.

³Togala tikumbula mbeli kwe Ndzimu Tate bedu, nshingo wenyu unozwagwa nge bugalimoyo, kushinga kwenyu kukulu kunozwagwa nge ludo nenge kusimisila kwenyu kunozwagwa nge kugalabgwe muna She wedu Jesu Kirisiti.

⁴Zwikamu zwinodiwa nge Ndzimu, toziba kuti wakamushalula,

⁵ngobe ndebo mbuya yedu aizozha kumuli nge matama koga, yakazha nge masimba nge Meya yakayengemala nenge kuduma kwakapelela. Moziba sekwa takabe tizwiibhata tili gele pakati kwenyu tithamila imwi.

⁶Makabe bayedzi bedu ne ba She; nenguba makabe ne kudziyila kukulu, makaamutjila dama nge kushatha kunodwa mu Meya yakayengemala.

⁷Ndizo makabe tjilakidzilo ku bagalimoyo bose be Makedoniya ne Akaiya.

⁸Ngobe dama ngekwa She alizoti kubhuda mu muli, likazibgwa mu Makedoniya ne Akaiya koga, lakazibgwa kumwe ne kumwe nenge zila yamakabe mu kugalamoyo ndiyo mu Ndzimu. Ndizo akutjina tjatingaleba nge kwako,

⁹ngobe ibo nge kwabo banoleba nge sekwa makatiamutjila nenge sekwa makaletjedza thigamila midzimu, ngono motjithigamila Ndzimu unotjila, wakwako,

¹⁰nenge kulindila kuzha kwe Nkololo wawo edwa kudzimu, iye wawakamusa mu bafi. Jesu iye unotiangulila mu bushongola gonozha.