Read Kalanga Joshuwa 21 Bible Online

Joshuwa 21 - Kalanga bible

Joshuwa 21

¹Misholo ye misha ye Balevi, bakazha kuna Eleazari we mpirisiti na Joshuwa nkololo wa Nuni ne misholo ye misha ye njudzi dze Iziraela,

²bali ku Shilo mu shango ye Kanana beti, “Yahwe bakapa Mushe ndaulo ye kuti mutipe mizi yatingagala muili kakale ina mafulilo e zwithuwo zwedu.”

³Ndizo sekwakaleba Yahwe, Baiziraela bakapa Balevi mizi iyeyi sahwoku:

⁴Hakata dzakati dzilobgwa dziba le kutanga likawila ludzi gwa Kohati nsha nge nsha. Balevi bakabe bali zwizekugwana zwa Aroni we mpirisiti zwakapiwa mizi ili gumi lina mitatu (13) kudwa mu mizi ye ludzi gwa Juda ne muna gwa Simiyoni ne muna gwa Bhenjamini.

⁵Bakohati bakabe basala bakapiwa mizi ili gumi kudwa mu ludzi gwa Ifureimi ne gwa Dani ne mu gwamu le ludzi gwa Manase.

⁶Zwizekugwana zwa Geshoni zwakapiwa mizi ili gumi lina mitatu kudwa mu ludzi gwa Isakari ne gwa Asheri ne gwa Nafutali ne mu gwamu le ludzi gwa Manase mu Bhashani.

⁷Zwizekugwana zwa Merari nsha ne nsha izo zwakapiwa mizi ili gumi lina mibili kudwa mu ludzi gwa Rubheni ne gwa Gadi ne gwa Zebuluni.

⁸Ndizo Baiziraela bakapa Balevi mizi iyeyi ne mafulilo iyawa, koga Yahwe sekwa bakabe babudza Mushe.

⁹Kudwa mu ludzi gwa Juda ne gwa Simiyoni bakabapa mizi ye mazina iyawa,

¹⁰yakapiwa zwizekugwana zwa Aroni zwakabe zwili zwe ludzi gwa Kohati gwe Balevi ngono dziba le hakata likawila izo kutanga.

¹¹Bakapiwa nzi we Kiriyatiaribha unodang'wa Heburoni, (Abha wakabe ali tate ba Anakimu) ne mafulilo akaupoteleka mu shango ye matombo ya Juda.

¹²Khalebu nkololo wa Jefune wakapiwa minda ye mizi ne mizana yakapoteleka kuti ibe thaka iye.

¹³Ndizo zwizekugwana zwa Aroni we mpirisiti zwakapiwa Heburoni, nzi we matizhilo e babulayi ne Libina ne

¹⁴Jatiri ne Eshitemoa ne

¹⁵Holoni ne Dibiri ne

¹⁶Ayini ne Jutha ne Bhetishemeshi yose yose yakashangana ne mafulilo ayo yakabe ili zhanalume (9) kudwa mu njudzi idzedzi mbili.

¹⁷Kudwa mu ludzi gwa Bhenjamini bakabapa nzi we Gibiyoni newe Geba newe

¹⁸Anatoti newe Alimoni kose ne mafulilo ayo, yose yose yakashangana yakabe ili mizi ili minna.

¹⁹Mizi yose ye bapirisiti ne zwizekugwana zwa Aroni yakabe ili gumi lina mitatu yakashangana ne mafulilo ayo.

²⁰Bakohati be nsha we Balevi bakabe basala bakapiwa mizi mu ludzi gwa Ifureimi.

²¹Ibo bakapiwa nzi we Shekemu (nzi we matizhilo e wabulaya abe asakazwimisila bulaya) ne mafulilo awo mu shango ye matombo ye Ifureimi ne Gezeri ne mafulilo awo,

²²ne Kibizayimu ne Bhetihoroni, yose yose yakashangana ne mafulilo awo yakabe ili mizi ili minna.

²³Kudwa mu ludzi gwa Dani bakapiwa nzi we Eliteke ne we Gibethoni newe

²⁴Aijaloni newe Gatirimoni yose yose yakashangana ne mafulilo ayo yakabe ili mizi ili minna.

²⁵Kudwa mu gwamu le ludzi gwa Manase bakapiwa nzi we Taanaki newe Gatirimoni, yose yose yakashangana ne mafulilo ayo yakabe ili mibili.

²⁶Mizi iyeyi ili gumi yakashangana ne mafulilo ayo yakapiwa be nsha we Kohati bakabe basala.

²⁷Be nsha mmwe we Balevi, banodang'wa Bagerishoni ibo bakapiwa kudwa mu gwamu le nsha wa Manase nzi we Golani mu Bhashani (nzi we matizhilo e wakabulaya abe asakazwimisila bulaya) newe Bheeshitera, yose yose yakashangana ne mafulilo ayo yakabe ili mizi mibili

²⁸Kudwa mu ludzi gwa Isakari bakapiwa mizi ye Kishiyoni ne Daberati ne

²⁹Jarimuti ne Eniganimu, yose yose yakashangana ne mafulilo ayo yakabe ili mizi ili minna.

³⁰Kudwa mu ludzi gwa Asheri bakapiwa Mishali ne Abidoni ne

³¹Helikati ne Rehobi, yose yose yakashangana ne mafulilo ayo yakabe ili mizi ili minna.

³²Kudwa mu ludzi gwa Nafutali bakapiwa Kedeshi mu Galili (nzi we matizhilo ewabulaya asina mazwimisilo ekubulaya) ne Hamotidori ne Karitani, yose yose yakashangana ne mafulilo ayo yakabe ili mizi ili mitatu.

³³Mizi yose ye nsha we Bagerishoni yakabe ili gumi lina mitatu yakashangana ne mafulilo ayo.

³⁴Balevi bakabe basala bali be nsha wa Merari bakapiwa kudwa mu ludzi gwa Zebuluni bakapiwa Jokineyamu ne Karita ne

³⁵Dimina ne Nahalali, yose yose yakashangana ne mafulilo ayo yakabe ili mizi ili minna.

³⁶Kudwa mu ludzi gwa Rubheni bakapiwa Bhezera ne Jahazi ne

³⁷Kedemoti ne Mefaati, yose yose yakashangana ne mafulilo ayo yakabe ili mizi ili minna.

³⁸Kudwa mu ludzi gwa Gadi bakapiwa Ramoti mu Giliyadi (nzi we matizhilo ewabulaya asina mazwimisilo ekubulaya) ne Mahanayimi ne

³⁹Heshibhoni ne Jazeri, yose yose yakashangana ne mafulilo ayo yakabe ili mizi ili minna.

⁴⁰Mizi yose yakapiwa misha ya Merari bakabe bali Balevi basala, yakabe ili gumi lina mibili.

⁴¹Mizi yose ye Balevi yakabe ili mu ntuthu we bathu be Iziraela yakabe ili makumi manna ana ili zhanakadzi (48) yakashangana ne mafulilo ayo.

⁴²Nzi mmwe ne mmwe wakabe una mafulilo awo akaupoteleka, kwakabe kwakajalo nge nzi mmwe ne mmwe we mizi iyeyi.

⁴³Ndizo Yahwe bakapa bathu be Iziraela shango koga sekwa bakabe bagadzabgwe bobatategulu babo ngono ndizo Baiziraela bakatola shango bakagalako.

⁴⁴Yahwe bakapa Iziraela mbakiso mu mbizho dzose koga sekwa bakagadzabgwe bobatategulu babo. Akuna ndodwa ne ung'ompela we zwita zwabo wakama mbeli kwabo, Yahwe bakaba bhatsha kuti bakunde.

⁴⁵Yahwe bakagadzabgwe bathu be Iziraela kuti banobathamila bubuya ngono kose bakakushingikadza.