Read Kalanga Joshuwa 8 Bible Online

Joshuwa 8 - Kalanga bible

Joshuwa 8

¹Yahwe bakadwa Joshuwa bakati, “Usitje kakale usitemeke mafupa, tola babhayani bose uyende unonginilila nzi we Ai, bona ndakupa mambo we Ai ne bathu babe ne nzi uwe ne shango iye kuti ubakunde.

²Uthame nzi we Ai ne mambo wawo koga sekwa wakathama mambo we Jerikho ne nzi we Jerikho, koga ngwenu mungazwitolela zwithuwo zwabo ne thundu dzabo. Mubalalile shule kwe nzi.”

³Joshuwa ne babhayani bose bakamilika bakalinga ku nzi we Ai, Joshuwa wakabe ashalula balume bakasima bali zwiwulu zwili makumi matatu (30 000) kabatumila busiku kunolalila bathu be Ai

⁴nge ndaulo inoti, “Bhulutanani kwazo. Yendani munolalila bathu be Ai shule kwe nzi wabo, musitongo yendila kulekule nawo. Mose koga mugale makateya zebe.

⁵Ngono imi ne bamwe bose banami towononginilila Ai tingina tili mbeli kwe nzi ngono bathu be Ai banoti bezha kuwotigwisa koga se kutanga, towotizha.

⁶Banowotitatamila kuswikila tabakwebela kulekule ne nzi wabo ndizo banowobe bezwidwa beti, ‘Banotitizha koga se kutanga.’ Ndizo atatizha tatjibe kule kule,

⁷imwi mube mubhuda pa makabalalila mutole nzi wabo. Yahwe Ndzimu wedu banowomupa simba le kubakunda.

⁸Amusinotola nzi we Ai mube muupisa nge moto. Muthame sekwakaleba Yahwe. Mubone kuti moshinga tjandinoleba”

⁹Ndizo Joshuwa kadwa babhayani bali zwiwulu zwili makumi matatu (30 000) kuti batjiyenda kunolalila bathu be Ai. Malalilo abo akabe ali pakati kwe nzi we Bhetele ne ku golombedzo kwe Ai, koga Joshuwa iye kasala ne bamwe bakasala ku bukotokelo.

¹⁰Tjimuka mangwanana Joshuwa ne batungamili be Iziraela bakalulwamisa babhayani, ngono bakamilika bakatungamila babhayani kuyenda ku Ai.

¹¹Balume bose be babhayani bakabe banaye bakasedzela ku nzi we Ai ngono bakanokotokela mbeli kwe nzi ku bunandzwa gwe Ai bakapalalanyiwa nge nkuku pakati kwabo ne nzi.

¹²Joshuwa wakadwa balume bangabhata zwiwulu zwili zwishanu (5 000) kuti banolalila bathu be Ai bali pakati kwe nzi we Bhetele ne we Ai kunomila zhuba kwe nzi.

¹³Bakalulwamisa babhayani bakatola mamo abo, bose bakabe bali mu bukotokelo bakabe bali ku bunandzwa, bakabe bakalalila bathu be Ai ku golombedzo. Joshuwa iye kayenda ku nkuku we Jorodani.

¹⁴Kwakati mambo we Ai ebona babhayani ba Joshuwa, iye ne babhayani babe bose bakabinduka mu mangwanana makulu kunoshangana ne Baiziraela ku tjibata tje Araba kugwa nabo. Koga bakabe basinga zibe kuti kuna babhayani bakabalalila shule kwe nzi.

¹⁵Joshuwa ne Baiziraela bose bakazwithama se bakundiwa ngono bakatizhila kuyendila ku tjilambanyika.

¹⁶Balume bose be Ai bakadang'wa kuti babalonde, ngono bakalonda babhayani ba Joshuwa ngono bakabe kulekule ne nzi.

¹⁷Kwakasala kusina ndodwa ne mbhayani nng'ompela wakasala mu Ai, bose bakatobela Baiziraela.

¹⁸Ndizo Yahwe bakadwa Joshuwa bakati, “Tola thumo limu luboko gugo utendeke ku nzi we Ai, ngoti ngwenu mowokunda bathu be Ai.” Ndizo Joshuwa katendeka nsebe ku nzi we Ai.

¹⁹Wakati koga ethama saikoku babhayani bakabe bakalalila bakamilika tjinyolotjo pabakabe balipo bakangina mu nzi bakatola nzi, tjinyolotjo bakaupisa nge moto.

²⁰Balume be Ai bakati belinga shule kwabadwa bakabona bhulubusi lithungailila ku makole, ngono bakashaya kwabangatizhila, ngobe Baiziraela bakabe betizha bakalinga ku tjilambanyika bakabe bashandukila zwita zwabo.

²¹Ngono Joshuwa ne babhayani babe naibo bakabona bhulubusi ngono bakaziba kuti Baiziraela bamwe banginilila nzi we Ai. Ndizo bakashanduka bakabulaya balume be Ai.

²²Balume bamwe bakazhabo kuwonginilila Baiziraela ngono bakazwiwana bakakombiwa ne balume be babhayani be Baiziraela ngono bakababulaya bose.

²³Koga mambo we Ai iye bakasimbulaye, bakantola ali mpenyu ngono bakansa kuna Joshuwa.

²⁴Baiziraela bakati basinopedza bulaya balume be Ai ku tjibata tje tjilambanyika kwabakabe batatigwa, mmwe ne mmwe wabo bakampedzisa nge thumo, Baiziraela bakashandukila ku Ai bakanobulaya bose bakabe batjatjila mu Ai.

²⁵Mu zhuba ilelo balume be Baiziraela bakabulaya bathu bose mu nzi we Ai. Bakabulaya balume ne bakadzi bali zwiwulu zwili gumi ling'ompela lina bali babili (12 000),

²⁶Joshuwa wakaletjedza thumo lile lakatendeka ku nzi we Ai kuswikilila mmwe ne mmwe unogala mu Ai abulawa.

²⁷Koga Baiziraela bakazwitolegwa thundu ne zwithuwo Yahwe sekwa bakabe badwa Joshuwa.

²⁸Ndizo Joshuwa kapisa nzi we Ai kukasala ili duthu le matongo kuswikila nasi.

²⁹Joshuwa wakasungilila mambo we Ai mu nti kuswikilila madekwana, kwakati zhuba lomila Joshuwa kadwa bathu kuti badeluse mambo we Ai mu nti ngono balashile itumbu tjitje pa nkoba we nzi. Bakabutitika mabgwe asimashoma pezhugwi kukwe. Mabgwe iyawo na nasi atjiyapo.

³⁰Kudwapo Joshuwa wakabakila Yahwe Ndzimu we Iziraela tjibeso tjinopisigwa zwibhayilo mu Dombo le Ebali,

³¹koga Mushe sekwa akabe abudza Baiziraela. Wakabaka tjibeso koga sekwa kwakabe kwakakwagwa mu Lukwalo gwe nlayo gwa Mushe kuyi, “Tjibeso tjinopisigwa zwibhayilo tjakafanila thamwa nge mabgwe azhele asakabezhiwa kakale asakatongo bezhiwa nge tshipi.” Mutjili bakapisila Yahwe zwibhayilo bakazhisa ne zwibhayilo zwinopisiwa zwe mbakisano.

³²Joshuwa kati ali ipapo mbeli kwe Baiziraela kakopela mu bgwe nlayo wakakwagwa ndi Mushe.

³³Baiziraela bose ne bazhi ne beni be shango ne bakulu be nzi ne balauli ne basumikilisi, bakabe bali mile hwunde ne Bhokisi le Tjidumano tja Yahwe bali mbeli kwe bapirisiti bakabe bali Balevi. Gwamu limwe le bathu lakabe lilimile mbeli kwe Dombo le Gerizimu ngono limwe lilimile mbeli kwe Dombo le Ebali koga sekwa Mushe nlada wa Yahwe akabe adusa ndaulo kutanga kuti kushigwe saikoku akupiwa dothodzo.

³⁴Kwakati shule Joshuwa kabala matama wose e nlayo, e makombolelo ne e bhiso koga sekwa kwakakwagwa mu Lukwalo gwe nlayo.

³⁵Akuna ndodwa nge dama ne ling'ompela lakabe lalebgwa ndi Mushe lisakabagwa ndi Joshuwa mbeli kwe gubungano lose le Iziraela ne bakadzi ne bana ne bazhi bose babakabe begala nabo.