Read Kalanga 1 Batesalonika 4 Bible Online

1 Batesalonika 4 - Kalanga bible

1 Batesalonika 4

¹Tjebupelo zwikamu, tomukumbila kakale timukulumbidza muna She Jesu, kuti sekwa makazwidiya mutili kutjila ne kushathisa Ndzimu, tomukulumbidza kuti sekwa munothama, mudwilile kunopinda ikoku.

²Ngobe moziba ndayo dzatakamupa nge simba la She Jesu.

³Kuda kwe Ndzimu hwuti mube bayengemali, muletje kuwalilana thobo kuzhe kwe ndobolo,

⁴mmwe ne mmwe wenyu, wakafanila kuziba kutjila ne nkadzi uwe[3] nge zila yakayengemala ina ntutshi,

⁵kusi nge njemulo dzakabipa dze kuwalilana, sekwa kunoyita basingagalemoyo, basingazibe Ndzimu.

⁶Ngakushaye unotjinyila kene katjebela ikamu tjitje ngekwe zwithu zwakajalo. She banowoloba bathu ngekwe matjinyo wose akajalo, sekwa takamubudza tikamutjemela kale.

⁷Ngobe Ndzimu auzotidanila kuti tibe ne shambgwa, koga kuti titjile butjilo gwakayengemala.

⁸Ndizo iye unolamba ndayo idzedzi, aatolamba nthu, koga unolamba Ndzimu, iwo unomupa Meya yawo yakayengemala.

⁹Ngwenu ngekwe ludo pakati kwe zwikamu, akutosheteka kuti tingamukwalila, ngobe imwi nge kwenyu, makadiyiwa nge Ndzimu kudana.

¹⁰Nge malebeswa, moda zwikamu zose mu Makedoniya. Koga tomukulumbidza zwikamu mudane kunopinda ikoku.

¹¹Muzwimisile kutjila butjilo gwe kunyalala, ne kushinga mishingo yenyu, mushinga nge maboko enyu koga sekwa takamubudza,

¹²kuti ndizo mutetiwe nge basi badumili, ngekuti musitongo tjila ngopiwa nge bamwe zwamunosheta.

¹³Zwikamu, atitoshaka kuti mugale muli mu zhalima ngekwe banofa, kene kuzhala buyendasi se bathu basina kugalabgwe.

¹⁴Se tigalamoyo kuti Jesu wakafa kakale kamuka, togalamoyo kuti Ndzimu unoti uzhisa Jesu ukazhisilanya naibabo bakafa begalamoyo munli.

¹⁵Ngekwa ikoku tomubudza ngekwe tjinolebgwa nge dama la She, kuti iswi batjatjila, batinowobe tasala kuswikila kuzha kwa She, nge malebeswa atitowotangila ibabo bakafa.

¹⁶Ngobe She nge kwabo banowodeluka kudzimu nge hwi gulu le ndaulo nenge hwi le ntumwa nkulu we Ndzimu nenge nlidzo we lunyanga gwe Ndzimu. Ngono bafi bakafila muna Kirisiti banowomuka kutanga.

¹⁷Shule kwa ikoko, iswi batjatjila bakasala, towoshangana nabo mu makole kushanganidza She mu phepo. Ngono, towogalila tjose na She.

¹⁸Ndizo nyaladzanani nge matama iyawa.