Read Kalanga Joshuwa 16 Bible Online

Joshuwa 16 - Kalanga bible

Joshuwa 16

¹Ludzi gwa Josefa gwakakobegwa nge hakata shango inotangisa pa gwizi gwe Jorodani mu Jerikho, ku bhezhuba kwe vula dze Jerikho, kuyenda tjose kunoti ku tjilambanyika kuyenda ku shango ye matombo kunoti ku shango ye Bhetele.

²Kudwa mu Bhetele kunoti ku Luzi, itola n'gathu we Baariki mu Ataroti,

³idelukila kunomila zhuba kwe n'gathu we Bajafeleti iyenda tjose inoti mu ntuthu we kwakakungulukila we Bhetihoroni ne mu Gezeri inopelela ku gungwa.

⁴Ndizo Manase na Ifureimi bakapiwa shango kuti ibe thaka yabo.

⁵Ntuthu wa Ifureimi nsha ne nsha wakabe uli sahwoku: N'gathu we shango yabakapiwa kuti ibe thaka yabo wakabe uyenda tjose kudwa mu Atarotiadari ku bhezhuba kunoti ku Bhetihoroni,

⁶uyenda unoti ku gungwa, kudwa pa Mikimethati ku bunandzwa upoteleka wakalinga ku bhezhuba kwe Taanatishilo, upinda napo wakalinga ku Janoya ku bhezhuba.

⁷Kudwa ipapo wakabe udwa tjose pa nzi we Janoya kunoti ku Ataroti ne Naara unotigu ku Jerikho unopubuka ku gwizi gwe Jorodani.

⁸Kudwa mu Tapuwa, n'gathu wakalinga ku nkuku we Kana kunomila zhuba unopelela mu gungwa. Iyeyi ndiyo thaka yakapiwa bathu be Ifureimi nsha ne nsha,

⁹kushangana ne mizi ne mizana yakabe ili mu n'gathu we bathu be ludzi gwa Manase.

¹⁰Koga Baifureimi abazotatila kutjena Bakanana bakabe begala mu Gezeri, ndizo Bakanana bakagala ne Baifureimi kuswika nasi koga Bakanana bakabashingila bali balanda bethama tjimwe ne tjimwe tjabanodwiwa.