Read Kalanga Joshuwa 9 Bible Online

Joshuwa 9 - Kalanga bible

Joshuwa 9

¹Kwakati bomambo bakabe begala kunomila zhuba kwe gwizi gwe Jorodani mu shango ye matombo ne shango yakawila ne yakabapisa Gungwa Bukulu kuyendila ku shango ye Lebanoni neye Bahiti neye Baamori neye Bakanana neye Baperizi neye Bahivi neye Bajebusi behwa ngekwe kukunda kwe Baiziraela,

²bakazwibhatshanya bakabe tjithu tjing'ompela kugwa na Joshuwa ne Baiziraela.

³Bathu be Gibiyoni bakati behwa kuti Joshuwa wakathamilani nzi we Jerikho ne we Ai,

⁴naibo bakaluka maano, bakatola masaka akashakala ne makukhwa e nkumbi we zhambi akalongwa zwibata,

⁵bakaambala bokhwebana bakaphetjiwabo ne zwiambalo zwakashakala. Zojiwa zwabo zose zwakabe zwakawomelela kakale zwakavuva.

⁶Ngono bakayenda kuna Joshuwa ku bukotokelo gwe Baiziraela ku Giligala ngono bakaswika bedwa Joshuwa ne balume be Baiziraela beti, “Todwa ku shango ikule kule ngono tokumbila muthame tjidumano tje mbakiso naswi.”

⁷Ngono balume be Baiziraela bakabhuzwa Bahivi ibaba beti, “Ngatitini mogala pejo naswi, tingathama tjidumano tje mbakiso namwi tjini wali kene?”

⁸Ngono bakashandula Joshuwa beti, “Ti balanda benyu.” Koga Joshuwa kababhuzwa eti, “Ndimwi boani kakale modwa ngayi?”

⁹Bakanshandula beti, “Balanda benyu, banodwa ku shango ikule kule ngekwe ndumbidzo ya Yahwe Ndzimu wenyu na zose zwabakashinga ku Egipiti

¹⁰ne tjimwe ne tjimwe tjabakathama bomambo babili be Baamori, Sihoni mambo we Heshibhoni na Ogi mambo we Bhashani wakabe egala ku Ashitaroti.

¹¹Batungamili bedu ne bathu bose be shango yedu banogala mu shango yedu bakatidwa beti, ‘Tolani mbuba mululwamisile gwendo munoshangana nabo ngono muswike mubadwe muti, “Ti balanda benyu, thamani tjidumano tje mbakiso naswi,” ’

¹²Bonani zojiwa zwedu, zwakabe zwipisa patakamilika tizha ngeno ngono ngwenu bonani zwatjiwomelela kakale zwavuva,

¹³makukhwa edu e nkumbi we zhambi akabe ali matshwa patakaadila nkumbi ngono ngwenu sekwa munobona atjipubuka. Zwiambalo zwedu ne shangu dzedu dzatjishakala nge gwendo bulefu.”

¹⁴Baiziraela bakanokola zojiwa bakalabila basashakisisa nge kwako muna Yahwe.

¹⁵Ngono Joshuwa kathama tjidumano tje mbakiso nabo kabaletjedza bakagala nabo, ne batungamili be gubungano bakasisithila nge kutuna.

¹⁶Kwakati shule kwe mazhuba matatu basino thama tjidumano tje mbakiso ne bathu be Gibiyoni, Baiziraela bakahwa kuti Bagibiyoni babakidzani babo.

¹⁷Ndizo Baiziraela bakamilika bakatola gwendo kukati shule kwe mazhuba matatu bakanoti ku mizi yabo ye Gibiyoni ne Khefira ne Bheeroti ne Kiriatijearimu.

¹⁸Koga Baiziraela bakasibanginilile ngobe batungamili be gubungano bakabe batuna na Yahwe Ndzimu we Iziraela. Gubungano lakang'ong'ola ngekwe batungamili nge kwako

¹⁹koga batungamili bakadwa gubungano beti, “Takatuna kale na Yahwe Ndzimu we Iziraela, kuti atingalonge bathu ibaba luboko.

²⁰Ngono ngwenu etji nditjo tjatinowothama nge kwabo. Ngobe takatuna kale towobaletja bakatjila kuti ndizo bushongola gwe Ndzimu gusitiwile ngosashingikadza Tjidumano tjedu nabo.”

²¹Batungamili bakabadwa beti, “Mubaletje bagale, koga banowobe batemi be hwuni ne batjeli be vula betjelela gubungano lose.” Ndizo batungamili bakashingikadza tjabakabe bagadzabgwe.

²²Ndizo Joshuwa kadana balume be Gibiyoni ngono kabadwa kati, “Ini matitjengela nge kutidwa muti, ‘Togala kulekule namwi,’ koga mu gala ipapa pejo pejo naswi kene?

²³Muna bhiso, mowogala koga muli batemi be hwuni ne batjeli be vula be Ng'umba ye Ndzimu wangu kuswikilila.”

²⁴Bakadabila Joshuwa beti, “Balanda benyu bakabudziwa zubuyanana kuti Yahwe Ndzimu wenyu bakadwa nlada wabo Mushe kuti amupe shango yose ne kuti mulobese bagali bose bayo. Ndizo takatja nge kwenyu tibetithama saikoku.

²⁵Tabe mu maboko enyu ndizo mungathama tjimwe ne tjimwe tjamunobona tjakamululwamila nge kwedu.”

²⁶Ndizo Joshuwa kabatjidza mu Baiziraela kakale bakasibabulaye.

²⁷Koga Joshuwa wakabathama batemi be hwuni ne batjeli be vula ye gubungano lose neye tjibeso tjinopisigwa zwibhayilo tja Yahwe. Na nasi kose batjathama saikoku mu magalo ashalugwa ndi Yahwe.