Read Kalanga Joshuwa 22 Bible Online

Joshuwa 22 - Kalanga bible

Joshuwa 22

¹Joshuwa wakadana be ludzi gwa Rubheni ne gwa Gadi ne gwamu le ludzi gwa Manase

²ngono kabadwa kati, “Makalondolodza kose kwamakadwiwa ndi Mushe nlanda wa Yahwe, kakale makabe mushinga kose kwandakabe ndi mudwa.

³Amuzotongo letjedzela zwikamu zwenyu muzwibaka zwinjinji kuswikila nasi, koga makabe nako kuti muthame itjo tjamakabe mudwiwa ndi Yahwe Ndzimu wenyu kuti mutjithame.

⁴Ngono ngwenu Yahwe Ndzimu wenyu watjipa zwikamu zwenyu kunyaluluka koga sekwa akabe abagadzabgwe, ndizo ngwenu bgwililani ku mizi yenyu ku shango yamakapiwa seli ye gwizi gwe Jorodani ndi Mushe nlanda wa Yahwe.

⁵Mubone kuti molondolodza ndaulo ne milayo yamakapiwa ndi Mushe nlanda wa Yahwe, kuda Yahwe Ndzimu wenyu, kulondolodza zila dzabo dzose ne kubhulutana ndayo ne kuzwibhatilila mubali ne kubashingila nge moyo wose ne meya dzenyu dzose.”

⁶Ngono Joshuwa kabakombolela kabapa zila bakayenda ku mizi yabo.

⁷Mushe wakabe apa gwamu limwe le ludzi gwa Manase shango mu Bhashani kuti ibe thaka yabo, ngono gwamu limwe labo Joshuwa wakalipa shango ikunomila zhuba kwe gwizi gwe Jorodani. Ngono kwakati Joshuwa ebapa zila kabakombolela ngono

⁸kabadwa kati, “Yendani ku mizi yenyu nge fumwa yenyu isi shoma, ye zwithuwo zwisizwishoma ne siliva ne golide ne phangula ne butale ne zwiambalo zwinjinji ngono muswike mukobele bo bamwe zwamakatapa mu zwita zwenyu.”

⁹Ndizo ludzi gwa Rubheni ne gwa Gadi ne gwamu le ludzi gwa Manase bakabgwilila kanyi kwabo, bethubukana ne Baiziraela ku Shilo, mu shango ye Kanana, beyenda ku shango yabo ye Giliyadi yabakapiwa nge ndaulo ya Yahwe yabakapa Mushe.

¹⁰Bakati bali mu zila beyenda kanyi kwabo bakaswika mu ntuthu we Geliloti umu shango ye Kanana pejo ne gwizi gwe Jorodani, bathu be ludzi gwa Rubheni ne gwa Gadi ne gwamu le ludzi gwa Manase bakabaka tjibeso tjinopisigwa zwibhayilo tjikulukulu tjakanaka wunde ye gwizi gwe Jorodani.

¹¹Ngono Baiziraela bakahwa kuti bathu be Rubheni ne be Gadi babaka tjibeso tjinopisigwa zwibhayilo ku ndzibo uku gwizi gwe Jorodani kwakalingisana ne shango ye Kanana.

¹²Ngono Baiziraela bakati behwa ngekwako bakanozwikubunganya ku Shilo kuti ndizo bagwe nabo.

¹³Ndizo Baiziraela bakatuma Finihasi nkololo wa Eleazari we mpirisiti ku bathu be ludzi gwa Rubheni na Gadi negwe gwamu limwe le ludzi gwa Manase mu shango ye Giliyadi.

¹⁴Bakantuma ne goko le batungamili bali gumi mmwe ne mmwe ali nsholo we nsha mu njudzi dze Iziraela

¹⁵Bakati beswika ku nzi we Giliyadi bakadwa bathu be ludzi gwa Rubheni ne gwa Gadi ne gwamu limwe le ludzi gwa Manase bakati,

¹⁶“Tatumwa nge gubungano la Yahwe ngono toshakaziba kuti ini mashaya kugalabgwe mu Ndzimu we Iziraela kene? Ini mafupatila Ndzimu we Iziraela saikoku kene, mu kupanduka kwenyu mube muzwibakila tjibeso tjinopisigwa zwibhayilo kene?

¹⁷Tjibi tjawakathamila Yahwe tili ku Peori tjatisathu tikazwitjenapadza mu tjili ne tjifo tjakawila gubungano la Yahwe azwizolizana kene?

¹⁸Ndiko nasi kwamunga fupatila Yahwe kene? Ha mupandukila Yahwe nasi banowomuka mangwana bezhalila gubungano le Baiziraela bushongola.

¹⁹Ndizo ngwenu ha shango yamakapiwa yakatemapala, izhani ku shango ya Yahwe iko kuna bugalo gwe Ndzimu, ngono mugale naswi mu shango yedu. Koga musi pandukile Yahwe kene iswi ngo zwibakila tjibeso tjinopisigwa zwibhayilo kusi tja Yahwe Ndzimu wedu.

²⁰Apa Akani nkololo wa Zera wakati asalondolodza tjabakabe badwiwa ngekwe zwija zwabakayi basitole, apa bushongola gwa Yahwe aguzowila gubungano lose le Iziraela kene? Akani azofila jinyo lile ega.”

²¹Be ludzi gwa Rubheni ne gwa Gadi ne gwamu le ludzi gwa Manase bakashandula batungamili be bathu be Iziraela beti,

²²“Masimbawose ndibo Ndzimu! Ndzimu ndiwo Yahwe! Banoziba kuti ini tathama saikoku, ngono toshaka kuti namwi mose nasi muzibe bo! Ha ili kuti ikoku bupanduki kene sateedza Yahwe mutibulaye ngwenu.

²³Ha tazwibakila tjibeso tjedu tjinopisigwa zwibhayilo kuti ndizo tikowofupatila Yahwe, tibetidusa zwibhayilo zwinopisiwa ne zwe mathunde kene zwe moyo ntjena mutjili Yahwe ngaba tibone nlandu.

²⁴Aa, tathama saikoku ngotja kuti limwe zhuba zwizekugwana zwenyu zwingadwa zwizekugwana zwedu zwiti, ‘Gobe lenyu mu Ndzimu we Iziraela ini?’

²⁵Ngoti Yahwe bakathama kuti gwizi gwe Jorodani gube n'gathu pakati kwedu namwi, imwi Barubheni namwi Bagadi amuna gobe muna Yahwe. Ndizo zwizekugwana zwenyu zwingathama kuti zwizekugwana zwedu zwisitongo namata Yahwe.

²⁶Ndizo tati, ‘Ngati bakeni tjibeso tjisi tje zwibhayilo zwinopisiwa kene zwimwe koga,

²⁷koga tjibe butendeki pakati kwedu namwi ne pakati kwe bana bedu banozha kuti towonamata Yahwe mu bugalo gwabo gwa kayengemala, tibetiyisa zwibhayilo zwinopisiwa ne zwimwe ne zwe moyo ntjena, tithamila kuti mangwana bana benyu basitongodwa bana bedu beti abana gobe muna Yahwe.’

²⁸Takakumbula titi ha kungati limwe zhuba tikadwiwa saikoku kene kudwiwa bana bedu saikoku, tingadabila titi, ‘Bonani tjifano tje tjibeso tjinopisigwa zwibhayilo tja Yahwe tjakabakiwa ndi bobatategulu bedu, tjisinga bakigwe kuti tjipisigwe zwibhayilo kene tjidusigwe zwibhayilo, koga tjibakigwa kuti tjibe butendeki pakati kwedu namwi.’

²⁹Ngono gwenu ngakube kutjena naswi kuti tingapandukila Yahwe ngono tikabafupatila ngobaka tjibeso tjinopisigwa zwibhayilo zwinopisiwa ne zwe mathunde ne zwibhayilo koga kusi tjibeso tjinopisigwa zwibhayilo tja Yahwe Ndzimu wedu tjakabakwa pa bugalo gwe Ndzimu.”

³⁰Kwakati mpirisiti Finihasi ne batungamili be gubungano ne wola dze misha ye Iziraela behwa matama akabe elebgwa ne bathu be ludzi gwa Rubheni ne gwa Gadi ne gwamu le ludzi gwa Manase bakagutshika.

³¹Ngono Finihasi we mpirisiti nkololo wa Eleazari kadwa ludzi gwa Rubheni negwa Gadi ne gwamu le ludzi gwa Manase kati, “Nasi toziba kuti Yahwe bayapo pakati kwedu, ngobe amuzo bapandukila. Ngwenu matjidza Baiziraela mu shamu ya Yahwe.”

³²Kudwapo Finihasi ne batungamili bakasiya Barubheni ne Bagadi mu shango ye Giliyadi bakashandukila ku shango ye Kanana kubamwe Baiziraela ngono bakaswika bebabikila.

³³Mbiko yakashathisa Baiziraela, ngono bakakudza Ndzimu. Bakamisa kululwamisila kunokolomola nge ngwa shango ye Giliyadi yakabe igala bathu be ludzi gwa Rubheni ne gwa Gadi.

³⁴Barubheni ne Bagadi bakadana tjibeso tjinopisigwa zwibhayilo beti, “Ntendeki wedu namwi kuti Yahwe ba Ndzimu.”