Read Kalanga Bahebheru 1 Bible Online

Bahebheru 1 - Kalanga bible

Bahebheru 1

¹Ntolo, Ndzimu wakalebeleka na bobatategulu bedu nge zila njinji dzakasiyana ushingisa balebesambeli,

²koga mu mazhuba ano e bupelo wakalebeleka naswi nge Nkololo wawo, iye wawakabumba lubumbo ndiye ukabuya ukambiga kube n'gali thaka we zwithu zose.

³Ndiye tjilakidzo tje gudzo ne ifano tje mbumbiko yawo. Wakabhata lubumbo nge dama lile lina masimba. Wakati asinothama tjenapadzo ye zwibi kagala ku luboko gwe luji gwe Ndzimu Masimbawose.

⁴Nkololo kabe nkulu pa batumwa be kudzimu, se zina laakamutjila lili gulu pana abo,

⁵ngobe Ndzimu auzotongo dwa mmwe we batumwa bawo be kudzimu ukati, “U nkololo wangu, nasi ndabe Tate babo.” Kakale Ndzimu auzotongo dwa mmwe we batumwa be kudzimu ukati, “Ndowobe Tate babe, iye unowobe Nkololo wangu.”

⁶Koga Ndzimu wakati uzhisa Nkololo wawo we mbano mu shango, ukati, “Batumwa be Ndzimu bose ngabannamate.”

⁷Ngekwe batumwa be kudzimu, wakalebeleka ukati, “Unothama batumwa bawo be kudzimu bakabe phepo,[1] ne balanda bawo unobathama bakabe nthuto we moto.”

⁸Koga ngekwe Nkololo wawo wakalebeleka uti, “Tjigalo tjenyu tje bushe,[2] Ndzimu, tjowobepo nge kusingapele ne ludozo gwe ndulamo ludozo gwe bushe gwenyu.

⁹Makada ndulamo mukabenga bubi; ndizo Ndzimu, iwo Ndzimu wenyu, wakamuzhodza mafuta e kushatha kunopinda kwe bakwinya benyu.”

¹⁰Kakale wakati, “Imwi, She, mu kutangisa makabumba shango, ne zhuzhugwi nshingo we maboko enyu.

¹¹Zose zowoloba, koga imwi mukagalila tjose, zowoshakala zose se tjiambalo.

¹²Se ngubo mowozwipeta zwikashandugwa. Koga imwi mowogalila tjose, ne butjilo gwenyu agutowopela.”

¹³Koga ndi upi ntumwa we kudzimu wakatongo dwiwa nge Ndzimu uti, “Gala ku luboko gwangu gwe luji kudzina ndithama zwita zwizo tjigalo tje makumbo awo.”

¹⁴Apa batumwa be kudzimu bose ate bali meya inoshinga, yakatumwa kushingila ibabo banowoamutjila jidzo kene?