Read Kalanga 1 Timoti 4 Bible Online

1 Timoti 4 - Kalanga bible

1 Timoti 4

¹Meya inoleba kulipatjena kuti, mu zwibaka zwe bupelo bamwe banowosiya kugalamoyo, ngono bakatobela meya inotjebela ne zwidiyo zwinodiyiwa nge meya mibi.

²Zwidiyo izwezo zozha nge batjebeli be banyepi, be hana dzakadingindila dzonga dzakababugwa.

³Banodzibila bathu kulobola, bebadziba kuti basije zwimwe zojiwa zwakathamiwa nge Ndzimu kuti zwiamutjigwe nge kutenda ndi ibabo banogalamoyo ne banoziba malebeswa.

⁴Ngobe tjimwe ne tjimwe tjakathamiwa nge Ndzimu tjakanaka, kakale akuna tjakafanila lambiwa ha ili kuti tjoamutjigwa nge kutenda,

⁵ngobe tjayengemadziwa nge dama le Ndzimu ne ntembezelo.

⁶Ha ubudza zwikamu zwithu izwezwi, unowobe nshingi wakalulwama wa Kirisiti Jesu, wakakudzigwa mu malebeswa e kugalamoyo ne kudiya kwakalulwama kwamakatobela.

⁷Koga thubukanani ne ngano ne dumilo dze manyepkhwa dzisi mu Ndzimu, uzwiwolobedze kutjila butjilo gwe kunamata Ndzimu.

⁸Kusimisa mbili kwakalulwama, koga kunamata Ndzimu kwakalulwamila zwithu zose, ngobe kogadzabgwe mu butjilo guno ne butjilo gunozha.

⁹Ndebo ye malebeswa inoshaka kuamutjigwa nge buzhalo ndi eyi:

¹⁰Ngoti toshinga kwazo ngekuti takabiga kugalabgwe kwedu mu Ndzimu unotjila, iwo Ntjidzi we bathu bose, kwazo ibabo banogalamoyo.

¹¹Laya, udiye zwithu izwezwi.

¹²Kushaye unokudeyelela ngobe uli ntjetjana, koga bigila bagalimoyo tjilakidzilo nge tjaunoleba nenge mu mazwiibhato awo mu ludo, mu kugalamoyo ne mu bubuyanana.

¹³Kuswikila ndizha ugale ubalila bathu hwalo dze Ndzimu ne kubalaya ne kubadiya.

¹⁴Usishayile hanya tjipo tjitjo tjawakapiwa nge kubigiwa maboko nge Gulukota le bakulu, ili thumo ye bulebesambeli.

¹⁵Shinga zwithu izwezwi, uzwipe muzwili nge buzhalo, kuti ndizo mmwe ne mmwe abone kudwilila mbeli kuko.

¹⁶Utjengete butjilo gugo kwazo ne tjaunodiya, uzwibhatilile mutjili, ngobe ha uijalo unowozwitjidza iwe kose ne bahwilili babo.