Read Kalanga 1 Batesalonika 5 Bible Online

1 Batesalonika 5 - Kalanga bible

1 Batesalonika 5

¹Ndizo ngwenu zwikamu, akutosheteka kuti timukwalile ngekwe zwibaka nenge misi,

²ngobe imwi nge kwenyu moziba kuti zhuba la She lowozha se mbava busiku.

³Bathu banowoti batjati, “Kuna mbakililo ne kunyalala,” kukolomoka kowobawila se zwibhayo zwe nkadzi wakazwisenga, kakale abana kwabangatizhila.

⁴Koga imwi zwikamu, ate muli mu zhalima, kwamungatjenamisiwa nge zhuba ilelo se mungatjenamisiwa nge mbava.

⁵Mose mu bana be tjedza, kakale mu bana be masikati. Ate tili be busiku, kene be zhalima.

⁶Ndizo ngatisifananeni ne bamwe, bakabhakhwa nge hwope, koga ngatizwitjengeteni tibe ne kuzwibhata.

⁷Ngobe ibabo banoyizela, banoyizela busiku ne banolaladza, banolaladza busiku.

⁸Koga se iswi tili be masikati, ngatibeni nge kuzwibhata, tiambale kugalamoyo ne ludo, zwili tjivikili tje zwifuba zwedu ne kugalabgwe kwe kutjidziwa, kuli tjivikili tje misholo yedu.

⁹Ngobe Ndzimu auzotishalulila kuti tihwe zogwadza zwe bushongola koga wakatishalulila kuti tiamutjile jidzo muna She wedu Jesu Kirisiti.

¹⁰Wakatifila kuti ndizo kene takalinga kene takayizela,[4] titjile naye.

¹¹Ndizo kulumbidzanani kakale mubakane sekwa munothama ngwenu.

¹²Ngwenu tomukumbila zwikamu, kuteta banoshinga bakasima pakati kwenyu, bakamutungamila muna She, kakale bemulaya.

¹³Mubakudze kwazo mu ludo ngekwe nshingo wabo. Ngakube nge mbakiso pakati kwenyu.

¹⁴Tomukulumbidza zwikamu, titi tjemelani ibabo basingashake shinga, simisani magwala, mubhatshe basingatubule, mube ne moyonlefu mu mmwe ne mmwe.

¹⁵Muthame kuti kusibe nge kubgwilizilana bubi nge bubi, koga ibeni nge buthu mu bamwe namwi ne muna bose.

¹⁶Shathani misi yose.

¹⁷Mugale mutembezela,

¹⁸bokani mutjimwe ne tjimwe, ngobe oku ndiko kuda kwe Ndzimu muna Kirisiti Jesu nge kwenyu.

¹⁹Musidzime moto we Meya.

²⁰Musilingile pasi bulebesambeli.

²¹Koga shakisisani tjimwe ne tjimwe kubona kuti kene nditjo. Bhatililani muna kwakalulwama.

²²Leyani bubi gumwe ne gumwe.

²³Dzene tshene Ndzimu we kunyalala nge kwawo ungamuyengemadza nge buzhalo. Dzene tshene meya yenyu ne mibili yenyu ingagala isina nlandu mu kuzha kwa She wedu Jesu Kirisiti.

²⁴Iye unomudana, unogalikamoyo, kakale unowokuthama.

²⁵Zwikamu mutitembezelele.

²⁶Dumilisani zwikamu zose nge kubutjilana kwakayengemala.

²⁷Ndomudwa mbeli kwa She kuti, muyite kuti lukwalo igogu gubaligwe zwikamu zose.

²⁸Ngoni dza She wedu Jesu Kirisiti ngadzibe namwi.