Read Kalanga Tito 2 Bible Online

Tito 2 - Kalanga bible

Tito 2

¹Koga iwe udiye tjinodumana ne zwidiyo zwe malebeswa.

²Udwe balume bahwola kuti badzikame, babe nge njalakang'wa dzakalulwama bazwibhate, babe ne bugalimoyo ne ludo ne kusimisila.

³Udwe bakadzi bahwola kuti na ibo bathame sa ikokobo, kuti babe ne mazwiibhato anoyemulika, basi banyepi kene balanda be zwing'o. Bakafanila kudiya tjakalulwama,

⁴kuti ndizo badiye bakadzi batjetjana kuda balume babo ne bana babo,

⁵kuti bazwibhate, babe babuyanana bashinge mishingo yabo ye mu nzi, babe ne buthu, kakale bazwiyise pasi mu balume babo, kuti ndizo dama le Ndzimu lisilingigwe pasi.

⁶Sa ikoko ukulumbidze bazhuzha kuzwibhata.

⁷Uthame kuti mu tjimwe ne tjimwe tjaunothama ube tjilakidzo tje mishingo yakalulwama, udiye zwidiyo zwinogalikabgwe, nge zila ina ntutshi,

⁸kakale udiye zwidiyo zwakatambunuka zwisingasolese, kuti ndizo banokunyanyayidza babhakhwe nge shoni, bashaye bubi gwabangaleba nge kwedu.

⁹Udwe balanda bazwiyise pasi muna botetshi babo ne kubashathisa nge zila dzose, basingashandudzane nabo,

¹⁰abazofanila kubakwibila, bagalikebgwe mu tjimwe ne tjimwe kuti bubuya gwe zwidiyo zwe Ndzimu Ntjidzi wedu guzwilakidze mubali.

¹¹Nge kuti ngoni dze Ndzimu dzakazumbunukila kutjidziwa kwe mmwe ne mmwe,

¹²dzitidiya kuthubukana ne kushaya bugalimoyo nenge nyota ye zwithu zwe shango ino, kuti tigadzikane, titambunuke, nge kutjila butjilo gunolakidza bundzimu mu shango iyeyi,

¹³takalindila kugalabgwe kwaka kombolegwa ne kuzha kwe gudzo le Ndzimu wedu nkulu ne Ntjidzi wedu Jesu Kirisiti,

¹⁴iye wakazwipa kutidzutunula mu bubi gose ne kutizwitjenapadzila etithama tjaba iye mbuyanana ina ludo bukulu gwe kuthama mishingo mibuyanana.

¹⁵Ulebe zwithu izwezwi. Usimise gubungano kakale utjemele nge masimba. Kushaye wakulingila pasi.