Read Kalanga Joshuwa 4 Bible Online

Joshuwa 4 - Kalanga bible

Joshuwa 4

¹Kwakati itjaba tjose tje Iziraela tjisinotjuluka gwizi gwe Jorodani, Yahwe bakadwa Joshuwa bakati,

²“Shalula balume bali gumi lina babili mu bathu ibaba, mmwe ne mmwe wabo ali milile ludzi gugwe,

³ngono ubadwe uti, ‘Mmwe ne mmwe wenyu ngaatole bgwe ling'ompela mu gwizi pabe pali mile bapirisiti, muasenge munoabiga kwamunonolala nasi.’ ”

⁴Ipapo Joshuwa kadana balume bali gumi lina babili kudwa mu bathu be Iziraela, baakabe ashalula mmwe ne mmwe edwa mu ludzi gugwe,

⁵ngono kabadwa kati, “Pindilani mbeli kwe Bhokisi le Tjidumano tja Yahwe Ndzimu wenyu, mungine pakati kwe gwizi gwe Jorodani, mmwe ne mmwe wenyu kuyenda nge mbalo ye njudzi dze bathu be Iziraela, mmwe ne mmwe aswike apike bgwe ling'ompela aliyise ku bukotokelo,

⁶mabgwe iyawa abe ikumbuludzo mu muli. Mangwana ha bana benyu be mubhuzwa beti, ‘Mabgwe iyawa anodwani?’

⁷Mowobabudza kuti, kwakati Bhokisi le Tjidumano tja Yahwe litjuluka gwizi, vula ikama wunga, ndizo mabgwe iyawa anowobe ikumbuludzo tje tjakashingikala mu bathu be Iziraela nge kusingapele kose.”

⁸Ngono balume be Iziraela bakathama sekwakaleba Joshuwa, bakatola mabgwe ali gumi lina mabili pakati kwe Jorodani kuyenda nge mbalo ye njudzi dze bathu be Iziraela koga sekwakadwiwa Joshuwa ndi Yahwe. Bakatola mabgwe bakanoabiga kwabakabe bakakotokela.

⁹Joshuwa kabiga mabgwe mamwe ali gumi lina mabili pakati kwe gwizi pakabe pali mile bapirisiti bakabe bakasenga Bhokisi le Tjidumano. Mabgwe iyawo ayapo na nasi.

¹⁰Bapirisiti bakabe bakasenga Bhokisi le Tjidumano bakabe bali mile pakati kwe gwizi kuswikilila kwathamiwa tjimwe ne tjimwe tjakabe tjadwiwa Joshuwa ndi Yahwe kuti atjidwe bathu kuti batjithame kuyendidzana nakose kwakabe kwadwiwa Joshuwa ndi Mushe. Bathu bakatjuluka gwizi belibilidza,

¹¹ngono kwakati bathu bose basinobe batjuluka, Bhokisi le Tjidumano la Yahwe likatjuluka lakasengwa nge bapirisiti, itjaba tjakalingilila.

¹²Balume be ludzi gwa Rubheni ne gwa Gadi ne gwamu le ludzi gwa Manase, bose bakabe bakashakatila mathumo bakatungamila Baiziraela Mushe sekwa akabadwa.

¹³Kwakabe kuli balume bangabhata zwiwulu zwili makumi manna (40 000) bakazwilulwamisila ngwa bakapinda mbeli kwa Yahwe beyenda ku mabala e Jerikho.

¹⁴Mu zhuba ilelo Yahwe bakakudza Joshuwa mbeli kwe Baiziraela bose ngono Baiziraela bakazwiyisa pasi mbeli kwa Joshuwa butjilo gugwe gose koga sekwa bakabe bezwiyisa pasi mbeli kwa Mushe.

¹⁵Ngono Yahwe bakadwa Joshuwa bakati,

¹⁶“Idwa bapirisiti bakasenga bhokisi le butendeki kuti babhude mu gwizi gwe Jorodani.”

¹⁷Ndizo Joshuwa kadwa bapirisiti kati babhude mu gwizi.

¹⁸Kwakati koga bapirisiti bakasenga Bhokisi le Tjidumano tja Yahwe betshamba pasi pakawoma vula ikatangisa wunga koga se mukutanga.

¹⁹Bathu bakabhuda mu Jorodani mu zhuba le bugumi le mwedzi we kutanga ngono bakanokotokela ku Giligala ku n'gathu uku bhezhuba kwe Jerikho.

²⁰Ngono Joshuwa katola mabgwe ali gumi lina mabili akabe atogwa mu gwizi gwe Jorodani kaatshila kaamisa mu Giligala.

²¹Ngono Joshuwa wakadwa bathu be Iziraela eti, “Mangwana ha bana be bana benyu bebhuzwa botate babo kuti mabgwe iyawa anodwani,

²²mu babudze muti, ‘Baiziraela bakatjuluka gwizi gwe Jorodani gwakawoma.’

²³Yahwe Ndzimu wenyu bakapkhwisa vula mu Jorodani kuswikila mose matjuluka koga Yahwe Ndzimu wenyu sekwa bakathama ku Gungwa Shaba, bakapkhwisa vula kuswikilila tose tatjuluka,

²⁴kuti ndizo bathu bose bamu shango bazibe kuti Yahwe bana masimba ne kuti mugale mutja Yahwe Ndzimu wenyu misi yose.”