Read Kalanga 1 Timoti 6 Bible Online

1 Timoti 6 - Kalanga bible

1 Timoti 6

¹Bose bamu jokwi le bulanda bakafanila linga botetshi bali bathu banofanigwa nge kutetiwa kwakapelela, kuti ndizo zina le Ndzimu ne zwidiyo zwisitjinyiwe.

²Ibabo bana botetshi banogalamoyo abazofanila kubashayila mazwibhato ngobe bali zwikamu. Koga bakafanila kubashingila kupinda, ngobe ibabo banobuyigwa mu nshingo wabo bagalimoyo kakale bali badiwa. Ezwi ndizo zwithu zwawakafanila kubadiya ne kubalaya.

³Ha mmwe ediya zwidiyo zwipoga, asingadumane ne zwidiyo zwe malebeswa zwa She wedu Jesu Kirisiti ne zwidiyo zwinoyendidzana ngotja Ndzimu,

⁴unozwida kakale akuna tjaanoziba. Unohwanana nge kunyanyayidzana nenge kukakabadzana ngekwe matama kunozhisa ndandala ne kutukana ne ndebo dzinotjinya bamwe mazina, kukumbulila kwakabipa

⁵nenge kusayendidzana kusingapele pakati kwe bathu be mikumbulo yakaleleka bakalashikigwa nge malebeswa, kakale banokumbula kuti kunamata Ndzimu ndiyo zila ye kuwana fumwa ye mari.

⁶Koga kunamata Ndzimu, i mbuyilo hwulu, ina kugutshika nge tjaunatjo.

⁷Ngobe akuna tjatakazhisa mu shango, akuna tjatinowotola mu shango iyeyi.

⁸Koga ha kuli kuti tina zojiwa ne zwiambalo, takafanila kugutshiwa ndi ikoko.

⁹Koga ibabo banoshaka kufuma, banowowila mu kulikwa ne mu dati le njemulo njinji dze bulengwe dzinokubadza, kakale dzinolashila nthu mu kuloba ne kukolomoka.

¹⁰Ngobe ludo gwe mari ndigo ndzi we bubi gose, bamwe bathu, ngoda mari, bakabhuda mu kugalamoyo, ngono bakazwihwisa zogwadza kunjinji.

¹¹Koga iwe nthu we Ndzimu, tizha ikoku kose, uzwimisile ndulamo ne kutja Ndzimu ne kugalamoyo ne ludo ne kudzikitadza nenge moyonnyolo.

¹²Igwa ngwa mbuyanana ye bugalimoyo. Uwane butjilo gusingapele gwawakadanigwa pawakazwileba bugalimoyo gugo kwakatambunuka mbeli kwe batendeki banjinji.

¹³Mu mesho e Ndzimu iwo unopa tjimwe ne tjimwe butjilo ne mu mesho a Kirisiti Jesu iye wakati epa butendeki mbeli kwa Pontiyo Pilato kazwileba kwakatambunuka, ndokulaya kuti

¹⁴ulondolodze ndayo iyeyi kusina itoyi kene nlandu kuswikila kuboneka kwa She wedu Jesu Kirisiti,

¹⁵iko Ndzimu kwaunowozhisa nge tjibaka tjawo, Ndzimu iwo una makombolelo, iwo Mbusi ali yega. Iye Mambo wa bomambo, kakale She wa boshe,

¹⁶iwo woga usingafe, kakale unogala mu tjedza tjisingasedzegwe kutjili, usina wakatongo ubona kene ungaubona. Ngakubepo gudzo ne simba lisingapele kuuli. Ngakujalo.

¹⁷Idwa ibabo bakafuma fumwa ye shango iyeyi, kuti basishiye kene kubiga kugalabgwe kwabo mu fumwa dzisina malebeswa, koga bagalebgwe mu Ndzimu, iwo unotipa nge buzhalo tjimwe ne tjimwe tje kushatha kwedu.

¹⁸Bakafanila kuthama zwakalulwama, babe ne fumwa mu mishingo yakalulwama ne kupana nenge kuzwimisila kukobana ne bamwe.

¹⁹Nge zila iyeyi, banowozwibigila thiwa yakalulwama ye mangwana, kuti ndizo bawane butjilo gwe malebeswa.

²⁰Timoti, lisa tjawakapiwa mu maboko awo. Thubukana ne ndebo dzisina bundzimu nenge kukakabadzana kwe bulengwe iko kunodang'wa “Luzibo,”

²¹bamwe gwabakati banago ngono nge zila iyeyi bakabhuda mu kugalamoyo. Ngoni dze Ndzimu dzibe namwi.