Read Kalanga Tito 1 Bible Online

Tito 1 - Kalanga bible

Tito 1

¹Ndimi Paulo nlanda we Ndzimu kakale ndili ntumwa wa Jesu Kirisiti kudwilidza bugalimoyo mu bashalugwa be Ndzimu nenge kudwilidza mubali luzibo gwe bundzimu gwe malebeswa,

²gwe kugalabgwe kwe butjilo gusingapele kwatakapiwa ntolo ntolo nge Ndzimu usingatongo nyepa,

³ngono kukati mu tjibaka tjakafanila kugadziwabgwe ikoku kukadwila patjena mu dama lawo, nshingo we kudiya wandakapiwa nge ndaulo ye Ndzimu, Ntjidzi wedu.

⁴Kuna Tito, mwana wangu mu bugalimoyo gwatinago tose: Ngoni ne kunyalala kunodwa ku Ndzimu Tate na Kirisiti Jesu Ntjidzi wedu ngadzibe nawe.

⁵Etji nditjo tjakathama kuti ndi kusiye ku Kirete, kuti upedzise zwakabe zwisapela, kakale ushalule bakulu mu makubungano, mu mizi yose sekwa ndakakudwa.

⁶Washalugwa kube nkulu wakafanila abe ali nlume usina nlandu waangatilikiwa, ali nlume we nkadzi nng'ompela ana bana banoteedza bazwadzi kakale basingazwilashilile.

⁷Ngekwe ntungamili we gubungano[1] se ali ntjengeti we ng'umba ye Ndzimu, wakafanila kuti asibe ne nlandu. Aazofanila kube nge mazwikudzo kene kube moyana kene kube tjidakwa kene kube govu le fumwa,

⁸koga wakafanila kube ne nzhazho, kakale ade zwakanaka, azwilise, abe nthu wakatambunuka, akayengemala kakale ezwibhata.

⁹Wakafanila dwilila akasimisila mu dama le malebeswa sekwa akalidiyiwa, kuti ndizo atubule kulidiya nge zila yakalingisana, kuti ndizo akunde banyanyayidzi babe.

¹⁰Nge kuti kuna balume banjinji be bapanduki, banoleba ndebo dzisina tjadzinodwa kakale bali batjengedzi,[2]

¹¹Bakafanila kunyaladziwa mu zwithu zwabanoleba, nge kuti banodzonga misha yakabakwa, nge kudiyila mbuzilo ye mari isina nshingo bediya ngekwe zwithu zwa basaka fanila kudiya nge kwazo.

¹²Mmwe wabo, we nlebesambeli, wakati, “Bakirete banyepi misi yose, bazwibandana zwibiibi, basimbe dze magovu.”

¹³Butendeki igogu malebeswa, ndizo ubatjemele wakasima, kuti ndizo babe nge bugalimoyo gwakasima,

¹⁴mu bumo gwe kuteedza zwilebo zwe tjilenje tje Bajuta, kene milayo ye bathu banolasha malebeswa.

¹⁵Ku bathu babuyanana zwithu zose zwibuyanana, koga kuna ibabo babi kakale basingagalemoyo, akuna tjibuyanana. Njalakang'wa dzabo ne hana dzabo imbimbi.

¹⁶Banoleba kuti banoziba Ndzimu, koga banoulandula nge mishingo yabo, banoshimisa, kakale abatohwa, akuna tjakalulwama tjabakalizanila kutjishinga.