Read Kalanga 1 Timoti 3 Bible Online

1 Timoti 3 - Kalanga bible

1 Timoti 3

¹Ndebo iyeyi malebeswa: Ha mmwe eyemula kube nlingi we gubungano[1] unoyemula nshingo nkulu.

²Ngono nlingi we gubungano wakafanila kube akatambunuka, ali nlume we nkadzi nng'ompela, akadzikama, akatitja, ana ntutshi, ana buthu, etubula diya,

³asingalaladze, asina ngwa, koga ana moyo nnyolo, asina zhoba, asingade mari.

⁴Wakafanila tubula kuyendisa nsha uwe zubuyanana, ediya bana babe kunhwa, benteta kwakafanila.

⁵Ha nlume asingazibe kuyendisa nsha uwe, apa ungatjengeta gubungano le Ndzimu tjini kene?

⁶Azofanila kube ali nthu wakashanduka ngwenu, ngobe ungadwa ezwikudza ndizo kasumikilisiwa sekwa Satani akasumikilisiwa.

⁷Wakafanila kube ana zina buyanana muna bakuzhe, kuti ndizo asitobokiwe kawila mu dati la Satani.

⁸Batiyakoni na ibobo bakafanila kube balume banofanigwa nge kutetiwa, bana malebeswa, basingagale ngolaladza kakale basina bugovu gwe fumwa.

⁹Bakafanila bhatilila mu malebeswa e kugalamoyo bana hana mbuyanana.

¹⁰Bakafanila lingisisiwa kutanga, ngono ha kusina tjimwe tjisakalingisana nge kwabo, ngabashinge bali batiyakoni.

¹¹Sa ikoko, bakadzi[2] bakafanila kube bakadzi bakafanigwa ngotetiwa, basi banotjinya bamwe mazina, koga bali gedzikane, begalikabgwe mu tjimwe ne tjimwe.

¹²Ntiyakoni wakafanila kube nlume we nkadzi nng'ompela, kakale wakafanila kulela bana babe ne nsha uwe zubuyanana.

¹³Ibabo banoshinga zubuyanana banowana tjimo tjakanaka nenge ganyo mu bugalimoyo gwabo muna Kirisiti Jesu.

¹⁴Nenguba ndigalabgwe kuzha ku kuli tjinyolotjo, ndokukwalila milayo iyeyi kuti ndizo

¹⁵ha ndinonoka, unowoziba bathu sekwa bakafanila kuzwibhata mu ng'umba ye Ndzimu, ilo gubungano le Ndzimu unotjila, phanda ne luswingo gwe malebeswa.

¹⁶Nge malebeswa akuna ungalamba masazibgwe e bugalimoyo gwedu: Wakazha ali nthu, Meya ikalakidza kuti unolebesa, kabong'wa nge batumwa be kudzimu. Kasumikigwa pakati kwe zwitjaba, kukagagwamoyo munli mu shango yose katolegwa kudzimu mu gudzo.