Read Kalanga Joshuwa 7 Bible Online

Joshuwa 7 - Kalanga bible

Joshuwa 7

¹Koga Baiziraela bakabe ne kusagalikabgwe mu zwithu zwakabe zwakafanila piwa Ndzimu, kwakabe kuna nlume unodang'wa Akani, ali nkololo wa Khami, Khami ali nkololo wa Zabadi, Zabadi ali nkololo wa Zera we ludzi gwa Juda. Akani katola zwimwe zwija. Ndizo bushongola gusibushoma gwa Yahwe gukawila bathu be Iziraela.

²Bakati bali ku Jerikho Joshuwa katuma shodzi kuti dzinoshola nzi we Ai. Nzi we Ai wakabapa ne nzi we Batheveni ku bhezhuba kwe Bhetele. Joshuwa wakabadwa kati, “Yendani munoshola shango.” Ndizo shodzi dzikamilika dzikanoshola Ai.

³Bakabuya ngono bakadwa Joshuwa bakati, “Ai aute uli nzi nkulukulu, akutosheteka kuti utumile bathu bose kunounginilila. Ungatumila bathu bangabe zwiwulu zwili zwibili (2 000) kene zwitatu (3 000) koga.”

⁴Ngono balume bangabhata zwiwulu zwitatu (3 000) bakamilika bakanonginilila nzi we Ai koga bakaswika bakatatamigwa ne balume be Ai,

⁵bakabulaya balume be Iziraela bali makumi matatu ana bali batathatu (36), bakatatamila Baiziraela kudwapa nkoba we Ai kunoti ku Shebarimu bakabhata bebatemelela bali pakakungulukila ngono Baiziraela bakatemeka mafupa bakasala bakapelegwa ngotja balume be Ai.

⁶Ngono Joshuwa kapalulanya zwiambalo zwizwe, kanamata akathigama mbeli kwe Bhokisi le Tjidumano tja Yahwe ngono kagala ipapo kuswikila madekwana, ngono iye ne batungamili be Iziraela bakazwilonga hwuluba mu misholo yabo[3].

⁷Ngono Joshuwa katembezela eti, “Dumbu dumbu She Yahwe wangu hwutini makatjuludza bathu ibaba gwizi gwe Jorodani kene? Kutilonga mu maboko e Baamori kuti babalobese kene tjini? Tingabe tiyijeng'o takashatha tili seli yeija ye Jorodani!

⁸Ngono ngwenu She wangu ndingatjatini dumbu sakuno se Baiziraela batatamiligwa kutjena nge zwita zwabo!

⁹Bakanana ne bagali bose be shango iyeyi banowohwa ngekwa ikoku bakatikombela bakanyeledza zina ledu mu shango. Apa mowobe mathamila zina lenyu bubuya kene?”

¹⁰Yahwe bakadwa Joshuwa bakati, “Milika! Wakathingamilani?

¹¹Baiziraela bakatjinya, abazoshingikadza tjidumano tjangu tjandakabadwa, bakatola zwimwe zwithu zwandakati zwisitogwe, bakazwikwiba bakanozwisumbika muna zwabo.

¹²Ndizo wali Baiziraela bakong'wa ngolingisana ne zwita zwabo. Banotizha zwita zwabo ngobe bali pasi kwe bhiso. Anditjowobe namwi kuswikilila mudusa zwithu zwamunazo zwe pasi kwe bhiso.

¹³Milika, utjenapadze bathu, ubadwe uti, ‘Muzwitjenepadzeni muzwilulwamisile la mangwana ngobe mowomuka mushangana na Yahwe Ndzimu wenyu ibo banoleba beti, “Kuna zwithu zwipasi kwe bhiso mu muli, Baiziraela amutowotubula kumililana ne zwita zwenyu kuswikilila mudusa zwithu izwezo zwipasi kwe bhiso mu muli.”

¹⁴Mangwana mangwanana muzhe nge njudzi dzenyu, ngono ludzi gunowobhakhwa ndi Yahwe gowozha nge misha yago, nsha unowobe wabhakhwa ndi Yahwe unowozha nge ng'umba, ng'umba yabhakhwa naiyo izhe nthu nng'ompela ne nng'ompela.

¹⁵Ngono unowowang'wa nge zwithu izwezwi zwipasi kwe bhiso unowopisiwa nge moto nenge tjimwe ne tjimwe tjaanatjo ngobe asalondolodza tjidumano tja Yahwe kakale akathama kuthu kunobhatisa shoni kwazo mu Iziraela.’ ”

¹⁶Ndizo Joshuwa kabinduka mangwanana kwazo kazhisa Baiziraela ludzi nge ludzi ngono kwakatogwa ludzi gwa Juda,

¹⁷kazhisa misha ya Juda ngono kukatogwa nsha wa Zera, kadwapo kazhisa nsha wa Zera nlume nng'ompela ne nng'ompela ngono kudwapo katola Zabadi.

¹⁸Joshuwa kazhisa nsha wa Zabadi ngono kukatogwa Akani nkololo wa Khami, Khami ali nkololo wa Zabadi, Zabadi ali nkololo wa Zera we ludzi gwa Juda.

¹⁹Ngono Joshuwa kadwa Akani kati, “Nkololo wangu, kudza Yahwe Ndzimu we Iziraela, ubape dendo. Undibudze tjawathama, usitongondisumbikila tjimwe.”

²⁰Akani kashandula eti, “Malebeswa, ndatjinyila Yahwe Ndzimu we Iziraela. Yetji nditjo tjandakathama:

²¹Takati tili ku Jerikho abona hazu yakanaka ye Shinari ne mazana mabili e shekele dze siliva (200) ne golide ye bulemo gwe shekele dze siliva dzili makumi mashanu (50) ngono azwikwiba azha nazo. Ndakazwitshila mu nshasha wangu, ndakazwiwalila nge siliva.”

²²Joshuwa katuma batumwa ku nshasha wa Akani ngono bakazwiwana zwakasumbikiwa mu nshasha, zwakawaligwa nge siliva.

²³Bakazwitola bakazwiyisa kuna Joshuwa ne Baiziraela bose ngono bakaswika bezwiwala mbeli kwa Yahwe.

²⁴Joshuwa ne Baiziraela bose bakatola Akani nkololo wa Zera ne siliva ne hazu ne golide ne bakololo ne bakololokadzi babe ne ng'ombe dzidze ne madonki awe ne pkhwizi ne mbudzi dzidze ne nshasha uwe ne tjimwe ne tjimwe tjaanatjo bakayenda nazo ku nkuku we Akhori.

²⁵Joshuwa kan'dwa kati, “Mang'oni mangapani awatilonga muali kene? Yahwe banowokulonga mu mang'oni iyawa nasi.” Ipapo Baiziraela bose bakankikithidza nge mabgwe ngono kudwapo bakakikithidza bose bakabe basala bakabapisa nge moto.

²⁶Pezhugwi kwe itumbu tja Akani bakakowa n'gwi we mabgwe, na nasi n'gwi iwoyo utjiyapo. Ipapo Yahwe bakabuza moyo. Ndizo pathu ipapo kukadang'wa nkuku we Akhori.[4]