Read Kalanga Joshuwa 23 Bible Online

Joshuwa 23 - Kalanga bible

Joshuwa 23

¹Kwakati shule kwabe tjibaka Yahwe bakapa Baiziraela kunyaluluka mu kugwa ne zwita zwabo zose kubapoteleka, Joshuwa mu tjibaka itjetjo wakabe atjikwegula kwazo,

²Joshuwa kakubunganya bathu bose be Iziraela, bakulu ne batungamili ne basumikilisi ne makombgwa ngono kabadwa kati, “Imi ndakwegula ndabe nthuntana,

³ngono imwi makazwibonegwa tjimwe ne tjimwe tjakashingwa ndi Yahwe Ndzimu wenyu mu zwitjaba nge kwenyu, Yahwe Ndzimu wenyu ndibo bakabe bemugwila.

⁴Ndakapa njudzi dzenyu shango kuti ibe thaka yenyu kudwa ku bhezhuba kwe gwizi gwe Jorodani kunoti ku Gungwa Bukulu kunomila zhuba. Ndakamupa shango ye zwitjaba zose zwandakakunda ne zwakasala.

⁵Yahwe Ndzimu wenyu banowozwitatila kutjena namwi bakazwisundila kutjena mbeli kwenyu ngono mowotola shango dzabo koga Yahwe Ndzimu wenyu sekwa bakamugadzabgwe.

⁶Ndizoke ngwenu simani, mulondolodze tjimwe ne tjimwe tjakakwagwa mu Lukwalo gwe nlayo gwa Mushe, musitongo gufupatila ndodwa ne kang'ompela.

⁷Musitongo shingidzana ne njudzi idzedzi dzipakati kwenyu, musitongo dana mazina e midzimu yabo kene ili kutuna nayo kene kuli kuithigamila.

⁸Koga makafanila kuti mubhatilile muna Yahwe Ndzimu wenyu koga sekwa makathama kuswikila nasi.

⁹Yahwe bakatatila zwitjaba zwakasima kutjena na nasi kose akuna wakamukunda.

¹⁰Yahwe Ndzimu wedu bakagadzabgwe kuti banowotigwila ndizo nthu ng'ompela ekunda bathu bali tjiwulu (1 000).

¹¹Ndizo mubone kuti moda Yahwe Ndzimu wenyu.

¹²“Koga ha mufupatila Yahwe muzwizwadzanya ne Bezwitjaba izwezwi zwipakati kwenyu kene mube mulobolelana nazo,

¹³mube muziba kuti Yahwe Ndzimu wenyu abangatjatatile zwitjaba kutjena namwi. Koga zowobe bhuzhu, zwikamulalila, zowobe shamu mu muli kakale zwikabe mihwa mu mesho enyu kuswikilila maloba mose mu shango iyeyi yakanaka yamakapiwa ndi Yahwe Ndzimu wenyu.

¹⁴“Ngono ngwenu ndatjibe pejo ngofa. Mukatikati kwenyu moziba tjoselele kuti akuna tja Yahwe Ndzimu wenyu tjabakagadzabgwe tjabasakashingikadza, tjimwe ne tjimwe tjabakagadzabgwe bakatjishingikadza, akuna tjakabakona.

¹⁵Koga se zwithu zose zwibuya zwakagadziwabgwe ndi Yahwe Ndzimu wenyu bakazwishingikadza, Yahwe banowodelusila zwithu zwakabipa pezhugwi kwenyu sekwa bakaleba, kudzina bemukolomodza mu shango iyeyi mbuya iyo Yahwe Ndzimu wenyu yabakamupa.

¹⁶Ha mutjuluka Tjidumano tja Yahwe Ndzimu wenyu, itjo tjabakamudwa, mube muyenda munoshingila midzimu ipoga kakale muinamata, bushongola gwa Yahwe gowodelukila mu muli ngono tjinyolotjo mowolobesiwa mu shango yakanaka yabakamupa iyo.”