Read Kalanga Joshuwa 5 Bible Online

Joshuwa 5 - Kalanga bible

Joshuwa 5

¹Kwakati bomambo be Baamori bakabe begala kunomila zhuba kwe Jorodani na bomambo be Bakanana bakabe begala ku tjekelo dze gungwa behwa kuti Yahwe bakapkhwisa gwizi gwe Jorodani tjini kuswikila Baiziraela bose batjuluka, bakatemeka mafupa bakapelegwa nge simba le kulingisana ne Baiziraela.

²Mu tjibaka itjetjo Yahwe bakadwa Joshuwa beti, “Thama mipanga ye mabgwe inopitsha ube uthama thumbidzo ye bubili mu Baiziraela.”

³Ndizo Joshuwa kathama mipanga inopitsha ngono kathumbisa bathu be Iziraela ku Gibeatiharaloti[1].

⁴Tjakathama kuti Joshuwa athumbile bathu hwuti balume bose be babhayani bakabe badwa ku Egipiti, bakabe batjifa bose bali mu tjilambanyika shule kwe babhuda mu Egipiti.

⁵Bathu bose bakabe badwa ku Egipiti bakabe bakathumbigwa, bose bakazwaligwa mu tjilambanyika batji mu gwendo ibo bakabe basakathumbigwa.

⁶Bathu be Iziraela bakayenda mu tjilambanyika kwe makole ali makumi ali manna (40) kuswikila tjaba yose yakadwa mu Egipiti yafa yapelela, ngoti bakabe basingabhulutane hwi la Yahwe. Yahwe bakabe batuna kuti akuna wabo unowotshamba mavu e shango yabakagadzabgwe bobatategulu babo kuti banowobapa iyo, shango yakafuma inowunga nkaka ne butji.

⁷Koga bana babo ndibo bakathumbigwa ndi Joshuwa ngoti bakabe basakathumba se bakabe batji mu gwendo.

⁸Kwakati itjaba tjose tjisinothumbigwa, tjikagala mu bukotokelo kuswikilila tjapola.

⁹Kudwapo Yahwe bakadwa Joshuwa bakati, “Nasi ndamudusa mukulengudzika kwe kube balanda mu Egipiti.” Ndizo na nasi pathu ipapo kodang'wa Giligala.[2]

¹⁰Baiziraela bakati batjikotoka mu Giligala bakati mu madekwana e zhuba le bugumi lina manna le mwedzi, bakalondolodza Nzano we Kupinda pezhugwi mu mabala e Jerikho.

¹¹Zhuba shule kwele Nzano we Kupinda pezhugwi, bakaja kuli gwe kutanga beja zwe minda dze Kanana, bakaja tjiwunga tjisakabila ne mathunde akagotjiwa.

¹²Zojiwa zwe mana zwakama kuwa kudzimu mu zhuba labakaluma zwe minda dze Kanana, Baiziraela abazotongo wana mana mu gole ilelo, bakabebeja zwinodwa mu mavu e Kanana.

¹³Kwakati Joshuwa ali pejo ne Jerikho, kamilidza mesho ngono kabona nlume alimile mbeli kukwe akabhata thumo mu luboko gugwe. Ngono Joshuwa kayenda kunli kambhuzwa kati, “Umwe wedu kene uwe zwita zwedu kene?”

¹⁴Ngono kashandula kati, “Aa, andite ndili mmwe wenyu kene mmwe we zwita zwenyu, ndazha ndili nlauli we babhayani ba Yahwe.” Ngokuzwiyisa pasi Joshuwa kathigama kanamata, ngono kabhuzwa kati, “She wangu moshaka kuti nlanda wenyu athameni?”

¹⁵Nlauli we babhayani ba Yahwe kashandula eti, “Ambula shangu dzidzo ngobe pathu paumile pakayengemala.” Ngono Joshuwa kathama sekwa adwiwa.