Read Kalanga Joshuwa 6 Bible Online

Joshuwa 6 - Kalanga bible

Joshuwa 6

¹Ngono kwakati mu tjibaka itjetjo bathu be Jerikho bakabe bazhalila mikoba yose yabo ngotja Baiziraela, kwakabe kusina unongina kene unobhuda.

²Ipapo Yahwe bakadwa Joshuwa bakati, “Bona, ndolonga mu maboko awo bathu be Jerikho na mambo wabo ne babhayani bayo bakasima.

³Yendani mupoteleke nzi we Jerikho ne babhayani benyu be ngwa bose, mupoteleke kudza munoligila kang'ompela nge zhuba, muthame saikoku mazhuba ali matathatu ngotobedzana kwawo.

⁴Bapirisiti bali kutendeka batungamile Bhokisi, mmwe ne mmwe wabo akabhata tjilidzo tje lunyanga gwe nyundo. Mu zhuba le butendeka mupoteleke nzi katendeka, bapirisiti ibo bakabhata belidza nyanga.

⁵Ngono kuti muhwa nyanga dzilila kwe lubaka bulefu bathu bose bamimilile pezhugwi ngono guma le nzi nkulu lowowila pasi lose, bathu babe betambunuka bengina muuli.”

⁶Ndizo Joshuwa nkololo wa Nuni kadana bapirisiti ngono kabadwa kati, “Tolani Bhokisi le Tjidumano tja Yahwe, ngakube ne bapirisiti bali kutendeka bakabhata nyanga dzili kutendeka bakalitungamila.”

⁷Ngono kadwa bathu kati, “Milikani mupoteleke nzi nkulu, babhayani bakashakatila mathumo batungamile Bhokisi le Tjidumano tja Yahwe.”

⁸Ngono kwakati Joshuwa asino lebeleka ne bathu, bapirisiti bali kutendeka bakabhata nyanga dzili kutendeka bali mbeli kwa Yahwe bakatungamila beyenda belidza nyanga dzabo ngono Bhokisi le Tjidumano tja Yahwe lakabasala shule.

⁹Babhayani bakashakatila mathumo bakayenda bali mbeli bakatungamila bapirisiti bakabe belidza nyanga betobegwa ne bapirisiti bakabe bakasenga Bhokisi le Tjidumano, ibo betobegwa ne bamwe babhayani bakashakatila mathumo, nyanga idzo dzakabhata dzilila.

¹⁰Koga Joshuwa wakabe ati ku bathu, “Musi mimile kene kumilidza mahwi enyu, musitongo buya mukadusa dama mu milomo yenyu kuswikilila zhuba landinowomudwa nditi mu mimile, ipapo mube mumimila!”

¹¹Ndizo Joshuwa kathama kuti bathu bapoteleke nzi nkulu kang'ompela koga bakasenga Bhokisi le Tjidumano, kudwapo bathu bakabgwilila ku bukotokelo kunolala.

¹²Joshuwa kabinduka, bapirisiti bakatola Bhokisi le Tjidumano tja Yahwe.

¹³Bapirisiti bali kutendeka bakabe bakasenga nyanga dzabo beyenda bedzilidza, beyendila mbeli bakatungamila Bhokisi le Tjidumano tja Yahwe. Balume bakashakatila mathumo ibo bakabatungamila ha bamwe ibo bakasala Bhokisi le Tjidumano shule, nyanga idzo dzakabhata dzilila.

¹⁴Zhuba le bubili bakapoteleka nzi nkulu we Jerikho kabili bakabe bebgwilila ku bukotokelo. Bakazwibgwizhulula kukabe kwe mazhuba ali matathatu.

¹⁵Kwakati mu zhuba le butendeka, bakabinduka bakayenda bakanopoteleka nzi nkulu Jerikho katendeka kunofanana koga ne mamwe mazhuba, kuzhe kwekuti mu zhuba ilelo bakapoteleka nzi nkulu katendeka.

¹⁶Kwakati bopoteleka gwe butendeka, bapirisiti bakalidza nyanga dzabo ngono Joshuwa kadwa itjaba kati, “Tjimimilani ngobe Yahwe bamupa nzi nkulu Jerikho!

¹⁷Nzi nkulu ne tjimwe ne tjimwe tjimuuli zwipiwe Yahwe ngokolomodziwa, kusale fukula Rahabu koga ne baanabo be nsha uwe ngobe akasumbika shodzi dzedu dzatakabetatuma.

¹⁸Koga imwi mube kutjena ne zwithu zwakalingisanyiwa nge kolomogwa kuti ndizo musitongo zwidanila golomodzo nge kuzwitola. Ha mungathama muijalo mowobe muthama kuti bukotokelo gwenyu Baiziraela gulingisanyiwe ne mang'oni nenge kukolomogwa.

¹⁹Tjimwe ne tjimwe tjakathamiwa nge siliva ne golide ne phangula ne butale ngezwa Yahwe ngono zwakafanila kunobigwa ku matula abo.”

²⁰Ndizo nyanga dzikalidziwa ngono kwakati bathu behwa nsindo we nyanga bakamilidza mahwi bakamimila kwazo ngono guma le Jerikho likawila pasi. Mmwe ne mmwe nthu katambunuka kangina paakalingisana napo ngono bakatola nzi we Jerikho.

²¹Bakapa nzi we Jerikho Yahwe nge kukolomodza tjimwe ne tjimwe tjinotjila muuli balume kene bakadzi, bawola kene batjetjana, ng'ombe ne pkhwizi ne madonki zose bakazwikolomodza nge thumo.

²²Joshuwa kadwa balume babili be shodzi bakabe bashola shango kati, “Yendani ku ng'umba ye fukula iyeyije, muswike muitole nebe nsha wayo, sekwa makatuna kuti mowothama muijalo.”

²³Ndizo bazhuzha be shodzi bakayenda bakanotola Rahabu na tate babe na mmeyabe ne azwadzi dzidze ne makamu awe, ngono bakanobabiga kuzhe kwe bukotokelo gwe Baiziraela.

²⁴Kudwapo bakapisa nzi nkulu Jerikho ne tjimwe ne tjimwe tjimuuli, koga bakatola siliva ne golide ne zwithu zwakathamiwa nge phangula ne zwakathamiwa nge butale bakanozwibiga ku Ng'umba ya Yahwe.

²⁵Koga Joshuwa katjidza fukula Rahabu ne nsha wa tate babe ne makamu awe ngono bakagala ne Baiziraela kuswikila na nasi, ngoti akasumbika batumwa bakabe batumwa ndi Joshuwa kunoshola nzi we Jerikho.

²⁶Ipapo kwakati nzi we Jerikho usinokukolomoka Joshuwa katuna eti, “Yahwe ngabalonge bhiso nthu iye unowomusa nzi nkulu Jerikho. “Ha angati unomusa thiwa dze makuma unowofigwa ne nkololo uwe we mbano we tjilisana. Ha angati unomusa mikoba ye nzi nkulu unowofigwa ne kologwe tjitje.”

²⁷Ndizo Yahwe bakabe na Joshuwa ngono Joshuwa kazibgwa shango yose.