Read Kalanga Joshuwa 13 Bible Online

Joshuwa 13 - Kalanga bible

Joshuwa 13

¹Ngwenu Joshuwa wakabe atjikula kwazo, ngono Yahwe bakan'dwa bakati, “Wakwegula kwazo, ngono kutjina shango isishoma yakafanila tapiwa.

²Shango yasala ndiyeyi: Mituthu yose ye Bafilisitiya neye Bageshuri

³kudwa pa gwizi gwe Shihori ku bhezhuba kwe Egipiti kunoti ku ntuthu we Baekoroni uku bunandzwa, yose ili ye Bakanana yakabe ina bomambo bashanu be Bafilisitiya bakabe begala mu Gaza ne mu Ashidodi ne mu Ashekeloni ne mu Gati ne mu Ekironi we Baavimi,

⁴kudwa ku burwa ne shango yose ye Bakanana ne kudwa mu shango ye Ara we Basidoni kuyenda tjose kunoti ku Afeki ne ntuthu we Baamori.

⁵Ne shango ye Bagebali ne shango yose ye Lebanoni kuyendila ku bhezhuba ne kudwa mu Baligadi kusuphisa Dombo le Hemoni kunoti ku nkoba we Hamati

⁶ne kunoti ku bagali bose be shango ye matombo kudwa mu Lebanoni kunoti ku Misirefotimayimi hwuti bathu bose be Sidoni, imi ndowobatatila kutjena ne bathu be Iziraela. Iwe ubone kuti unokobela shango iyeyi Baiziraela kuti ibe thaka koga sekwa ndakakubudza.

⁷Ndizo ngwenu koba shango iyeyi ibe thaka ku njudzi dzili zhanalume ne gwamu le ludzi gwa Manase.”

⁸Gwamu limwe le ludzi gwa Manase ne ludzi gwa Rubheni ne gwa Gadi ibo bakabe bakakobegwa shango kale yatjibe thaka ku bhezhuba kwe Jorodani ndi Mushe nlanda wa Yahwe,

⁹kudwa tjose mu shango ye Aroeri nzi umu phili ye nkuku we Arinoni ne kudwa mu nzi upakati kwe nkuku kuyenda tjose ku tjibata tjose tje Medeba kunoti ku Diboni

¹⁰ne mizi yose ya Sihoni mambo we Baamori, iye wakabe ebusa mu Heshibhoni kuyenda tjose kunoti ku n'gathu we Baamoni

¹¹ne Giliyadi ne ntuthu we Bageshuri newe Bamaaka ne dombo lose le Hemoni ne shango yose ye Bhashani kuyenda tjose kunoti Salekhahi

¹²hwuti ntuthu wose wa Ogi mu Bhashani iye wakabusa mu Ashitaroti ne Edireyi, ndiye koga wakasala ali limbelimbe le Barefayi. Mushe wakabe abakunda kakale abatolela shango yabo.

¹³Koga Baiziraela abazotata Bageshuri ne Bamaaka, ndizo bakagala ne Baiziraela kuswikila nasi.

¹⁴Be ludzi gwa Levi akuna shango yabakakobegwa kube thaka, ngoti zwipo zwinopisiwa zwipisigwa Yahwe Ndzimu we Iziraela ndizo thaka yabo sekwa Mushe akabagadzabgwe.

¹⁵Mushe wakakobela ludzi gwa Rubheni shango nge misha yabo kube thaka.

¹⁶Ndizo shango yabakakobegwa yakabe itangisa mu Arinoni yakasuphisa phili ye nkuku we Anoni ne kudwa mu nzi upakati kwe nkuku kuyenda tjose ku tjibata tje Medeba,

¹⁷kunoti ku Heshibhoni ne mizi yose yawo imu tjibata: Diboni ne Bhamotibali ne Bhetibalemeyoni

¹⁸ne Jahazi ne Kedemoti ne Mefaati

¹⁹ne Kiriyathayimu ne Sibima ne Zeretishahari mu dombo limu nkuku

²⁰ne Bhethipeori ne shango yakakunguluka ye Pisiga neye Bhetijeshimoti

²¹hwuti mizi yose koga imu tjibata ne mbuso wose wa Sihoni mambo we Baamori, iye wakabusa mu Heshibhoni. Mushe wakabe ankunda kose ne batungamili be Midiya bo Evi na Rekemu na Zuri na Huri na Reba ibo bakabe bali pasi kwa Sihoni kakale begala mu ntuthu uwe.

²²Pezhugwi kwe bakabulawa ne Baiziraela mu ngwa, Baiziraela bakabulaya nge thumo Bhalamu nkololo wa Bheori wakabe ali ngan'ga.

²³N'gathu we ludzi gwa Rubheni wakabe uli gwizi gwe Jorodani. Mizi iyeyi ne mizana yayo yakabe thaka dze bathu be ludzi gwa Rubheni nsha ne nsha.

²⁴Mushe wakakobela ludzi gwa Gadi shango nsha ne nsha sahwoku:

²⁵Ntuthu we Jazeri ne mizi yose ye Giliyadi ne gwamu le shango ye Baamoni kunoti ku Aroeri nzi uku bhezhuba kwe Rabha

²⁶ne kudwa mu Heshibhoni kunoti Ramatimizipa ne Bhetonimu ne kudwa mu Mahanayimi kunoti ku ntuthu we Dibiri

²⁷kose ne nkuku we Betiharamu ne Betinimura ne Sukoti ne Zafoni ne mibuso yose ya Sihoni mambo we Heshibhoni, n'gathu wabo uli gwizi gwe Jorodani kuyendila ku ntuthu kunopelela gungwa gwe Khinereti.

²⁸Mizi iyeyi ne mizana yayo yakabe thaka ye ludzi gwa Gadi nsha ne nsha.

²⁹Mushe wakakobela gwamu le ludzi gwa Manase, hwuti gwamu le nsha we zwizekugwana zwa Manase nsha ne nsha shango sahwoku:

³⁰Ntuthu unotangisa mu Mahanayimi unoshangana ne we Bhashani ne mbuso wose wa Ogi mambo we Bhashani ne mizi yose ya Jairi imu Bhashani, mizi ili makumi ali tathatu,

³¹gwamu le nzi we Giliyadi ne Ashitaroti ne Edireyi mizi ye bushe gwa Ogi mu Bhashani. Mizi iyeyi yakapiwa bathu ba Maki nkololo wa Manase nsha ne nsha.

³²Ndiko Mushe sekwa akakoba shango kube thaka paakabe ali mu Moabu bhezhuba kwe Jerikho seli kwe gwizi gwe Jorodani.

³³Koga be ludzi gwa Levi Mushe akuna tjaakabapa kube thaka ngobe Yahwe Ndzimu we Iziraela wakabagadzabgwe kuti ndibo thaka yabo.