Read Kalanga 1 Batesalonika 3 Bible Online

1 Batesalonika 3 - Kalanga bible

1 Batesalonika 3

¹Ndizo takati tibona tikong'wa, tikayemula kuti tisale toga mu Atene.

²Takatuma Timoti ikamu tjedu, nshingili we Ndzimu naswi mu kusumikila ndebo mbuya ya Kirisiti, kumusimisa nenge kumukulumbidza mu bugalimoyo gwenyu,

³kuti ndizo kushaye unosagadzikanyiwa nge ndiko idzedzi. Moziba zubuyanana kuti ikoku kwakatilingisana.

⁴Nge malebeswa takati tinamwi, takabe timubudza lubaka gutjipo kuti towodziyidziwa; ngono sekwa munoziba, nditjo tjakashingikala.

⁵Ndizo ngekwa ikoku ndakati ndibona kuti andingatjatubule kudzikitadza, ndakatumila nthu ndida ziba sekwa munotjila mu bugalimoyo gwenyu. Ndidziyidzika mu meya ndialakana kuti pamwe nliki wakamulika, ngono nshingo wedu ukasibe ne mbhayilo.

⁶Koga se Timoti akatjibuya edwa kumuli ngono katizhisila thawu dzakanaka ngekwe bugalimoyo nenge ludo gwenyu, wakatibudza kuti tjibaka tjose motikumbula nge kwakanaka nenge kuti makashuba kutibona, se naswibo takamushuba.

⁷Ndizo ngwenu zwikamu, mu buyendasi gwedu ne kudziyidziwa, takakulumbidzika nge kwe bugalimoyo gwenyu.

⁸Ngobe ngwenu tozwihwa titjila dumbu, ngoti mumile makasima muna She.

⁹Apa tingaboka Ndzimu kungapani nge kwenyu, ngekwe kushatha kose kwatinako nge kwenyu mbeli kwe Ndzimu wedu kene?

¹⁰Siku ne sikati totembezela nge kugalamoyo, kuti titubule kumubona kakale kuti ndizo timupe tjamunosheta mu kugalamoyo kwenyu.

¹¹Tshene Ndzimu wedu, ibo Tate nge kwabo na She wedu Jesu bangatizhulila zila kuti tizhe kumuli.

¹²Tshene She bangayita kuti, ludo gwenyu gupaphidzike, kuswikila mudana kwazo, kakale mudzine mude bathu bose sekwa tinomuda iswi.

¹³Tshene bangasimisa mimoyo yenyu mu buyengemali, kuti ha She Jesu ezha ne bayengemali[2] babe musibe ne nlandu mbeli kwe Ndzimu wedu, kakale bali Tate bedu.