Read Kalanga 2 Timoti 2 Bible Online

2 Timoti 2 - Kalanga bible

2 Timoti 2

¹Ndizo iwe nkololo wangu, sima mu ngoni dzimuna Kirisiti Jesu,

²ne muna zwawakandihwa ndileba mbeli kwe batendeki banjinji, uzwipe balume banogalikabgwe banowotubula kudiya bamwe.

³Dzikitadzila kudziyila se mbhayani wakalulwama wa Kirisiti Jesu.

⁴Akuna mbhayani umu nshingo unonginikana nge zwithu zwe bathu basi babhayani, ngekuti mazwimisilo awe hwushathisa iye wan'danila ngwa.

⁵Tjilabuki atjitoambadziwa tjiala kuzhe kwe tjapedza labuka kuyendidzana nge milayo ye labuka.

⁶Nlimi unoshinga kwazo ndiye wakafanila wana kutanga gobe le zwijo.

⁷Ukumbule kwazo tjandinoleba, ngobe She banowokupa hwisiso ye tjimwe ne tjimwe.

⁸Alakana Jesu Kirisiti, kuti wakamuka mu bafi, iye tjizekugwana tja Dafite sekwa ndinosumikila mu ndebo mbuya yangu,

⁹ndebo mbuya yandinodziyilila kwandinodzina asungwa nge ketani se tjigebeng'a. Koga dama le Ndzimu alizosungwa nge ketani.

¹⁰Ndizo ndodzikitadzila tjimwe ne tjimwe ngekwe bashalugwa kuti ndizo na ibobo bawane jidzo li muna Kirisiti Jesu ne gudzo lalo lisingapele.

¹¹Eyi ndebo malebeswa, “Ha takafa naye, towotjilabo naye.

¹²Ha tidzikitadza, towobusabo naye. Ha tinzwilandula, unowotizwilandulabo.

¹³Ha tisina kugalikabgwe, iye unowobe ne kugalikabgwe koga, ngobe aangazwilandule.”

¹⁴Ubakumbuludze zwithu izwezwi. Ubatjemelele mbeli kwe Ndzimu kukangazhana ngekwe matama, akuna nshingo, koga kobulaya ibabo bakahwilila.

¹⁵Gwisa kwazo kuzwilakidza mbeli kwe Ndzimu se wakaamutjigwa, uli nshingi usingawoti kabhakhwa nge shoni, unobhata zubuyanana dama le malebeswa.

¹⁶Uzwiduse mu ndebgwana dzisina bundzimu, ngobe dzowokwebela bathu kule ne Ndzimu.

¹⁷Kudiya kwabo kowonyikishila se londa lisingapole, mubali kuli Himeneo na Fileto

¹⁸ibo bakapambuka mu malebeswa ngobhatilila mukuti kumuka kwe bafi kwakapinda kale, ngono banobulaya kugalamoyo kwe bamwe.

¹⁹Koga, thiwa ye Ndzimu yakasima aitozunguzika, muili kwakakwagwa matama awa, “She banoziba bathu babo,” ngono, “Iye unodana zina la She wakafanila kufupatila bubi.”

²⁰Mu ng'umba hwulu kuna zwithu zwisi zwe golide ne siliva koga, kuna zwakathamwa nge lukuni ne ntapkhwi, zwimwe zwakathamigwa mishingo inokudziwa zwimwe isingakudziwe.

²¹Ha nthu ezwitjenapadzila mishingo isingakudziwe, unowobe tjishingisiwa tje mishingo inokudziwa, eyengemadziwa, ana bhatsho kuna botetshi be ng'umba, kakale akalulwamila kushingisigwa nshingo wakalulwama.

²²Utjile kule njemulo mbi dze buzhuzha koga uzwimisile ndulamo ne kugalamoyo ne ludo ne kunyalala kang'ompela na ibabo banonamata She nge moyo wakatjena.

²³Ube kutjena ne kukangazhana kwe bulengwe gwe kushaya luzibo, ngobe unoziba kuti kozhisa zhoba.

²⁴Nlanda wa She aazofanila kube nthu we zhoba, koga wakafanila kube ne buthu ku mmwe ne mmwe, etubula kudiya ana moyonlefu,

²⁵etjemela banonnyanyayidza nge bunyolo, pamwe swiyo Ndzimu ungabapa kushandukila matjinyo abo bakapelela baziba malebeswa,

²⁶ndizo bakapudzumuka mu dati la Satani iye wakabathama basungwa mu kulondolodza kuda kukwe.