Read Kalanga Joshuwa 20 Bible Online

Joshuwa 20 - Kalanga bible

Joshuwa 20

¹Kwakati shule kwa ipapo Yahwe bakalebeleka na Joshuwa kuti

²adwe bathu be Iziraela ati, “Tjishalulani mizi ye matizhilo yandakatuma Mushe kuti amubudze nge kwayo,

³kuti ndizo nthu ungabulaya mmwe kusi nge mwaza kene abe asakazwimisila kumbulaya atizhileko kuti abakiligwe muna unoshaka kuzwibgwilizilila.

⁴“Ha mbulayi etizhila ku mmwe we mizi iyeyi wakafanila kuswika ema ku nkoba we nzi ngono ipapo abe ebikila bakulu be nzi ndebo iye. Ngono ndizo kudwapo bangan'amutjila mu nzi wabo bakampa magalo kuti agale nabo.

⁵Ngono wabulayigwa ha angantobela bakulu be lubazhe abazofanila kudusa mbulayi iwoyo ngoti azobulaya mmwe mwaza kene nge mazwimisilo mamwe koga.

⁶Mbulayi wakafanila gala mu nzi we dizhilo kudzina ema mbeli kwe gubungano esumikilisiwa ne kuswikila mpirisiti nkulu we tjibaka itjetjo efa. Ngono ndizo kudwapo ungayendazwe ku nzi uwe kwaakabe atizha ko.”

⁷Ndizo bakashalula nzi we Kedeshi umu ntuthu we Galili mu shango ye matombo ya Nafutali ne Shekemu mu shango ye matombo ya Ifureimi ne Kiriyatiaribha (inodang'wa Heburoni) mu shango ye matombo ya Juda.

⁸Ngono seli kwe gwizi gwe Jorodani ku bhezhuba kwe Jerikho bakashalula nzi we Bhezera umu tjilambanyika tje tjibata tje ludzi gwa Rubheni ne Ramoti mu Giliyadi mu ludzi gwa Gadi ne mu Golani mu Bhashani mu ludzi gwa Manase.

⁹Mizi iyeyi ndiyo yakabe yashaluligwa Baiziraela bose ne bazhi bose bakabe begala mu Baiziraela kuti mmwe ne mmwe wakabulaya mmwe kusi nge mwaza kene nge mazwimisilo awe ungatizhila ku ili kuti ndizo asibulawe ne mbgwilizili wabulayigwa kuswikilila mbulayi asekesiwa mbeli kwe gubungano.