Read Kalanga Filimoni 1 Bible Online

Filimoni 1 - Kalanga bible

Filimoni 1

¹Ndimi Paulo, nsungwa ngekwa Kirisiti Jesu, ndina Timoti ikamu tjedu. Ku nshingi naswi unodika Filimoni

²na Afiya, hazwadzi yedu, na Akipo mbhayani naswi ne gubungano linoshanganila mu nzi uwo.

³Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.

⁴Tjibaka tjimwe ne tjimwe ndoboka Ndzimu wangu ha ndikukumbula mu mitembezelo yangu,

⁵ngobe ndohwa ngekwe ludo gugo mu bathu bose be Ndzimu ne kugalamoyo kwaunako muna She Jesu.

⁶Ndotembezela kuti usime mukukobana bugalimoyo kuko kuti ndizo ube ne kuhwisisa kuzhele nge tjimwe ne tjimwe tjatinatjo muna Kirisiti.

⁷Ikamu tjangu, ndina kushatha ne kukulumbidzika kukulu kunodwa mu ludo gugo! Wakashathisa mimoyo ye bathu be Ndzimu bose.

⁸Ngekwa ikoku, nenguba ndina shaladuko tjose muna Kirisiti, kukulaya kushinga tjakafanila kushingiwa,

⁹koga ngobe ndokuda, mu bumo gwekuti ndikulaye ndokukumbila. Imi Paulo nthuntana, nsungwa ngekwa Kirisiti Jesu,

¹⁰ndokukumbila ngekwa Onesimasi nkololo wangu muna Kirisiti, wandakabe tate babe ndili mu busungwa.

¹¹Wakatongobe asina nshingo ku kuli, koga ngwenu watjibe ne nshingo ku kuli ne kundili.

¹²Ndombgwiliza ku kuli ngwenu, ndin'da kwazo nge ludo gwangu gose.

¹³Ndabe ndingada kugala naye ngeno nditjimu busungwa ngekwe Ndebo mbuya kuti andibhatshe mu bumo gugo.

¹⁴Koga anditoyemula kutola thambo imwe kuzhe kwe ndingaziba iwe sekwa unoalakana, kuti ndulamo iyo isitongobe nge kukombeledzwa, koga kube iwe unothama ngosununguka.

¹⁵Pamwe wakathubukanyiwa nawe kwe tjibaka tjifupi kuti ndizo uzhe ube naye kwatjose,

¹⁶asitji nlanda koga, ngono abe nthu unopinda nlanda atjibe ikamu tjinodika muna Kirisiti. Ndon'da seni! Ngono iwe wakafanila kun'da kupinda, se nlanda kakale ikamu tjitjo muna She!

¹⁷Ndizo ha ndili nkwinya uwo, un'amutjile sekwa ungandiamutjila.

¹⁸Ha akakutjinyila kene ekukolota tjimwe, utjikwale mu nlandu wangu.

¹⁹Imi Paulo, ndokwala ikoku nge luboko gwangu nditi, “Ndowokulipa.” Andinako, kakale andizofanila kube nako kukukumbuludza, kuti unondikolota butjilo gugo.

²⁰Ndoyemula ikamu tjangu, kuti ndibe ne bhatsho inodwa mukuli, muna She. Nyatutusa moyo wangu muna Kirisiti.

²¹Ngobe ndogalabgwe kuhwa kuko, ndokukwalila ndiziba kuti unowoshinga ne kunopinda tjandinokumbila.

²²Kakale undilulwamisile buyizelo, ngobe ndogalabgwe kuti Ndzimu unodabila mitembezelo yenyu mose, ukathama kuti ndizhe kumuli.

²³Epafurasi nsungwa ngekwa Kirisiti Jesu sami, unokudumilisa,

²⁴na Mako na Arisitako na Demasi na Luke, bashingi nami banodumilisabo.

²⁵Ngoni dza She Jesu Kirisiti ngadzibe namwi.