Read Kalanga 2 Batesalonika 2 Bible Online

2 Batesalonika 2 - Kalanga bible

2 Batesalonika 2

¹Ngekwe kuzha kwa She wedu Jesu Kirisiti ne kukubungana kwedu kuti tishangane naye, tomukumbila zwikamu

²kuti musitongo shangana misholo kene mukapalukamoyo, muyitiwa nge bulebesambeli kene mbiko kene lukwalo, zwinoyi zwakadwa ku tili guti zhuba la She lakatjizha kale.

³Kushaye unomutjebela nge imwe zila, ngobe zhuba ilelo alitowozha kudzina kupanduka kuzha, na iye mbiimbi ezumbunugwa, iye wakabigigwa kuloba.

⁴Unowonyanyayidza, kazwibiga pezhugwi kwe tjimwe ne tjimwe tjinodang'wa kuyi ndzimu kene tjinothigamigwa, naiko unowozwibiga pezhugwi mu Ng'umba ye Ndzimu, ezwidana eti Ndzimu.

⁵Apa amutoalakana kene kuti ndakati ndi namwi ndakabe ndimubudza zwithu izwezwi?

⁶Ngono ngwenu moziba kuti wakabhakhwa ngeni. Moziba kuti wakabhatigwa kuti akowozumbunugwa nge tjibaka tjakalingisana.

⁷Ngobe simba gulu biibi lakasumbikala loshinga kale, koga lowozumbunugwa ha iwoyo wakalibhata adusiwa mu zila.

⁸Ngono mbiimbi unowozumbunugwa, ngono She Jesu unowombulaya nge meya ye nlomo uwe, kanlobesa ngekwe kuzha kukwe.

⁹Kuzha kwe mbiimbi kowobe kuli kushinga kwa Satani, iye uno shingisa masimba akasiyana siyana nenge zwilakidzo ne matjenamiso e manyepkhwa,

¹⁰nenge bubi gose gwakasiyana siyana gwe butjakwani gunotjebela ibabo banowoloba, ngobe bakalamba kuda malebeswa kuti ndizo batjidziwe.

¹¹Ngekwa ikoku Ndzimu unobatumila tjidzimilabgwe tjikulu kuti ndizo bagalemoyo mu manyepkhwa,

¹²kuti ndizo basakagalamoyo mu malebeswa koga bakazipigwa nge mbipo, bose babong'we nlandu.

¹³Koga takafanila kuboka Ndzimu misi yose nge kwenyu zwikamu zwinodiwa ndi She, ngobe kudwa tjose mu kutangisa, Ndzimu wakamushalulila kutjidziwa nge nshingo we Meya inoyengemadza nenge kugalamoyo kwenyu mu malebeswa.

¹⁴Wakamudanila ikoku nge ndebo mbuya yedu kuti namwibo mube ne gobe mu gudzo la She wedu Jesu Kirisiti.

¹⁵Ndizo, zwikamu, imani makasima kakale mubhatilile mu zwidiyo zwatakapitshila kumuli ne nlomo kene nge lukwalo.

¹⁶Dzene tshene She wedu Jesu Kirisiti nge kukwe ne Ndzimu Tate bedu, ibo bakatida, kakale bakatipa nyaladzo isingapele ne kugalabgwe kwakalulwama nge ngoni dzabo,

¹⁷dzene bangadwilila bakasimisa mimoyo yenyu, mu nshingo mmwe ne mmwe wakanaka nenge dama lakanaka.