Read Kalanga Joshuwa 24 Bible Online

Joshuwa 24 - Kalanga bible

Joshuwa 24

¹Kudwapo Joshuwa kakubunganya njudzi dzose dze Baiziraela ku nzi we Shekemu, kadana bakulu ne batungamili ne basumikilisi ne makombgwa e Baiziraela ngono bakazha mbeli kwe Ndzimu.

²Ipapo Joshuwa kadwa bathu bose kati, “Etji nditjo tjinolebgwa ndi Yahwe Ndzimu we Iziraela, ntolo tjose bobatategulu benyu bo Tera tate ba Abhurahama na Nahori bakabe begala seli kwe gwizi gwe Yufuratesi bakabe bethigamila midzimu.

³Koga ndakatola batategulu benyu Abhurahama mu shango i seli kwe gwizi abatungamila ndibapalamisa shango yose ye Kanana kakale abapa zwizekugwana zwinjinji. Ndakabapa Isaki,

⁴ngono Isaki iye ampa Jakubo na Esau. Ndakapa Esau shango ye matombo ye Seiri ngono Jakubo ne bakololo babe bakayenda ku Egipiti.”

⁵“Ngono kudwapo ndakatuma Mushe na Aroni, ndikatumila tjiga ku Egipiti nge tjandakathama pakati kwabo, koga imwi amudusa mu Egipiti.

⁶Ndakati ndidusa bobatategulu benyu mu Egipiti bakayenda bakaswika pa gungwa ngono Baegipiti bakabatobela nge koloyi dze ngwa nenge mbizi kudza benoti ku Gungwa Shaba.

⁷Koga bobatategulu benyu bakandililila bekumbila bhatsho ngono ndakabiga zhalima pakati kwabo ne Baegipiti. Ngono kwakati Baegipiti beti banotjulukabo, amilidza vula ye gungwa ikabakwididza bakafa makazwibonela nge mesho enyu tjakashingikalila Baegipiti. “ ‘Makadwapo mu gala mu tjilambanyika kwe tjibaka tjilefu.

⁸Ndakamuzhisa mu shango ye Baamori bakabe begala ku bhezhuba kwe gwizi gwe Jorodani. Bakagwa namwi ngono athama kuti mu bakunde. Ndakabalobesa mbeli kwenyu ngono mukatola shango yabo.

⁹Ngono Balaka nkololo wa Zipori mambo we Moabu kazwilulwamisila ngwa ne Baiziraela, katuma Bhalamu nkololo wa Bheori kuti alonge bhiso mu muli,

¹⁰andizoteedza Bhalamu, ndizo mu bumo gwe bhiso kamukombolela ngono amusunungula mu mishingo iye.

¹¹Makati mutjuluka gwizi gwe Jorodani muzha ku Jerikho, bagali be Jerikho ne Baamoni ne Baperizi ne Bakanana ne Bahiti ne Bagirigashi ne Bahivi ne Bajebusi bakagwa namwi ngono athama kuti mubakunde.

¹²Amuzokunda nge kwenyu, ndakatumila mago[7] mbeli kwenyu akamutatila bomambo be Baamori babili.

¹³Ndakamupa minda dzabo dzamusakashinga tjimwe mudzili ne mizi yabo mikulu yamusakabaka koga mogala muili kakale muja mitjelo ye minda dze zhambi ne dze mitoba dzamusakalima.’ ”

¹⁴“Ndizoke itjani Yahwe mubashingile kakale mu bagalemoyo nge mimoyo yenyu yose. Dusilani kutjena midzimu ya bobatategulu benyu yabakabe bethigamila seli kwe gwizi ne mu Egipiti, munamate Yahwe.

¹⁵Koga amubona kwakabipa kushingila Yahwe muzwishaluligwe muna la nasi kuti moshingila ani, kuti kene moshingila midzimu ya bobatategulu benyu baseli kwe gwizi kene midzimu ye Baamori ibo bamunogala mu shango yabo, koga imi ne be nsha wangu towoshingila Yahwe.”

¹⁶Ngono bathu bakadabila beti, “Ngakube kutjena naswi kuti tingafupatila Yahwe tikathigamila midzimu ipoga!

¹⁷Yahwe Ndzimu wedu ndibo bakatidusa iswi na bobatategulu bedu mu busungwa mu shango ye Egipiti, ndibo zwabo bakathama zwilakidzo zwinotjenamisa mbeli kwedu. Bakatibakilila kudwa tjose tilimu gwendo, bakatibakilila tili pakati kwe zwitjaba zwatakabe tipalama.

¹⁸Yahwe bakatatila kutjena naswi zwitjaba zose ne Baamori bakabe begala mu shango iyeyi tjibaka itjetjo. Naswibo towoshingila Yahwe ngoti ndibo Ndzimu wedu.”

¹⁹Joshuwa kashandula kati, “Amungatubule kushingila Yahwe nge kuti ba Ndzimu wakayengemala, ba Ndzimu una fupa. Abanga muzwiibhatigwe bupanduki kene matjinyo enyu.

²⁰Ha mufupatila Yahwe mube mushingila midzimu ipoga, banowomushandukila bakamuthamila zwakabipa bakamulobesa, nenguba bakatongo muthamila zwakanaka.”

²¹Koga bathu bakadwa Joshuwa bakati, “Aa, towoshingila Yahwe!”

²²Joshuwa kabe eti, “Mmwe ne mmwe wenyu ipapa ntendeki kuti mazwishalulila kushingila Yahwe.” Ngono bakashandula beti “Ee, ti batendeki.”

²³Joshuwa kabe eti, “Ngono ngwenu lashilani kutjena midzimu yenyu yamunayo ngono mupe Yahwe Ndzimu we Iziraela mimoyo yenyu.”

²⁴Ngono bathu bakadwa Joshuwa beti, “Towoshingila Yahwe Ndzimu wedu kakale towobahwa.”

²⁵Ndizo mu zhuba ilelo Joshuwa kathama Tjidumano ne Baiziraela ku Shekemu, kathama milayo kabapa iyo.

²⁶Ngono Joshuwa kakwala zwithu zose izwezwi mu Lukwalo gwe Nlayo we Ndzimu. Kudwapo katola bgwe gulu gulu kalibiga kusi kwe nti nkulu we pakayengemala mu bugalo gwakayengemala gwa Yahwe.

²⁷Kudwapo Joshuwa kabadwa kati, “Bonani bgwe ileli, ntendeki wedu, lahwa matama wose atabudziwa ndi Yahwe. Lowobe ntendeki ha musina malebeswa ku Ndzimu wenyu.”

²⁸Ndizo Joshuwa kapaladza bathu bakayenda ku magalo abo.

²⁹Shule kwe zwithu izwezwi zose Joshuwa nkololo wa Nuni, nlanda wa Yahwe kafa abe ne makole ali zana ling'ompela lina ali gumi (110).

³⁰Baiziraela bakambiganya mu shango ye Timinatisera ili shango ye matombo ye Ifureimi ku bunandzwa gwe Dombo le Gaashi, shango yakabe ili thaka iye.

³¹Baiziraela bakashingila Yahwe, tjibaka tjose tja Joshuwa atjatjila ne tjibaka tje bakulu bose baakasiya be tjila bakabe beziba mishingo yakashingigwa Baiziraela ndi Yahwe.

³²Mafupa a Josefa akabe atogwa ne Baiziraela ku Egipiti, kabiganyiwa ku Shekemu, pa ntuthu wakabe watengwa ndi Jakubo mu bana ba Hamori tate ba Shekemu nge themba inobhata dzi siliva dzili zana (100). Ngono ipapa kukabe thaka ye bana ba Josefa.

³³Ngono Eleazari nkololo wa Aroni kafa ngono kabiganyiwa ku nzi we Gibiya wakabe wapiwa nkololo uwe Finihasi mu shango ye matombo ye Ifureimi.