Read Kalanga 2 Timoti 1 Bible Online

2 Timoti 1 - Kalanga bible

2 Timoti 1

¹Ndimi Paulo ntumwa wa Kirisiti Jesu nge kuda kwe Ndzimu, kuyendidzana nge kugadzabgwe kwe butjilo gumuna Kirisiti Jesu.

²Kuna Timoti nkololo wangu unodika. Ngoni ne mahwilo zogwadza ne kunyalala kunodwa ku Ndzimu Tate na Kirisiti Jesu She wedu ngakube nawe.

³Ndotenda Ndzimu, iwo wandinoshingila nge hana mbuyanana sa bobatategulu bangu bakabe beushingila, ndimukumbula misi yose mu mitembezelo yangu.

⁴Ha ndikumbula mishodzi iyo, ndoyemula siku ne sikati kukubona kuti ndizo ndizhale kushatha.

⁵Ndoalakana kugalamoyo kuko kwakwako, kugalamoyo kwakabe kuli muna kuku babo Loisi kutanga, na mmeyabo Yunisi, koga ngwenu ndina malebeswa ekuti kwabe mukuli.

⁶Ndizo ngekwa ikoku ndikualakanisa kuti uthutidze tjipo tje Ndzimu tjimukuli nge kukubiga maboko kwangu.

⁷Ngobe Ndzimu auzotipa meya ye bugwala koga wakatipa meya ye simba neye ludo neye kuzwiibhata.

⁸Ndizo usibhakhwe nge shoni kuleba ngekwa She wedu, kene nge kwangu imi nsungwa ngekukwe. Koga bhatana nami mu kudziyilila ndebo mbuya, nge simba la She,

⁹ibo bakatitjidza bakatidanila ku butjilo gwakayengemala, kusi ngekwe tjimwe tjatakashinga koga ngekwe mazwimisilo awo ne ngoni dzawakatipa muna Kirisiti Jesu ntolo tjose,

¹⁰koga ngwenu kwakazumbunugwa nge kuzha kwe Ntjidzi wedu, Kirisiti Jesu, iye wakakolomola simba le lufu ngono kazhisa butjilo nenge kusafa pa tjedza nge ndebo mbuya.

¹¹Ngekwe ndebo mbuya iyeyi ndakashalugwa kube nsumikili ne kube ntumwa nenge kube n'diyi.

¹²Ndizo ndidziyila sekwa ndinodziyila. Koga anditobhakhwa nge shoni, ngobe ndoziba wandakagalamoyo munli, ngoti ndina lebeswa lekuti unotubula kulisa tjandakapiwa mu maboko angu[1] kuswikila Zhuba ilelo.

¹³Tjawakahwa ndimi, utjibhate tjili tjilakidzilo tje kudiya kwakwako, mu kugalamoyo kose ne mu ludo zwimuna Kirisiti Jesu.

¹⁴Tjengeta lebeswa lawakapiwa nge Meya yakayengemala inogala mutili.

¹⁵Unoziba kuti bose bamu ntuthu we Ezhiya bakandifupatila, ngono mubali kuli Figelo na Hemogenesi.

¹⁶Dzene She angahwila zogwadza be nsha wa Onesiforo, ngobe kanjinji wakandisimisa kakale aazobhatisiwa shoni nge ketani dzakandisunga,

¹⁷koga wakati eswika ku Roma, kandishaka kwazo kadzina kandiwana.

¹⁸Dzene She banganhwila zogwadza mu Zhuba ilelo! Kakale unoziba zubuyanana kuti wakabhatsha kungapani ku Efeso.