Read Kalanga Bahebheru 13 Bible Online

Bahebheru 13 - Kalanga bible

Bahebheru 13

¹Ludo gwe zwikamu ngagudwilile mbeli pakati kwenyu.

²Muamutjile bayendi nge buthu mu misha yenyu, ngobe ngojalo bamwe bakaamutjila batumwa be kudzimu basingazibe.

³Kumbulani bamu ng'umba dze busungwa, se mumu busungwa nabo na ibabo banobhakhwa zwakabipa, ngobe namwibo mungadziyidzikabo.

⁴Ndobolo ngaikudziwe pakati kwe bathu bose, thobo ye ndobolo ngaibe mbuyanana, ngobe Ndzimu unowosumikilisa phombgwe ne basinga zwibhate.

⁵Mutjile butjilo gusingalaugwe nge ludo gwe mari, ngono mugutshike nge tjamunatjo. Ngobe Ndzimu wakati, “Andingakulashe, kene akusiya.”

⁶Ndizo tingaleba ngogutshika titi, “She mbhatshi wangu. Anditowotja. Apa nthu ungandiyitani kene?”

⁷Kumbulani batungamili benyu, ibabo bakamubudza dama le Ndzimu. Kumbulani sekwa bakatjila ne tjakadwa mu butjilo gwabo, ngono muyidzelele kugalamoyo kwabo.

⁸Jesu Kirisiti ndiyezwe wa madekwe ne wa nasi newe kusingapele.

⁹Musitongo tungamiligwa ntome nge zwidiyo zwakasiyana siyana, zwisakawolobeleka. Kwakanaka kuti moyo uisimisiwe nge ngoni dze Ndzimu, kusi nge zojiwa zwisakabuzila tjimwe ibabo bakanamatilana nazo.

¹⁰Tina tjibeso tje zwibhayilo tjinoti ibabo banoshinga mu nshasha we zwibhayilo bakasibe ne fanilo dze kuja zwimutjili.

¹¹Ngobe mibili ye phuka idzedzo dze malopa anozhisiwa nge Ntungamili we bapirisiti mu Bugalo gwakayengemala kupindisa, tjili tjibhayilo tje tjibi, inopisigwa kuzhe kwe nzi.

¹²Sa ikoko Jesu na iyebo wakafila kuzhe kwe nzi, kuti ayengemadze bathu nge malopa awe.

¹³Ndizo ngati yendeni kunli kuzhe kwe nzi, tisengane ne kugongobogwa kwaakadzikatidzila.

¹⁴Ngoti muno atina nzi usingalobe, koga titjashaka nzi unozha.

¹⁵Ngatidwilileni muna Jesu tiyiseni tjibhayilo tje gudzo ku Ndzimu, ikoku zwizwalo milomo ye banokudza zina lawo.

¹⁶Musitongo letja kushinga ndulamo nenge kukobana tjamunatjo, ngobe zwibhayilo zwakajali zoshathisa Ndzimu.

¹⁷Muhwe batungamili benyu, mushinge tjabanomudwa. Ngobe banotjengeta meya yenyu, se bathu banowoyisa mbiko ku Ndzimu. Itani kuti bashinge nshingo wabo nge kushatha, kusi nge buyendasi, ngobe ikoko akungamubuzile tjimwe.

¹⁸Mutitembezelele, ngobe tina hana mbuyanana. Toyemula shinga ndulamo mu tjimwe ne tjimwe.

¹⁹Ndomukulumbidza ndisimisa, kuti muthame ikoku, ndizo nditjimbidze kuzha kumuli.

²⁰Dzene Ndzimu we kunyalala iwo wakamusa She wedu Jesu mu bafi, iye nlisi nkulu we pkhwizi, nge malopa e tjidumano tjisingapele,

²¹ungamupa kose kwakanaka kuti ndizo mushinge kuda kwawo ungashinga mu muli itjetjo tjinoushathisa, ndi Jesu Kirisiti. Ngaukudziwe nge kusingapele. Ngakujalo.

²²Ndomukumbila, zwikamu, amutjilani nge moyonlefu dama langu le kukulumbidza, ngobe ndamukwalila nge bufutshwanana.

²³Ndomuzibisa kuti ikamu tjedu Timoti, wakasunungugwa. Ha angazha tjinyolotjo, ndowozha naye kuwomubona.

²⁴Dumilisani batungamili benyu bose ne bayengemali bose. Banodwa ku Italiya banomudumilisa.

²⁵Ngoni dze Ndzimu dzibe namwi mose.