Read Kalanga Bahebheru 12 Bible Online

Bahebheru 12 - Kalanga bible

Bahebheru 12

¹Setakapotelekwa nge mbunga nkulu we batendeki, ngatilasheni tjimwe ne tjimwe tjingatipinganyidza, kose ne tjibi tjinotinamatila, ngono tilabuke takasimisila mu lubilo gu mbeli kwedu,

²takalinga Jesu ntangisi ne mpeleledzi we kugalamoyo kwedu, iye wakati abona kushatha kunonzhila kadzikitadzila tjileyanyo eshayila hanya kulengudziwa, ngono ngwenu ugele ku luboko gwe luji gwe tjigalo tje Ndzimu.

³Kumbulani Jesu wakadzikitadzila kunyanyayidziwa nge babi, kuti ndizo musinyalemoyo mukadwa mutoboka.

⁴Mu kugwisana kwenyu ne tjibi akuthu kukaswika mu tjimo tjekuti mu gwe kungathama kuti lopa lenyu litebugwe.

⁵Apa makakangang'wa dama linokulumbidza se bakololo kene? Dama linoti, “Nkololo wangu, usikutole kuli kulelu lelu kutjemegwa ndi She kakale usinyalemoyo ha She bekuloba,

⁶ngobe She banotjemela iye wabanoda, bakabuya bakaloba mmwe ne mmwe mwana wabanoamutjila.”

⁷Dzikitadzilani kutjemegwa, Ndzimu unomutola se bakololo. Ndiupi mwana usingatjemegwe ndi tate babe kene?

⁸Ha musingatjemegwe se bana bose, kodwa kuti mu bana be bupombgwe. Ate muli bana be malebeswa.

⁹Tina botate bedu mu shango ino banotitjemela, koga tobateta nge kwako. Apa atizofanila kuzwiyisa pasi kupindisa, kuna Tate bedu banotipa meya ne butjilo kene?

¹⁰Botate bedu bakabe betitjemela kwe tjibaka tjifupi, sekwa banobona kufanila, koga Ndzimu unotitjemela kutibhatsha iswi, kuti ndizo tishanganyile nawo kuyengemala kwawo.

¹¹Ngobe ha utjemegwa, mu tjibaka itjetjo akutozipa kogwadza, shule kwe kutjemegwa ndiko kunozha zwizwalo zwe kunyalala kwe ndulamo kuna bakadiyiwa ngotjemegwa.

¹²Ndizo simisani maboko enyu akalembeleka ne zwidwi zwenyu zwakanyala!

¹³“Thamilani makumbo enyu zijana dzakatambunuka,” kuti ndizo una gumbo linogwadza lisilemale, koga lipodziwe.

¹⁴Gwisani kube ne mbakiso ne bathu bose nenge kuti muyengemale, ngobe akuna unowobona She kuzhe kwe kuyengemala.

¹⁵Muyite kuti kushete unowokong'wa kuwana ngoni dze Ndzimu, ndizo kusibe ne unowomela pakati kwenyu se ndzi unobaba, kazhisa phipiti, katjinya banjinji,

¹⁶ibeni ne njele kuti kusibe ne phombgwe, kene nthu usina hanya ne Ndzimu sa Esau, iye wakatengesa kube mbano kukwe nge ndilo ye zojiwa.

¹⁷Moziba kuti kwakati shule woshaka makombolelo kalambiwa; ngobe kwakabe kusitjina sekwa angashanduka muna tjaakathama, nenguba akabe eashaka nge mishodzi.

¹⁸Amuzozha ku zwithu zwamungabhata nge maboko, ku bhuba le moto, ku zhalima, pakati zwititi ne dutu.

¹⁹Amuzozha ku nlidzo we lunyanga kene ku hwi lakati lilebeleka bathu bakakumbila kuti lisidwilile.

²⁰Ngobe bakabe basingatubule kumilana ne ndaulo yabakapiwa inoti, “Ha kene phuka ingakutha dombo ilelo, yakafanila kikithidziwa nge mabgwe.”

²¹Kwakabe kutjisa kwazo kubona tjithu tjakajalo Mushe kwaakadzina kati, “Ndotetema nge lutjo.”

²²Koga imwi mazha ku Dombo le Ziyoni ne ku nzi nkulu we Ndzimu unotjila, Jerusalema we kudzimu ne ku batumwa be kudzimu mu nshangano we kushatha,

²³ku nshangano we mbano dzakakwagwa mazina kudzimu, mazha ku nsumikilisi iwo Ndzimu wa bose ne ku meya ye bathu bakalulwama ngono bakalulwamisiwa kwakapelela.

²⁴Mazha kuna Jesu tjibanga tje Tjidumano tjitshwa, mazha ku malopa akanyasiwa, anolebeleka zwithu zwinoyita pana a Abele.

²⁵Ibeni nge njele, musilambe kuhwilila iye unolebeleka. Ngobe ibabo bakalamba kuhwilila iye wakatjemela ali mu shango, bakasheta madzetelo. Ngono apa iswi ha tilamba iye unotjemela edwa kudzimu, towodzeta tjini?

²⁶Ipapo, hwi lile likazunguza shango, koga ngwenu wakagadzabgwe eti, “Ndowopapha kang'ompela koga azunguza zhuzhugwi kose ne shango.”

²⁷Matama anoti, “Ndowopapha, kang'ompela koga” anolakidza kuti kowozunguziwa kukadusiwa zwithu zose muna zwakathamiwa, kuti ndizo kusale zwisingazunguzike.

²⁸Ndizo ngatibokeni Ndzimu, ngobe toamutjila bushe gusingake gukazunguziwa, ngono namata Ndzimu nge zila inoushathisa, nge kuteta nenge kutja,

²⁹ngobe Ndzimu wedu moto unolobesa.