Read Kalanga 2 Batesalonika 3 Bible Online

2 Batesalonika 3 - Kalanga bible

2 Batesalonika 3

¹Tjebupelo zwikamu, mutitembezelele kuti dzene tshene dama la She lingaandama tjinyolotjo, likakunda, sekwa lakathama mu muli.

²Kakale mutembezele kuti dzene tingasunungugwa mu bathu bakabipa ne babi, ngobe ate mmwe ne mmwe unogalamoyo.

³Koga She banogalikabgwe, ndizo banowomusimisa bakamubakilila mu bubi.

⁴Todwilila tigalabgwe mu muli muna She, kuti mowodwilila muthama zwithu zwatinomutuma.

⁵Dzene tshene She bangalingisa mimoyo yenyu ku ludo gwe Ndzimu ne mukudzikitadza kwa Kirisiti.

⁶Muzina la She wedu Jesu Kirisiti, tomulaya zwikamu, kuzwidusa mu ikamu tjimwe ne tjimwe tje simbe kakale tjisingatjile kuyendidzana nge kudiya kwamakaamutjila mutili.

⁷Ngobe imwi nge kwenyu moziba kutobela tjilakidzilo tjedu. Takabe tisisimbe ti namwi,

⁸kakale akuna watakajila zojiwa zwizwe tisalipa. Koga takashinga siku ne sikati, tishinga titukutila kuti ndizo tisibe ntolo kummwe wenyu.

⁹Takathama ikoku kusi kuti atina fanilo mu bhatsho iyeyi, koga takabe tizwithama tjilakidzilo kumuli tjamungatobela.

¹⁰Ngobe ne ti namwi, takamupa ndayo iyeyi, “Ha nthu asingashinge aatowoja.”

¹¹Tohwa kuyi bamwe pakati kwenyu ndi bomashwaushingani, abatoshinga; tjabanoziba koga hwunginikana nge zwithu zwe bamwe.

¹²Bathu bakajalo tobalaya kakale tobakulumbidza muna She Jesu Kirisiti kuti badzikame bashingile zojiwa zwabanoja.

¹³Ngono imwi, zwikamu, musitongo nyadziwa ngoshinga tjakalulwama.

¹⁴Ha mmwe asingahwe ndayo yedu mu lukwalo igogu, munlonge zhisho. Musishingidzane naye, kuti ndizo abhakhwe nge shoni.

¹⁵Musintole se tjita koga muntjemele se ikamu.

¹⁶Ngwenu dzene tshene She we mbakiso nge kukwe angamupa mbakiso mu zwibaka zose nenge mu zila dzose. She ngababe namwi mose.

¹⁷Imi Paulo ndozwikwalila nge luboko gwangu dumiliso iyeyi, ngono ikoku ndigo lutjwayo gwe lukwalo gwangu gumwe ne gumwe. Ndiko sekwa ndinokwala.

¹⁸Dzene tshene ngoni dza She wedu Jesu Kirisiti dzingabe namwi mose.