Read Kalanga Bahebheru 10 Bible Online

Bahebheru 10 - Kalanga bible

Bahebheru 10

¹Se nlayo uli ntutshi we zwithu zwakanaka zwinowozha, usina mbumbiko yazo ye malebeswa, awungathame ibabo banozha pejo kunamata Ndzimu bakabe bathu bakapelela nge zwibhayilo zwinodwilila zwipiwa gole ne gole.

²Ha kwabe kusakajalo, apa banobe basakawidza kudusa zwibhayilo kene? Ha kuli kuti banamati bakatongo tjenapadziwa, banobe basitjina hana nge kwe tjibi tjabo.

³Koga mu zwibhayilo izwezwi kuna gumbuludzo le tjibi gole ne gole,

⁴ngobe akutotubuka kuti malopa e mikono ne e mbudzi aduse zwibi.

⁵Ngekwa ikoku, Kirisiti wakati ezha mu shango kati, “Amutoshaka zwibhayilo ne zwipo, koga mandilulwamisila mbili.

⁶Zwibhayilo zwinopisiwa, ne zwibhayilo zwe kudusa tjibi azwitomushathisa.

⁷Kudwapo ndakati, ‘Ndipano kushinga kuda kwenyu Ndzimu, koga sekwa kwakakwagwa nge kwangu mu lukwalo.’ ”

⁸Kutanga wakati, “Amutoshaka, kakale amutoshathisiwa nge zwibhayilo ne zwipo kene zwibhayilo zwinopisiwa nenge zwibhayilo zwe kudusa tjibi.” (Zwibhayilo izwezwi, zwakabe zwidusiwa kuyendidzana ne nlayo).

⁹Kabuya kati, “Ndipano kushinga kuda kwenyu.” Unomisa zwibhayilo zwe kutanga kuti ndizo atangise zwe bubili.

¹⁰Nge kuda kwe Ndzimu, takayengemadziwa nge mbili wa Jesu Kirisiti waakadusa kang'ompela kakale asingatjowoudusa kuti ube tjibhayilo.

¹¹Mpirisiti mmwe ne mmwe unoshinga mishingo iye mazhuba wose epa zwibhayilo zwinofana epaphulula. Zwibhayilo izwezwi azwitodusa zwibi.

¹²Koga Kirisiti wakati adusila misi yose tjibhayilo tjing'ompela tje kudusa zwibi, kagala ku luboko gwe luji gwe Ndzimu.

¹³Kudwapo kalindila kudzina Ndzimu uthama zwita zwizwe tjigalo tje makumbo awe.

¹⁴Nge tjibhayilo tjing'ompela, wakalulwamisa kwakapelela bose ibabo banoyengemadziwa.

¹⁵Ne Meya yakayengemala naiyo inotendeka ngoti inoti,

¹⁶“Etji nditjo tjidumano tjandinowothama nabo mu mazhuba anozha. Ndowolonga milayo yangu mu mimoyo yabo aikwala mu mikumbulo yabo,” kojalo She.

¹⁷Inopapha kakale iti, “Anditowokumbula zwibi zwabo ne zwiyito zwabo zwakabipa.”

¹⁸Ndizo pana kuzwiibhatigwa, akutjina tjibhayilo tjingabe tjingatjadusigwa tjibi.

¹⁹Ndizo wali, zwikamu, se tina kugalabgwe kungina mu Bugalo gwakayengemala kupindisa nge malopa a Jesu,

²⁰nge zila tshwa inotjila yaakatizhulila kupinda pa tjisitili, kodwa kuti nge mbili uwe,

²¹kakale se tina Ntungamili we bapirisiti unotjengeta Ng'umba ye Ndzimu,

²²ngatisedzeleni ku Ndzimu nge mimoyo ina malebeswa ne kugalamoyo kwakwako, nge mimoyo mibuyanana ne hana ne mibili yakangudziwa nge vula mbuyanana.

²³Ngatibhatiseni kugalabgwe kwedu tisingazunguzike, ngobe iye wakagadzabgwe unogalikabgwe.

²⁴Ngatikumbuleni sekwa tingamusidzilana ludo ne kuyitilana bubuya,

²⁵tisingaletje kushangana se bamwe besokang'angwa. Koga ngati kulumbidzaneni, se mubona kuti zhuba le kuzha kwa She losedzela pejo.

²⁶Ngobe atitjinya mwaza tisinoamutjila lebeswa, akutjina tjibhayilo tjinowodusa jinyo ledu.

²⁷Tjasala hwulindila ngotja kusumikilisiwa kunozha ne moto unotjisa, iwo unowolobesa zwita zwe Ndzimu.

²⁸Mmwe ne mmwe unotjuluka nlayo wa Mushe unobulawa asingahwigwe ngoni ha ewang'wa ana nlandu nge butendeki gwe bathu babili kene batatu.

²⁹Shamu ihwulu inowoloba nthu unolengudza Nkololo we Ndzimu katshamba malopa e tjidumano nge makumbo koga ali iwo aakayengemadziwa ndiwo, ngono ngothama ikoku ebe egwadzisa moyo Meya ye ngoni.

³⁰Ngobe toziba iye wakati, “Kubgwilizila nge kwangu, ndowobgwilizila.” Kakale wakati, “She banowosumikilisa bathu babo.”

³¹Tjithu tjinotjisa kwazo kuwila mu maboko e Ndzimu unotjila!

³²Koga kumbulani misi yakapinda, makati musinowana tjedza mukasimisila kumilana ne kudziyila,

³³Tjimwe tjibaka makabe musotukiwa pakati kwe bathu kakale mukadziyidziwa, tjimwe tjibaka muma ne bakabe bebhakhwabo saikoko.

³⁴Ngobe makabe ne kuhwila ngoni basungwa, muti matapigwa thundu dzenyu, mukadzikitadzila ndashikilo yenyu nge mimoyo yakashaladuka, ngobe muziba kuti muna tjimwe tje themba hwulu tjigelile tjose.

³⁵Ndizo musitongo sabe ne kuligila zwilopa, ngobe kuligila zwilopa kuna mbhayilo nkulu.

³⁶Ngobe makafanila kube ne kudzikitadza, kuti ndizo mushinge kuda kwe Ndzimu ngono mube muamutjila tjawakagadzabgwe.

³⁷Ngobe tjibaka tjasala tjifutshwanana, “Ngono iye unozha unowozha, aatowononoka.

³⁸Koga nlulwami wangu unowotjila nge kugalamoyo, koga ha angabgwilila shule, aatowoshathisa moyo wangu.”

³⁹Koga ate tili bathu banobgwilila shule bakalashika. Koga togalamoyo tikalondolodza butjilo gwedu.