Read Kalanga 1 Timoti 1 Bible Online

1 Timoti 1 - Kalanga bible

1 Timoti 1

¹Ndimi Paulo ntumwa wa Kirisiti Jesu nge ndayo ye Ndzimu Ntjidzi wedu na Kirisiti Jesu, iye kugalabgwe kwedu.

²Kuna Timoti nkololo wangu tjose mu bugalimoyo: Ngoni ne mahwilo zogwadza ne kunyalala kunodwa ku Ndzimu Tate na Kirisiti Jesu She wedu ngakube nawe.

³Sekwa ndakakukulumbidza ndiyenda ku Makedoniya, gala ku Efeso, kuti ndizo udwe bamwe bathu kuti basidiye zwidiyo zwipoga,

⁴kene kuzwipa mu ngano ne mazina e lutshinga gwa bobatategulu asingapele. Oku kozhisa kunyanyayidzana mu bumo gwe nshingo we Ndzimu, iwo unozha nge kugalamoyo.

⁵Mazwimisilo e ndayo iyeyi ludo, igo gunodwa mu moyo mbuyanana ne njalakang'wa mbuyanana ne kugalamoyo kwe malebeswa.

⁶Bamwe bakabhuda muna izwezwi, ngono bakalashika nge kushandukila ku ndebo dzisina nshingo.

⁷Banoyemula kube badiyi be nlayo koga abatoziba tjabanoleba nanga naizo zwabanoti i lebeswa dumbu.

⁸Toziba kuti nlayo wakanaka, ha nthu eushingisa zubuyanana,

⁹eziba kakale kuti nlayo auzothamigwa bathu bakalulwama, koga wakathamigwa basingaulondolodze ne basingahwe, basingazibe Ndzimu ne batjinyi, basakayengemala ne basinganamate Ndzimu, ibo banobulaya botate kene bomme yabo, babulayi,

¹⁰phombgwe ne betjilume banowalilana thobo ne banotenga betengesa balanda ne banyepi ne banopa butendeki gwe manyepkhwa ne tjimwe ne tjimwe tjinonyanyayidzana ne zwidiyo zwakatambunuka,

¹¹zwinodumana ne ndebo mbuya yandakapiwa, ye Ndzimu una gudzo kakale una makombolelo.

¹²Ndoboka Kirisiti Jesu She wedu, iye wakandipa matatabuko, ngobe wakandibona ndili unogalikabgwe, ngekundishalulila nshingo uwe.

¹³Nenguba ndakatongo ntuka, ndikandziyidza ndikansapula, koga ndakahwigwa ngoni ngobe ndakashinga sa ikoko nge kusaziba nenge kusagalamoyo.

¹⁴Ngono She wakadila ngoni dzidze dzikazhala tupu mundili nge kugalamoyo ne ludo zwimuna Kirisiti Jesu.

¹⁵Ndebo ye lebeswa dumbu yakwako, yakafanila amutjigwa nge buzhalo ndi eyi, Kirisiti Jesu wakazha mu shango kutjidza batjinyi, ibo bandinopinda bose mu butjinyi.

¹⁶Koga ndakahwigwa ngoni, kuti ndizo mundili, imi ntjinyi unopinda bose, Jesu Kirisiti alakidze bumoyonlefu gugwe, tjili tjilakidzilo tja ibabo banowogalamoyo munli, ngono bakawana butjilo gusingapele.

¹⁷Ngwenu ngakube ne kuteta gudzo nge kusingapele kose kuna Mambo tjose, usingafe kakale usingaboneke. Ngakujalo.

¹⁸Timoti nkololo wangu, ndokupa ndayo iyeyi kuyendidzana nge kulebesambeli, kwakalebgwa nge kuko kuti ndizo mukusima kuko mukutobela bulebesambeli igogu, ungagwa ngwa yakanaka,

¹⁹wakabhatilila mu kugalamoyo ne hana mbuyanana. Bamwe bakalamba kuhwilila hana dzabo, ndizo bakatjinya kugalamoyo kwabo,

²⁰mubali ili Himeneo na Alekizanda, ibo bandakapa Satani kuti bazwidiye kusatuka Ndzimu.